再聚Su Casa

上次同謝菲，Angela同YY黎過後，對呢度既美味念念不忘。所以再約Consumer Healthcare既歷代舊同事：Liza，Pandora同余經理再黎；連稀客Martha都暫時放低大小公子，出黎同我地聚一聚。

呢年多增左唔少磅既Liza兩公婆，仍然非常興高采烈地品嚐每一碟，哈哈，食得是福。

扒蘇格蘭蟶子皇煎得剛剛好，調味亦都恰到好處；但可惜唔夠熱。

生蠔platter見人多，就黎足兩大盤。

鴨肝野菌扁意粉依然齒夾留香。另外蜆肉意粉同大蝦扁意粉都做得出色；唯獨是個黑松露意大利飯就份量細得可憐，每人一啖仔。

烤鱸魚肉厚暖滑，rib eye相對有點比下去。

甜品分別叫左麵包布甸，同朱古力心太軟；前者只伴以香草雪糕而唔係custard，有點美中不足。

因為逢星期五，六晚市都要分兩輪，所以臨尾被"禮貌地幹埋單"，有點未能盡興；下次都係週一至四黎會好d。