非常隱閉的恒豐酒店Tea Buffet

真係算我身為香港人孤陋寡聞，當Carol SMS比我話今日訂左恆豐酒店tea buffet，我真係一頭霧水：乜恆豐中心唔係齋商場，竟然有間酒店響度？原來酒店響商場二樓側邊可通，再多上兩層，就係cafe"紅煙窗餐廳"。

難得連林Auntie到出動，林家一家7大小出黎tea buffet。$118信用卡有八折，當然咁既價錢唔會期望太高質數，但味道亦合乎佢"普通"既預期。沙律熱盤選擇唔算太少，有即製Crepes同生滾粥，值得加分既係有兩款口味既自助沙冰機(青檸及水蜜桃)，同埋4款Movenpick雪糕。

但Dinner Buffet就千祈咪試，因為我地5:15pm臨走時，見佢地已經擺晒ｄ頗削既蟹腳，青口小龍蝦壽司出黎走廊任我地呢類路人甲指指點點，而最大問題dinner buffet係6:30pm先開始，咁樣放ｄ海鮮響室溫成粒幾鐘，隨時食到中招。

另：多謝晒Carol既太陽花水晶同埋巢大小姐既櫻花香水，今年首份生日禮物(哈，其實八月都未到)。