清淡vs肥膩

難得下午同晚飯都約左奶奶，不過係兩個截然不同既場合同menu。

上午11:30am正當我趕budget計數計到欲仙欲死之際，阿丁call話出緊銅鑼灣叫埋我食晏。好，誰怕誰，吊頸都要透透氣，所以飛的出去世貿中心「綠揚邨」。

無敵海景，加上奶奶係熟客仔，招呼一定好d。下午比較平，但呢度食物水準唔會將貨就價：丁香雞，雞絲粉皮，素鵝，上湯莧菜，當然有我至愛既梅菜包，竹蔗馬蹄水，同埋滑不留口既豆腐花。

晚上約左另外幾位廖太同奶奶到利舞台「紅螞蟻」黎個小型聚餐；不過食物水準明顯下降左，炸軟殼蟹同魷魚鬚都滴得出油，兼且唔脆!!

其他既雞茸春卷，海鮮叻沙芋絲，鮮茄帶子意粉，同烤鴨胸火炆飯都只係一般；感覺好滯口。只有甜品草莓醬薏米鮮奶酪叫做比較清新d。

始終如一既就係凍到如坐雪房既冷氣，真係唔環保兼耗電。