興發茶餐廳

發現一間有水準的茶餐廳!

放工約左YY，Ophelia同Debbie晚飯；有點新意，去大坑搵食。
之前電視有介紹過，所以摸到去中央圖書館旁的"興發茶餐廳"試試佢既黑糯米釀雞翼有幾堅。$48/隻真係唔平，但確實好鬼掂。去骨皮薄而脆，內裡釀的黑糯米唔算濃味，肉質好滑。聞說師傅響農圃出黎，果然名不虛傳。

其他小炒亦頗不俗：

炒得乾身的貴妃蝦肉鬆炒飯($52)，瑤柱肉鬆蒸蛋白($42)，家鄉炆豆腐角($62)，醋香豬扒($68)，雞湯浸勝瓜($52)-個雞湯好濃好甜，連唔多鍾意食勝瓜既我，都夾了又夾。

另一驚喜係甜品脆麻花($40)，極薄極脆!沾於外面的椰絲好幼細，而且甚乾身。必食!!!!!