雪花冰

聽過好耐，估唔到首度試呢款新刨冰既地點唔係台灣，而係筲箕灣東大街。

同Debbie過去搵YY食晏後，發現粥盞隔離新開左間甜品舖：甜品老媽。吸引我地入內既，就係門前一大張"台灣雪花冰"海報。

嘗冰既我，點會錯過呢？

店內老媽欠奉，但老爸就一大個坐陣，相信係老版娘既花甲老爹。

車仔台式雪花冰

冰底($22)：揀左士多啤梨
配料(各$2)：台式白珍珠，愛玉凍，百香果魔豆

雪花冰比傳統刨冰口感幼滑，而且無咁凍。最有趣係個魔豆，望落已經似三文魚子，估唔到咬落一樣會口腔內爆破；不過係百香果汁。份量比台灣既細好多，有點唔夠喉；計落價錢偏貴。

另外YY叫既"特式芒果椰子河粉"($28)都賣相唔差，不過河粉既椰子味道被汁底蓋過。

最搵笨同無特色既要數Debbie既"雪糕三撈"($20)，結果只係青檸果凍+朱古力雪糕+５粒西瓜咁大把，大家搭枱一樣一ｄ都撈唔埋。