去「鴻星」探病

之前梁師奶都有閒日去跑馬地五嬸嘅住處探望過佢幾次。我就自上次醫院見過五嬸後，連五叔自溫哥華返埋黎都一直無再見過。

襯剛北上去上海轉工嘅堂妹，週末返落黎約咗佢地兩老，加埋堂大佬一家去時代廣場「鴻星」飲茶，我就出席當去探病。

做完body massage沖埋涼，頭都未吹就飛的趕去；總無理由要長輩等。

開始化療嘅五嬸，面色比初回港時灰暗咗ｄ；講說話亦都慢咗。每星期都要返醫院抽肺嘅積水，仍然不時咳嗽。家陣訓覺已經差咗，但襯仲食得走得(雖然動作慢ｄ)，都應該出院享受吓天倫樂。似乎每個癌症末期病人都會經歷呢個過程，遲ｄ要長住醫院嘅時候，想再出去感受吓陽光都無可能。

希望五嬸可以盡量享受剩餘嘅日子；香港仔女同對孫都喺身邊，點都好過呆喺4pm就天黑嘅溫哥華。