五嬸最後一程
返左一陣工，十點多徒步行過去附近香港大酒店，送五嬸最後一程。

往後堂探望，見五嬸遺容安詳；個粧著實有d厚，但未至於走晒樣。

梁大少尋晚守夜到左，今朝除左我同梁師奶加堂妹外，五嬸外家親戚都只係4-5個蒞臨。

11點跑馬地天主教堂既殯葬小組，連同葡籍神父到達，舉行左差不多一個小時既惜別禮。

跟大隊上哥連臣角睇埋入爐後，就齊齊返落去太古城「海天皇宮」食解穢酒。

梁師奶同班殯葬小組教友，雖然唔同堂區，但一樣雞啄唔斷。當得知我都係受左洗既天主教徒時，興奮地問我去開邊間(教堂)，我唔想講大話既情況下，唯有答：無乜點去。