西貢的"好一般"$688海鮮套餐

一向話不投機的阿姨，就算外公仍在醫院都照原定計劃7月1號到香港，與其比佢住砲台山間屋，我寧願佢過埋黎將軍澳一齊住，要收拾一間屋已經嫌太多，兩間屋一定做死我。

原本都係住到月底既佢，改早左機票今日返多倫多；同梁師奶兩姊妹響機場擦身而過。

講真，兩個禮拜下來，同佢既對話應該唔超過廿句；而且我獨霸客廳，佢真係連電視都無得睇咁滯，加上我唔煲水唔洗衫，佢真係連飲用水都要自己買。

話晒都係親戚，星期六約埋梁大少同Sharon，"盡少少心意"同佢去西貢食海鮮。4個人費事諗，就到大街口既「世興」黎個$688四人全包套餐：自選五味海鮮，送多碟菜，免加一。

嫌三嫌四既阿姨，蟹又嫌唔係溫哥華蟹，炸蠔又怕唔新鮮，蒸鮑魚又怕細隻.......結果揀左芝士龍蝦伊麵底，蒜蓉粉絲蒸貴妃蚌，豉椒炒蟶子皇，椒鹽癩尿蝦，同豉椒炒蜆。

味道只係好一般，有點過油，不過碟頭比想像中大，呢個價錢如果唔係食所謂既海鮮，去酒樓應該食得唔錯吧。