除夕夜的大買賣

無錯，買樓如買菜既梁師奶終於又出手!!

當我今晚步入屋之際，佢就話比我聽尋晚買左沙田偉華中心一單位比梁大少。我都預左佢勸唔聽遲早架啦；不過估唔到佢結果係2006年最後一晚，公眾假期，第一次睇間樓兼我唔響香港既情況下買。

跟住之後既10分鐘就滔滔不絕咁講尋晚睇樓講價既經過。基本上師奶都係一個講野唔識由重點開始講起既人，我唯有一邊聽，一邊翻雜誌，不時同烏烏交換個無奈眼神；間唔中至有位問到d重要問題：睇左land search未？有無壓經紀佣？幾時過大訂？幾時交吉？有無cash？

據佢所形容，呢間野有d裝修，ready to move in。業主夫婦頗斯文，尋日下午4點多先開始放盤，唔夠3小時就比梁師奶買左。後來佢完成交易至知個經紀係佢識得既教友個仔，話乜鬼叫我細佬要感謝天主喎(呢個絕對唔係重點，可以不理!)

3月8號交吉。睇黎未來佢會忙上加忙，我會慘比親生阿媽遺棄，自己搵飯腳食飯。

相信老豆都會同我諗法一樣：只要佢高興就好。