不無唏噓

前晚收到相識多年既新加坡同事Wei Lin既"Good Bye"Email，錯愕之餘以為佢終於奔波辛苦得滯頂唔順，毅然離開工作左差不多13年既惠氏。
大家都叫做識於微時，第一次去新加坡出trip，就係佢義務車我周圍參觀；由佢未結婚到家陣係三子之母，不時都會響regional conference大家碰面。新加坡office同香港一樣，人唔多大家都要資源增值一腳踢，所以碰頭呻既時候特別有共鳴。

但尋日先知，原來佢唔係自己劈豹，而係被公司redunctant......因為班鬼佬打算摺埋當地regional office，所以當年被迫走馬上任既佢，公司連退路都無比，就請食"肥雞餐"慰勞佢；而且聞說只係得兩日通知。

話口未完，尋日下午收到埋新加坡GM，亦都係相識多年既Lam Pin Kee告別mail。今年分別響New Jersey同Bangkok碰過面，上次佢仲話下個月黎香港開Marketing Meeting時會搵d老友聚聚舊....

真係自5月阿John意興欄柵請辭後，又一次對公司有心淡既感覺。

雖然明知無一間公司會無左邊個唔得，但把口大大聲話著重Talent Management既同時，restructure就毫不猶豫地整走d做得野，努力兼肯搏既員工(新加坡過去幾年業績都有兩位數字增長，而Wei Lin更創下穿左羊水都趕埋份報告先入院生仔，未放完產假就返工既傳奇)，大家就算係旁觀者個心都會涼一截啦。