相約「懷智」

第二年跟梁師奶，連同細佬及其女友到將軍澳基督教懷智服務處，聖誕夜帶班智障人士去尖東賞燈飾。

細佬本有兩個同事答應會黎幫手，但好無責任心地臨時放飛機；其實做義工點可以咁架？佢地一場期待，食飽飯ready好晒，先話因為有d報左名既義工no show而要留下，試問點過意得去？

其實整個流程好快，7點多跟大隊坐大巴出發去尖東；落車後一對一拖住佢地慢慢行半小時，不時同佢地講吓野，返上大巴往人多既新世界半島一帶兜左個圈，唔駛9點就散。

我今次既partner唔係去年患自閉症既詠恩，而係輕度弱智，患唐氏既震偉。震偉比較開朗，好似一個好乖害羞既青年咁默默跟住我行；只係口齒不清，所以往往要估佢想講乜。

細佬就比較challenging，帶一個有視障，只可見光和影，但見到光會自己亂行既青少年；不時要同佢詳細形容周圍有無障礙物。

每次見到佢地，就會覺得自己好幸運，可以自主地周圍去，唔駛期待別人騰空黎帶出街。