殯儀之二

前年Michael借過我"殯儀"一書，原來去年出左第二冊，二話不說借黎讀。

第一冊講乜已經無甚印象，總覺呢d標題出位既書，寫黎寫去都係三幅屁。

開頭講法醫同"福伯"(即殮房聽差)，都頗有趣味；但後來既殮房雪櫃維修員，警察(因會於凶案現場第一個接觸死者)，同埋執骨師就開始多鬼神之說，亦都開始悶同嘩眾取寵，懶有人生哲理。

不過唔講唔知：

- 原來解剖屍體，將所有內臟抽出，事後都會放回原位，除左個腦袋；因為開腦位置在後腦，當遺體躺臥時，腦內血漿及血水會因地心吸力滲漏出黎，所以只會將腦袋放入肚子內

- 解剖溺斃而被水浸至發脹既遺體，當落刀的一刻，會有一股氣及氣味由體內走出，似被放氣的氣球一樣

今個星期會展有個"殯儀博覽"，以為平時逢展覽都有興趣既阿丁會陪我去hea，點知反應極快地：無興趣。

我(再游說)：聽講有棺材訓喎，可以訓住黎反思人生

丁(仍然極快)：我唔想咁快訓棺材喎