Code Blue














新一季日劇剛出爐，既然聽日就要入將軍澳新都城充當狗褓母12日，當然要去入定貨帶去解悶啦。

呢一季劇集當中，最矚目都應該係Code Blue；由"求婚大作戰"既山下智久擔當，加上其他都係熟口熟面既大卡士製作。









故事圍繞著4個實習醫生，參與直昇機飛行醫療部隊，從互相較勁誰可上機on duty，當中遇到不同病例而各自成長。









比起無線開拍以紀律部隊為背景既劇集，只係以部隊為幌子而大部份時間都係主角們談情說愛，日劇認真同大場面得多。Code Blue使用既醫療直昇機 "Doctor Heli" 每一集都出場飛行，可想而知製作費有多高。而且主角們差不多整套劇都係穿著醫院工作服，主線落在醫生病人既互動上，唔會好似無線既掛羊頭賣狗肉式，用醫生/律師/消防員/飛機師等既職業，而每一套都走唔出處境鬧劇既戲碼。