憶蓮Live07

唔係林憶蓮既fans，但覺得佢都係唱得之人，所以幫Connie用東亞card優先預售演唱會門票時，雖然$680以本地artist黎講真係有d貴，但都柴娃娃一齊hea黎睇show。

地點係九龍灣展貿昨日先啟用既新hall"匯星"(Star Hall)；Connie連同Maryknoll同學仔Betty一齊黎。

個hall唔大，得3000個座位。我地坐第5行，雖然側台，但都算近。個台設計極簡約，白板一大塊，用唔同既燈光影像投射上去製造效果；華麗欠奉，不過幾特別。

準8點半開show，唱足兩小時歌接歌，學埋王菲咁野都唔講多句。成晚只有兩套衫，亦都奉行簡約主意。慢歌為主，而且有一半係冷門之選，差不多全程都係企響台中央齋唱。好處係無乜人企起身，等我都可以舒服坐住睇晒全場。

值得一讚既係音響，甚至好過紅館，憶蓮unplug既幾首歌玩聲聽得一清二楚。

地點唔就腳，散場一貫混亂；好彩跳上架去銅鑼灣既紅Van，大半個鐘就出返港島。