放棄同大閘蟹搏鬥









阿二聽我形容灣仔三湘大廈間東園，$38大閘蟹達至"漏油"既效果，就約埋Upjohn舊同事出黎試一試。

我今季已經食過兩隻，夠啦。每次都同隻蟹搏鬥大半個鐘，未食得完對手已經拆到攰晒。我寧願望住佢地慢慢品嘗，自問真係無心機加耐性今年再拆蟹。

呢間新既東園真係越做越旺。星期五晚連電睇大堂都"行"幾張枱坐滿客；呢間都唔算就腳既酒樓黎講，真係我黎過幾次都未見過。

得五條女，佢地拆蟹都飽一半啦。所以無叫套餐寧願散叫算：片皮鴨2食+薑荵煲仔桶蠔+魚湯魚滑浸時蔬+手撕雞。唔算好多碟，但隻鴨皮ｄ油都足夠叫我呢個weekend要食清些。

有我同阿二在場既飯局，無論係廖太定係Upjohn舊同事聚會，都一定係笑足大半晚。全晚最好笑係，有個男性朋友今日叫我扮阿媽去做電話查詢，理由竟然係我"扮女人聲"會似ｄ.......我要"扮女人聲"???(睇怕真係時候反醒自己既言談，同比人既形象喇；哈哈哈)