幫拖去收樓

Annie杏花邨間樓因為對方業主問題遲左交吉，結果佢咁岩呢個星期去美國開會，我下午就受佢所托幫手一齊去收樓。

除左Annie媽咪，佢個妹同妹夫外，仲有個相熟做裝修既朋友一齊去。

對我黎講，收樓已經係第３次。第一次自己住緊既炮台山單位，因為之後諗住拆晒黎裝修，驗得唔駛太仔細。第二次細佬新都城單位，對上業主簡直原封不動咁比晒ｄ傢俬我地，收樓過兩日死仔包已經搬埋入去住添喇。

今次比較複雜，在於要睇清楚留低既裝修傢俬condition。印象中上次佢地扑鎚時係buy呢度裝修算既finished，執少少油吓油，置兩件簡單傢俬就搬得入去。但今日聽個裝修阿哥講到，好似連木地板，廚櫃，房門都換過晒；比較有ｄ愕然囉。咁當然我唔知佢地係唔係預要執咁多野，唯有提左佢個妹兩句；叫佢有事就Call我啦。話晒我自己間屋當年大執，點都有ｄ經驗既。

裝修比買樓更煩。買樓係計掂條數，land search無問題就ｏｋ。裝修要跟得好足，如果唔係到時收貨時至發覺同原意有出入時，唔通叫人重做咩。