食香

對面裕利今早拜神切燒豬，當然成個電梯大堂都係瀰漫住香燭燒豬味啦。

Debbie「揸完水」返黎就話：出面真係勁香！
我聽到當堂好似遇到知音人咁：你都鍾意聞架？我都係自細勁鍾意呢種味！
Debbie：但我更鍾意食囉！
我(少少愕然)：......我地未食得住喎......
Debbie：啋瘟過你咩，唔係食香，我講燒豬呀。

余經理已經話過年千祈唔好見到我，因為我口沒遮攔。Debbie今日加多句：何只過年，但逢大節都唔好見到我。

唔係講笑，我真係好鍾意聞香燭味。細個屋企嫲嫲未被梁師奶踢入天主教時係拜神既。我最鍾意一附無知樣坐喺神枱隔離，靜雞雞偷食晒ｄ脆薄薄燒肉，哇哈哈。