惠氏版「雪姑七友」

年底又要去珠海開年會。12月30-31號珠海，1號返香港；大陸同事們可以揀香港或澳門玩多兩日。(即係話我今年大除夕又係同班大陸"俊男"一齊倒數！頂，年年斷我米路咁唔掂喎，嫁唔出真係要入公司數)

過去兩年都唔駛表演既「香港辦事處」，今年都走唔甩要負責一個表演項目。佢地大陸ｄ其他辦事處一向玩得好大，bra-top，透視，民族舞，千手觀音......要幾大有幾大。無形中對我地構成壓力架：太"行"既嘢例如唱歌嗰ｄ，邊度見得人架！

多得卡生既提議，同Ebby既幫忙，問廣告公司Maxus借到佢地今年早前annual dinner扮既「雪姑七友」戲服。真係唔可以唔對佢地既製作認真程度寫個"服"字！

班同事即時翻開黎試既時候，簡直笑爆咀啦。「雪姑」一角，就決定由男仕反串。點解？睇吓個故事大綱咪知囉：

話說七個小矮人自覺缺鈣，所以長唔高。雪姑一心想搵隻好既鈣片比小矮人，點知既惡毒既女巫(promotor)sell左隻含蠔殼既鈣片既佢(Oscal?)。點知雪姑對蠔殼有敏感，呼吸困難之下斷左氣。於是....登登登登.....戲肉黎喇，我地即場邀請台下既「佳存」王子阿Paul上黎咀阿雪姑之餘，醒粒巨型Caltrate黎救番醒佢。

你地話叻，如果雪姑係條女扮，我驚大陸成班麻甩佬衝上台，個女同事真係渣都無呀！
(真係有咁旬既話，最多蝕底ｄ，我黎做雪姑喇.......哈哈哈)