下一個目標：東港城

自去年睇完維景灣畔，發覺梁師奶屬意既座向，因為近堆田區而有機會因風向傳黎垃圾味，平熄左佢既一鼓換樓衝動後，平靜左大半年，佢又再嚷著要搬。

話說隔離屋裝左乾衣寶，因為用Bounce柔順紙每次乾衣都會有人工香味入屋；本來一般人都唔會介意既野，對梁師奶黎講就難以忍受。加上佢稱話隔壁家有人鍾意屋內抽煙(咁都嗅得到？)，而令佢呼吸困難，推動新一輪搬既決心。

今次佢屬意要搬坑口既東港城。

本來真係比佢激壞既我同梁大少，都知呢個麻煩天蠍座係反對無效，唯有佢想點就點。而且新都城同東港城呎價相約，對佢黎講返教堂亦近，搬都未必係壞事。只係論樓下商場，就新都城較方便同舖頭種類齊全。

希望佢今次唔好如買梁大少沙田處咁，玩Impulse purchase，又唔比心機講價就好喇；真係怕鬼左佢。