下定決心

呢年來肥左好多，連自己都覺慘不忍睹。梁師奶鬧鬼我無事淨識煲日劇，以前都還有去gym做少少workout，家陣只係食訓係度比人按摩。

都岩既，既然戒唔到口，唯有想辦法去消耗。

去d如Physical般要交月費既，如果只得weekend去，計落點都唔化算；加上要再花時間travel去，倒不如到梁師奶樓下會所，有全年無休既室內暖水泳池，住客每次收費$15(月pass要$200，因我唔會日日游，計落無so)。寧願續次計，每個weekend游足兩日都係$120。更有簡單既健身室，每次$18。

應該游水會見效快些少，唯有犧牲個二千元直髮，減磅要緊，六月喪食之旅迫在眉睫，要預留空間去食松島蠔，仙台牛舌，同米澤牛。

壽包餞別？

聽日係YY，Wylis同Candy三個finance同事last day，今晚大家夾錢響公司後面「東海」為佢地farewell。

雖然唔係全公司都到，數落都有兩枱，而且久未見面既舊同事阿階同Mike哥都有出席。

$2580既魚翅鮑魚宴，味道一般，聽個menu都無乜期望：

鴻運乳豬拼盤，發財蒜子柱甫

富貴金錢蝦，煎焗鮮鮑魚

紅燒雞絲生翅，上湯竹笙扒時蔬

清蒸老虎班，醬油脆皮雞

長壽伊麵，雪裡紅蒸餃子

拳頭咁大既原隻鹹蛋黃壽包

比較另類既"合時甜品"：白糖糕，紅棗糕

放長假後既YY已經plan緊周遊列國，真係歎；以後少左佢呢個飯腳，越見冷清，哎.....

舞吧！昴

未上之前阿二猛話想睇呢套戲，今朝先睇完松山研一既tragic death，感覺有點heavy；決定換換心情，下午到MCL將軍澳睇2:45pm。

原裝漫畫出左好耐，但從未租過黎讀；不過都估到八九不離十，都係以跳芭蕾舞達到夢想既勵志片。

女主角黑木美紗以往日劇只做開花瓶，但沒有芭蕾舞底子既佢，要用腳尖跳撐得起，都應該下左一番苦功。

守財奴：松山研一

超級型。

雖然唔算得上靚仔，但勝在夠高，演乜都入型入格。

由度身訂做既"L"，到大玩死亡金屬既"爆粗Band友"嚇人搞笑造型，到剛播完既新一季日劇"守財奴"中，因兒時太窮而諗埋一邊，為錢變成攻於心計既殺人犯......奸得好鬼型，尤其係左眼既一道大疤痕，加上時而陰深既眼神，係繼木村之後，另一個好戲之偶像。

套戲一路追落黎，都頗有張力，今晚必定睇埋佢點收場先訓。

這部劇講述一位名叫蒲郡風太郎的青年，少年時期母親因貧困而死，導致他成為極度拜金主義者的故事。這部娛樂性的作品描寫了主人公一邊在充斥著金錢的世界裡掙扎活著，另一邊又對「幸福在哪裡」一問感困惑。

Marinda的競敵

Promoter阿姐Joyce今日上黎office，帶來一盒手製卡通公仔頭曲奇，令所有女生攤晒出黎續個揀。

呢盒唔係Joyce自製，而係佢個朋友送左數盒賀佢生日，而Joyce好好人地留番盒比我地。

硬盒響深水埗現成買既，內裡廿多三十塊卡通造型曲奇：阿Pool，條條虎，史迪仔，叮噹，Kitty等；四種口味：有牛油，朱古力，綠茶及芝麻。

製造者係一個家有兩個幼童既師奶，正打算part time造曲奇賺外快，都係嗰句：交收便利程度同定價都係吸引生客既主因(當然assume味道OK啦)。

尖沙咀「新羅寶」

Connie一向係「新羅寶」既擁躉，最近VIP推出優惠，食滿$600即減$300，所以夾岩時間再約埋"藥業聯盟"(政府+私家醫院藥房+藥廠，即係我，哈哈)出黎飯聚。

呢排醫院藥物頻頻見報，醫管局高層如驚弓之鳥，佢地藥房既工作量推到極限，"窗內"風光跟我地呢d打"窗外"工比較，都唔好得去邊。

位於美麗華中心4/F既「新羅寶」，地方比利舞台寬敞。論小缽涼菜款式，比起太古城既「哈魯邦」遜色好多。

話就話有優惠，但人多加上點燒烤食物，有折扣都要$1400，唔算抵：

魚饅頭($132/8pcs)，用魚肉做皮，內有野菜雜菌碎；炒雜菜粉絲($86)

海鮮煎蛋包拌盤($110)，韓式豬手($178)

鮮牛肉自製麵($230)，雜錦野菜籃($72)

烤鮮特大牛排骨($255)，烤牛脷($95)

烤鮮特級肉眼($168)，烤鮮帶子($130)；雖則話有侍應代燒，但佢只顧放又唔睇火，結果帶子縮到差點變貝柱，徙晒。最透心涼係附送既凍薏米糖水。

Farewell Lunch for Finance

下星期就last day既YY，Wylis及Candy，今日下午CHC先同佢地黎個farewell lunch。

服務左廿年既YY，呢幾年更主力幫我地睇住盤數，收住個尾門；加上係長期飯腳，家陣連Michael都經常有愛心飯盒，睇怕將來都係我同Debbie撐枱腳多喇。

雖然下午傾盆大雨，都行左去太古城中心新開無耐既「鍾菜」飲茶。

點心碟頭細兼價錢唔平，唯一比較特別既係內有菠羅肉，名附其實既"菠羅包"；甜品竟然有西點Creme Brulee，雖然略甜，但幾有質感。

地鐵Roadshow：Set Up

聽朝開始一連兩日，響灣仔地鐵站擺度骨機及roadshow。

今晚9:30pm開始set up，我就資源增值到連收貨都撈埋。10pm裕利送貨黎到，我代promoter點收，鎖好入櫃理應可閃人，但一場黎到，點可能唔順便監督埋班師傅砌好個架步呀，結果咪一直留到差不多12am，去站長室借埋個重型滅火筒先走得。

聽朝仲要7am前到，交低幾條鎖匙比promoter，順便幫手派派傳單......