去教堂都要硬銷？

梁師奶去天主教會做義工，打發時間之餘又識到班新朋友係一件好事。但隨之而開始嘗試逼我睇d教會書，同千方百計要我去望彌撒就真係著實令我有d反感。

自嬰兒時已經被佢"踢左入教"，連Gloria都係我既Catholic name。你問我信唔信天主，我信；但又未去到虔誠既程度。我唔覺得硬逼我每星期去坐響度發一粒鐘白日夢就代表我會同天主接近左。太過形式既野，我做唔黎。

師奶死心不息，朝早打電話黎話想過黎炮台山睇吓天主教堂喺邊，好等我星期日自己都可以去望彌撒；順便上黎我屋企坐一坐。本來佢成幾年無上黎，剛巧我朝早放假開到門比佢，呢樣都無所謂。但幫我搵埋教堂要我去........咪玩啦，咁大個人，有心去就自己都會搵。

宗教既野只要係導人向善，就算其他既教我地都應該尊重。早排梁師奶每星期都湊個年紀老邁既婆婆去教堂，一日開門聞到有香燭味，就突然變得反感，甚至唔想再幫呢位婆婆......我就真係唔多認同。幫人都要揀自己教派先至幫？聖經有教人去選擇性地幫自己友？

如果一個無宗教信仰，但一生行善既大好人，唔通死後就因為唔係教徒而無得上天堂？

佢堅持要自己過黎幫我搵間天主堂我唔阻佢，但講得慶起都忍唔住車左句：我唔係自願既話，你咁樣逼我無用架；家陣你既行徑，同邪教有乜分別呢？(噤左佢線)

今次又唔知佢會嬲幾耐。