同事飯局之一：順德漁鮮火鍋酒家

Martha話大家好耐無見，難得深閨忙住湊仔既師奶都肯遠遠由沙田出黎，一於叫埋放緊產假既Sinmei同佢老公，不願入鏡既余經理等出黎吹吹水。
剛開始做budget，正在頭大點樣交條咁唔見得人既數出黎，見到已經"上左岸"，唔駛再受budget壓力所苦既YY同Martha時，真係羨慕。

呢度必叫既，係炸得外面香脆，內裡肉滑既油浸筍殼魚；$12兩，呢條斤半就盛惠$288。
其他送飯好菜包括：口感如蛋白的大良炒鮮奶($88)，順德煎藕餅($68)，家鄉醬燒骨($80)，豉油皇蝦($98)，啫啫生菜煲($55)。
比較淡口既，係排骨蒸陳村粉($68)，同羅漢上素($60)。
其實同事生日飯，都係晚飯好過食晏；話晒大家出黎吹水都唔駛趕頭趕命，而且食市選擇闊好多，唔會侷限於太古坊範圍。