雞粥新紀錄

尋晚Gigi再次發起BBQ聚會。其實佢下午已經有一場BBQ，連續兩餐，兼差不多個個週末如是，我地就當然樂得有人安排晒，但佢唔會厭咩？

除左Connie & Jeffrey外，林大狀兩公婆同極期待上去三樓playroom玩既Alistair都出席。

牛肉依舊高質數，雞翼依然入味。是晚新攪作係勁大條(但一樣勁多肥肉)既"霹靂大肉腸"，同埋蒜茸燒大蚌。大蚌點燒都唔會太乾水，而且彈牙有口感；燒扇貝立刻被比下去。

陳記雞粥既鍋比平時高，因為要應酬兩批食客。Connie似乎係決心刷新自己創下既5碗紀錄而黎，一晚之內擺平6大碗！我同Jeffrey都唔弱，分別隊左4同5碗。真怕會食上引。