加大碼海南雞

難得週末早起既Annie，因為公司驗身而有閒情約我食晏。

兩條女殺入電器道「味皇」，見佢新出左海南雞飯同粥套餐，於是一人叫一樣黎試。

個飯已經大得有點嚇人，我個粥餐先黎碟香荵豉油撈麵，碗粥既份量邊鬼度係一碗，簡直係一鍋！真係兩個人share還差不多。兩個餐都係$40有找，掂當過中環翠華。

最掂既都係呢度既招牌炸魚皮，選用龍利魚皮，夠鹹香鬆脆。