高卡秘書宴

尋日完全無為意係秘書節。今日大伙去附近環境平民但鑊氣夠既「炳記」補請Debbie & Kerry兩位。

哇哇哇，食完呢餐飯之後，大家膽固醇一定有所提升：杏汁豬肺湯，豉汁燒鱔球，椒鹽鮮魷，咕嚕班塊，胡椒豬肚粉絲勝瓜，蒜片炒牛柳粒，椒絲腐乳唐生菜，同埋招牌糯米雞！

燒鱔球肉厚一向都知，估唔到個椒鹽鮮魷香口程度達澳門「誠昌」 既水準。平時一定要預定既糯米雞，今日我地早黎竟然有得叫；雖然$240唔平，但起骨釀糯米既手工，加埋出黎效果表皮既香脆真係值回票價。連余經理都一口氣隊左六碗糯米飯！

呢度碟頭頗大，所以真係要人多先好黎食。幾時廖太齊人一於book定個湯同隻雞啦。