封箱膠紙不墮之謎

自從路姐話送件低胸大露背比我之後，各方親朋好友好似仲興奮過我自己!!

尋晚忍唔住問當事人，件野後面咁低，究竟佢著唔著到Bra，雖然個答案竟然係無帶Maximizer就OK，但我公司班女好似寧願我唔帶仲好。

同三D (Debbie, Daisy & Damon)食晏時，旁約無人咁討論點樣用膠紙承托個胸，黎著呢件野。

當然用最粗，黐力特強既封箱膠紙似乎最安全啦。但點黐都好講學問。我初初仲以為簡單到剪兩個大半月型(即好似雙眼皮膠紙咁)，貼"南半球"就攪掂。但一向著衫包到上頸既Debbie，竟然話章小蕙教過，要用兩大條膠紙，響肚既位置打交差！估計應該都係要貼埋兩邊"南半球外側"，至有承托效果。

真係怕滅既時候，同時會有脫毛效果添呀。

果然，黐膠紙呢門學問，連物理學都要顧及埋。

在坐既Damon，相信聽住我地呢班"aunties"一邊高談闊論，一邊滴汗！