梁師奶之晴天霹靂

幫梁烏烏定期沖涼剪毛毛兼修甲既Pet Paradise(隔離新都城一期商場地舖)，因為恒基突然加21%租而被迫結業。對視我細細佬如命既梁師奶，佢話仲慘過比老細炒魷魚！

梁師奶都有間唔中自己同烏烏夏天沖涼，但剪毛毛同修甲就真係高難度。而且烏烏尊貴既英國organic狗糧都係呢間舖先有，呢次真係大鑊。當然附近唔係無第二間寵物美容，但聽講沖完涼後係將隻狗放入個dryer裡面乾，嚇死烏烏咩(我自己聽落都肉赤啦)；呢間阿黃小姐係自己用手執風筒吹乾架。

結果，梁師奶整個下午就同恆基沒完沒了.......無錯，真係唔好睇小一個師奶，尤其是一個愛狗而又得閒既師奶！

佢不停打電話去人地灣仔office要搵經理理論，話唔應該加咁多租，令到新都城無晒ｄ優質寵物美容服務；仲想迫人地秘書幫佢make appointment聽日下午踩上去投訴。我都聽到目定口呆，佢仲叫我幫手寫去壹週刊添呀。不如搵埋區議員啦，好唔好？！

阿黃小姐都係住清水灣半島啫，大不了咪飛的去人地屋企攪囉。再積極ｄ，咪幫人地問埋隔離居屋商場ｄ租金喇，幫人地度埋舖位囉。我唔認為恆基會睬梁師奶呢ｄ咁無聊既投訴。

以前小巴唔比烏烏上，佢打去運輸處都試過呀。為左阿烏，真係乜都夠膽死。

梁大少決定唔撈馬會當日，佢都無咁慶.....