玩神秘

商場內發現新置了一部自助購物機，只賣一隻稱作"神秘髮尾修護品牌"的產品，$4枝，所有收益捐贈香港紅十字會；既然平平哋又係做善事，買嚟玩吓無防。

哈，原來喺Pantene；都有成50ml，有創意有抵玩，讚！

婆婆下午茶

商場二樓的"上海婆婆"一向都多人排，閒日放假等到2pm落去食個下午茶餐，反正橫風橫雨無得去西貢。

婆婆擔擔麵，素菜蒸餃(2只)，豆漿($32)；加$10可以跟款小食，清清地點了素鴨。好好食又講唔上，但免茶免加一都算抵食。

Creamy Cow

之前聽過Circle K出左新雪糕，取代之前的軟雪糕。下午經過買了杯($7.5)，質地比較實，好滑就唔算但奶味香濃。

收銀旁有自助加sauce站，三款醬(Caramel, Strawberry, Chocolate)任君選擇。概念新鮮，但收費同老麥的新地相約Size只得其一半，定價有點貴。

簡單意粉

連食左三餐Cereal，連我自己都頂唔順，放工walk狗後早點落樓下的"簡單櫥房"嚟個pasta晚餐。

香煎帶子幼意粉配黑松露菌乾蕃茄汁（$72），帶子唔係熟透，所以算滑，份量唔算大，好快擺平了；加Opera切餅（$15），唔太甜，當然亦唔夠朱古力香，但感覺無咁罪惡。

月亮Ear Phone

今朝出版的"新假期"，$40特別版送幾米的"月亮忘記了"ear phone，雖然我個個星期都有新假期的complimentary copy收，但見製作幾精美，忍唔住也買了。

反正耳筒睇PMP或電腦都有用，當然音質就唔好巧究了。

City Hunter

比起去年的包包臉，瘦返了的李敏鎬演呢套動作片真係型到爆！

冇花樣男子的鳳梨頭，亦冇個人趣向的騎呢吊腳西褲，衣著同髮型回復基本先發揮到佢既俊臉同高挑身材。

一口氣殺了5集，戲內塑造到佢好打得，幸好身型高都唔覺笨拙，如果換了差不多身高的元暢，手長腳長會顯得唔協調。

UNIQLO

"Save Japan!" Tee

又有賑災tee，今次係UNIQLO連同幾位名人如Lady Gaga, Nicole Kidman, Gwyneth Paltrow, Victoria Beckham, Cyndi Lauper, Orlando Bloom等，設計一系列的白tee，件件$129，預計賣衫錢可以捐一億日圓去賑災。

齋論design而言，碧咸嫂的設計簡約得嚟算最靚，但個人對呢個"辣媽"無好感，所以買了Nicole Kidman和Gwyneth Paltrow兩位女星tee支持吓。

迷你冬瓜盅

週六Annie過嚟借地方溫書，乘機拉佢落去"一粥麵"試我想試好耐的迷你冬瓜盅套餐。那個冬瓜盅真的是BB size，料唔多(預咗)，偏淡口。跟餐可以選碧綠菜膽上湯雞，或荷葉飯($50-$52)，份量唔細，算抵食。

隻雞好滑好夠味；荷葉飯就較乾身同淡，如果怕肥的話其實係好事。

加多$6跟杯楊枝金露冰，都算係咁。

見附近差不多枱枱都有點呢個餐，早啲落去晚飯既決定係啱嘅，免得售罄就掃興啦。

週五星巴克Happy Hour

星巴克近排週五都有攪作，呢幾個星期的Friday Happy Hour大玩Mini Cake 50% Off!

但凡週五3-5pm，買手調飲品可以半價買兩件迷你蛋糕。週五獨家，款款半價後$8/件，平時見唔到呢d款：

綠茶紅豆卷，藍莓Cream Puff；雖然兩三啖食完，但頗有新鮮感。

團友探監

呢兩個星期都有唔同既朋友入黎寶琳探監，一號風球下，入黎既係團友Connie，Jeffrey和放假中的Joe。

Connie很想食冬瓜盅，不過佢地咁遠入黎真係去"一粥麵"食迷李冬瓜盅套餐好似有點那個，所以到附近的"名悅"正正經經點個大一點的，加幾個小菜晚飯。

$88的特價冬瓜盅，唔算好大，用料一般，每人都有兩碗左右。

沙律鮮脆班球($68)，大大pat的沙律醬好敗筆，點解唔用鑊兜勻一點？

花膠玉掌煲($88)，魚湯雜菌時蔬($48)，荷香籠仔金華蒸滑雞($68)；味道不過不失，閒日人唔多，所以坐得舒服。

飯後帶佢地上去Club House繞了一圈，指得動作當然係帶埋烏烏送佢地落去兼say個hello啦!!

一號風球的戶外午餐

尋晚橫風橫雨，諗住今日放假都應該係兩姐弟屈響屋企，點知今日雖然天陰有點風，但無落雨！好，再帶烏烏去西貢食晏。今次試了同一個公園仔的另一間：Grande

抱住烏烏響膝頭，唔可以點要吓吓刀叉切的，所以是日午餐黎個Lamb Stew。

大大兜洋荵湯，香草麵包，摩洛哥燴羊配沙律及中東烤包，咖啡($75)；份量比預期中大，唔算貴。

童星新口味

日本311後都無買過老好點心麵，雖然輻射依然日日漏，但同烏烏經過廣良興見有入了新口味，都係敵不過這個老朋友的召喚，買返去"看門口"。

和風醬油Steak味($14)，聲稱添加了松阪牛肉；又謂此乃今年大河劇主人公"江"童年的三重縣風味喎，真係夠晒gimmick。食了半包，味道只覺醬油味。

另一款係Sicilian Rice($15)，但點解呢個唔係意大利名物反而會係左賀名物呢？

齋口齋不了心

早午餐已經是Special K+All Bran+2pcs黑麥包(梁師奶剩在雪櫃的)，雖然飽肚，但到了晚上游水前，內心爭扎了數分鐘，應該落去樓下黎個嚮往已久的"迷你冬瓜盅+(萬惡的)荷蘭飯"套餐，還是清埋雪櫃的一大盤菜芯........

唉，結果個心催眠自己食跟荷蘭飯，個口就隊了整磅有機菜，雖然健康高纖，但很寡嘛。

西貢食個晏

終於等到太陽伯伯蒲頭，兩姐弟中午冒住30多度高溫加超高UV，去西貢食個晏，等佢唔好變一隻悶狗。

帶佢落地行一陣就熱到伸晒俐，閃入星巴克近門口位置歇一歇先；好彩閒日人唔多，可以坐室內都無人干涉，只要唔好咁揚。

午飯當然要揀室外，上次同Shirley/Charlotte去過的SAUCE，有帳篷遮蔭又有風扇對住吹，都唔係太熱。點了的Lunch Set: Vegetarian Minestrone, Seafood Risotto, Iced Coffee ($80)，閒日無乜客黎講唔算平；那個海鮮意大利飯有大大隻的青口，帶子，魷魚等，口感不錯，抱住阿烏也容易食。

飯後要趕返去，因為放假的沙律入黎會所玩按摩椅兼碌lane，烏烏都爽啦，咁多姐姐入嚟探佢。

探監飯局

要留守梁師奶家中兩星期，週末都宅在將軍澳；父親節YY同Ophelia入黎探監陪我晚飯。今晚周圍都係人，訂位都唔易，最簡單都係早點落去金滬庭，起碼唔駛點等。

夫妻肺片，花鵰醉豬手，沙鍋雲吞雞，糖醋魚柳，三絲冷麵，麻辣羊肉串；3個人食6碟野，唔係淨好多都算係咁啦。

飯後上樓探烏烏，但佢個衰仔一見到Ophelia就發晒姣要un，嚇怕兩位攪到我要全程抱住呢隻慾火焚狗身，但又閹左既細細佬，真失禮！

Photo Grid

在Android Market download了這個Apps，雖然唔係啲乜新野，但無帶相機在身又想即時share今餐食乜餸，真係幾方便(除左要去shake啱個砌圖，每張相片調較大小位置等得花一點時間之外)。不過相片質數只屬一般，要黎簡單交代一吓還可以，個人還是覺得用相機逐張po，食物看起來會較吸引。

今日的午晚餐，也來拼了個圖；雖然兩餐的味道也只係一般。尤其是Sogo地庫的銀座梅林Jr，那個所謂的特價手夾炸豬扒包($20)，其實只係切了一細條炸豬扒夾在白方包中，計落一啲都唔算平；而且味道只係吉之島的food court水準。

49天

兩個星期宅在家最好就係煲劇，清一清手頭上越積越多的日/韓劇。

清左麻麻地的"我的公主"後，開了呢套Annie極力推薦的"49天"。

故事有點另類，但以韓劇而言很有新鮮感：交通意外陷入昏迷的女主角，因時晨未到，死亡使者比佢49日可以依附另一渾噩而活既女子身上，要找到3個真心為佢流眼淚既人先有復甦希望。當然過程中會發現，原來本以為深愛自己的未婚夫同好友，都有不為人知既一面。

雖然一眾男女主角都唔係一線演員，但整體感覺幾好，如果節奏可以快一點更好。

兩星期的相依為命

尋晚已經要睡入將軍澳，因為梁師奶今朝好早要落樓搭機場巴士，而我要幫佢拿行李上車，免得佢再整傷膝蓋。

第一天入營，放自己假同烏烏互相適應。本來諗住帶佢出西貢嘆個戶外午餐，等佢cheer-up少少，點知天公不造美，整日落雨都無乜點停過；唯有宅在家大半日，下午帶落樓下商場逛了個半鐘補數。

梁師奶雪櫃內有兩盤尋晚煮的菜，及三包未煮的菜，生怕我懶到唔落樓下買有機菜比佢個心肝仔食，但買咁多，邊度食/煮得切呀？壞左都未食得晒。

在樓下百佳入了Special K+All Bran，將會係呢兩個星期既主要食糧。

Farewell Elsa

Elsa係我地logistics既同事，幫我解決左最討厭既SAP supply network planning部份，但好景不常，工作晚晚超晒鐘既佢，終於都遞了信。

今日早一點我們division同佢去Harbour Grand的Le 188黎個farewell buffet。

南瓜湯好creamy；生蠔細細隻，但好新鮮。
主菜：燒鱈魚配馬鈴薯及刁草白酒汁；燴羊膝配忌廉玉米餅，燒茄子及迷迭香汁；烤美國西冷配焗法式馬鈴薯，忌廉磨菇及紅酒汁

甜品：各式macaroons，Movenpick的香草及草莓雪糕，朱古力麵包布丁

利小館

見到時代廣場地庫開了這間利苑的Young版店一段時間，見網上口碑唔錯，襯未入營，約左Sandy，YY及Ophelia去試試。地方唔算大，好彩我地有卡位，唔覺得太迫。

價錢以銅鑼灣晚市黎講唔算貴，只是碟頭亦唔算大；不過全女生的話，應該夠食。

飄香荷葉飯($65)，四喜烤夫($45)，花鵰醉雞($48)，青芥末汁伴螺花($46)，蠔油北菇扒津白($48)，蜜汁火方配蝴蝶包($88)，湖北黃金蝦($75)，蝦肉好彈牙新鮮；甜品：栗茸焗布甸($22)，蛋白杏仁茶($20)，始創楊枝金露($22)