佩服，佩服

又係"星期日檔案"(我真係呢個節目既fans)，今集標題係「圓我大學夢」；係貼身追訪3位年齡60+，學歷只有小學程度既長者，有8萬蚊唔去用黎享樂，而係重返校園，去嶺南同班後生仔一齊讀副學士。

雖然大學為長者放寬，兩年課程容許佢地五年內完成，而且有電腦同英文tutorial幫佢地銜接課程，但幾個初初由開機都唔識既阿伯師奶，到點樣不恥下問，最終識得用自家剪接既視頻放上powerpoint做presentation，所須既努力同堅持，真係一班後生都未必做得到。

最重要既係：我地讀U係為左將來出路，但對呢班退休後至體驗大學生涯既長者黎講，大學係一個佢地既夢想；讀書唔係為左交換將來生活既安逸，而係真心為左求學。

對於而家視有書讀係理所當然，但又時時埋怨學業辛苦既大學生，睇完呢一集，會唔會有ｄ反思？