CCC的大閘蟹

聽日就返美國既姑姐，今晚邀請我地同姑丈班親戚共兩圍，到堂大佬有會籍既跑馬地CCC(高利華木球會)新翼中菜廳食大閘蟹。

呢度一向料靚味美價錢相宜，但就只限Member Only簽脹。

先黎個燒味拼盤暖一暖身，主角大閘蟹馬上登場！隻隻都有手掌般大，而且預左每人兩隻；梁師奶就唔好蟹黃，我亦都怕拆蟹麻煩，當然結果都要打包留待好蟹之仕慢慢享用。

其他既菜式份量都好大，而且味道拍得住西苑：香酥荔芋臘味盒，花膠蛇羹，蜜糖豆炒帶子桂花蚌，煎封筍殼魚，瑤柱扒豆苗，瓦窯豉油雞，生炒糯米飯，椰絲蛋散同起晒沙既紅豆沙。

梁師奶尤其欣賞條炸都脆仆仆既筍殼魚，因為屋企一定整唔到，佢差不多同人地清碟咁滯。

如果唔係行會員制，廖太聚會又多一個好地方。