最怕貨比貨

下午老好阿Y經過附近，約我地去太古城「王家沙」食晏；裝修後我地都未去過，地方確實係雅致左，但牆上黐上茶壺及杯碟就有點古怪，因為一個黐唔穩，下面既食客唔係被爆樽，而係"爆茶壺"呀。

我同Debbie都頗鍾意食上海菜館既梅菜包，但奈何甚少食市有供應。估唔到新既點心menu有"乾菜肉包"，二話不說call黎試試。雖則算皮薄鹹多兼味濃，但就唔及早前食過世貿「綠揚邨」既梅菜包咁香；Debbie甚至話「王家沙」既梅菜有少少"益"味。

其他點心如茨飯條，王家沙牛肉餅，鮮菜肉雲吞，碧綠素菜包都只屬一般。最唔掂係個"醇香鹹雞"，雞骨多過肉，簡直有點似瘦既臘雞，叫價$58實在有點那個。

時間許可既話，都係打的去世貿食好過。