午飯殺入東大街

今日得3條女食晏，悶悶地玩大d，飛的落筲箕灣東大街試一試新野。

YY係街坊兼地頭蟲，先帶我地去粥棧小櫥黎個$38客飯套餐：

綠豆蓮藕老火湯，菠蘿生炒骨，豉汁蒸桂花魚，魚湯魚肚雜菜煲。

生炒骨真係非常出色，皮脆汁濃，唔會太酸。桂花魚肉多又唔腥，連我唔多鍾意食淡水魚都食得滋味。

飯後再帶我地沿東大街直行，過左地鐵站不遠既呂仔記食糖水。我點既凍腐竹白果糖水非常濃，有d似豆漿既感覺；滿滿既薏米亦值得加分。

呢間舖聞說係做"鮮榨椰子汁"起家，既然係咁，肥死都要一試杯鎮店椰汁；果然係濃得起泡，銷暑一流。

放假既Debbie聽日一定會埋怨我地飛甩佢，哈哈。