家居大閘蟹宴

每年Gigi都會響屋企攪一次大閘蟹宴，今年都唔例外；雖然我唔係十分好此道，但平時無乜機會見到佢，連同Connie & Jeffrey再次殺入大埔元嶺村。

尋日生日既Carton，呢兩日大把小朋友入黎同佢玩。花園十幾架大大小小既車黎個大晒冷，犀利，咁細個就玩密密換車。

屋外又再出動個座地不鏽鋼大蒸籠，非常pro。秋涼坐室外食蟹，別有一番風味。薑茶，暖花雕加話梅，浙醋，拆蟹架生樣樣齊。登登登登，大閘蟹出場！九龍城"新三陽"出品，隻隻重手多膏。我因為拆得太慢，小食多滋味，一隻就夠；其他人當然平均都擺平兩至三隻啦。

除蟹之外，另有肉片炒米粉，Connie買既「西苑」大哥叉燒，同埋陳家多年經驗既招牌作：陳記雞粥！整煲粥用足一隻雞拆肉，有紅棗同花生非常足料，粥底非常綿，好味到無話可說。有幾掂？Connie連隊五碗以表支持，就係鐵證啦。

甜品係：買蟹既贈品，寧波湯丸。

食緊野唔覺凍，但飯後就越坐越涼；終於都有d深秋既影子。