突然半日

告左既假，仲有4日未放(未告既我都無眼睇)，努力清假中。

本諗住聽日放下晝，Keith今朝爆料話阿Paul呢兩日喺台灣，佢個itinerary寫左聽日係"Hong Kong Office"......

我呢個來無蹤，去無影既老細，時時鍾意同我地玩"估你唔到"；既然今次行蹤洩漏左，我唯有自己改假就佢囉。變左返去清一清Emails，同裕利開個短會(都唔駛我點再講，成功幫公司慳番30幾萬)，又返屋企繼續煲劇。

虞家媽媽









返到去匆匆洗白白，再出老銅約左Annie & Connie下午茶。

本想帶佢地上去After School，但3pm實在太早未開。唯有過對面利園2期地庫既「虞家媽媽」tea一tea。

以前只經過外賣食品部瞄左一瞄，未入過裡面食野。我地3條女叫左碟炒得幾夠味既"虞家媽媽新竹米粉"同English High Tea Set for Two。環境夠靜，不停幫你refill咖啡，真係斟到你飲唔落為止。









今次輪到聽Connie呻，不過佢一年可以出外度三五七次假減壓，羨剎我呢個有假但無得放既「惠氏阿四」。

東京和食

本來身水身汗諗住拿拿臨返屋企洗白白，梁師奶竟然自己提議一齊食個lunch......好，就去時代廣場13/F The SUN囉。

唔係唔想同佢出去食飯，但我同細佬真係同佢無偈傾。有ｄ親戚反而氣氛會自然ｄ。The SUN上年帶過佢黎一次，魚生佢就唔會食喇，釜飯就OK既。









我地差不多係第一枱客，已經將佢會聞到煙味既機會減到近乎零；無謂再節外生枝啦。

3個墳場7個墳

今次以破紀錄2小時內完成呢個壯舉。

6點多起身，7點出去電氣道街市買花，仲有時間去Starbucks隊杯啡，先坐116去鑽石山。

9點，梁師奶同堂妹梁慧蘭已經上到去。仲好efficient咁搵到「山狗」叔叔幫個墳ｄ字上色兼除草。如果唔係梁師奶怕周圍ｄ燒衣味左彈右彈，呢ｄ咁簡單既野，我一定DIY(反正連cement gun補墳我都玩過，有乜難到我？)

鑽石山拜過太嫲之後，飛的過黃大仙法藏寺拜二伯，最後一站當然係重點長沙灣天主教墳場：一次過拜晒爺爺，嫲嫲，堂大嫂，仲有今年梁師奶搵番佢自己既外公外婆，舅父舅母。

嫲嫲個墳最近山邊，通常最多野攪就係佢，有一年仲有成個蜜蜂竇我攪唔掂要call漁農處幫手，今年好少少，只係有個蟻竇；梁師奶同梁慧蘭又行得勁慢，佢地上得黎我已經將個蟻竇殲滅左。

好彩有個堂妹entertain住梁師奶，我可以安心自己行快兩步攪掂晒，等佢地拜完即閃。唔駛11點已經大功告成落山喇。

避世中

因為今日仍未能洗頭，要留喺家中避世。

好在我都唔係要日日躝街既人，只要有電腦，小說，DVD同零食，盡量足不出戶，有幾難？(當然去Starbucks上電，同夜晚要去梁師奶度開飯都要在蓬頭垢面中暗地裡進行啦)

仍然努力煲「宮」中，套$35 DVD有埋英文字幕(其實仲有粵，國，韓語+簡繁中文，英同日文字幕添；勁！)，所以會寄套去多倫多比竹昇表妹。

Moleskine 2007 Pocket Weekly Planner












Citysuper等左好耐都斷貨，反而今朝Sogo Club bookstore比我搵到。

上年買左本，用到而家，勁好用。黑色硬皮，寫得多野，實用性強。Down to the earth設計。我唔理以前邊鬼個名人鍾意用，但對我黎講，係袋內唔可以少既配件。

滿江紅









以前阿二suggest過，但一直都無約過去試。結果今晚同阿卡生&佢老死Amy一齊去晚飯。












佢地兩個都食得辣，我初初仲怕會辣到似麻辣火鍋咁，變孖閏腸咀。但turns out唔係想像中咁辣，而且盤鋪滿辣椒既"水煮魚"仲整得幾滑添(可惜太大盤，3個人真係食唔晒)。

頭盤多謝Compass信用卡有個辣粉皮送，完全唔辣但賣相亦唔靚既半隻醬茶鴨，賣相好似好辣但唔食d辣椒都ok既水煮魚同涮羊肉，加多瓶暖既"加飯酒".......對從未食過四川菜既我，算幾新鮮架。

好彩卡生訂左位，唔駛等好耐。滿座之餘樓面侍應明顯不足，但勝在有件皮膚靚到我同卡生爭持左一陣佢到底有無揸粉既烏魯木齊肥師奶serve我地，笑容搭救啦。

More pics at space: http://glorialeong.spaces.live.com/

又放低二千大洋
呢間每半年就要我自動獻身，去坐5小時同放低$2000+既地方：Sogo Club 15/F Hair do Salon

真係多得梁師奶唔少(擺明係賴架啦)，天生捲髮既我，唔黎好似定時食藥咁執番劑"負離子"，簡直唔見得人。其實剪髮($320)同pre-ION treatment($250)唔算貴，係劑藥要成$1600比出面貴少少。

但我寧願用d錢黎整直佢，都好過徙$2000plus做highlight+tinting啦。

聽日唔洗得頭，一定要痞響屋企避世!!

Free Lunch & Free Drink

Long weekend前夕，勁多工作堆住黎；自動自覺7點多返工。

Centrum/Caltrate明年新雜誌廣告，要遞去做regional approval；拖無可拖，唯有成朝默默無言埋頭苦幹。

正想出去黎個quick lunch之際，剛出外開完會既Hudson哥電話到，好，見十年唔逢一潤，飛的出銅鑼灣The SUN食個晏兼吹吹水。升左做"ger" grade既佢，果然係唔同d，唔駛趕頭趕命仆返去。呢條友，預早約佢難度極高，鍾意玩ad hoc。自己份人比較鍾意有planning，初初好唔慣；三年落黎，變左係我adapt佢既style；至可以坐低食餐飯。

食完個free lunch之後，臨放工卡生call到。襯佢未夠時間同班舊同事去"烚吓烚吓"，落去Einstein黎一round house wine。星期五晚既太古坊樓下會有live band，一旁既bar都堆滿人；同平日入夜後既冷清差好遠。卡生剛剪左個超短髮型，同ｄUS troops有得比；勇氣可嘉。

今晚梁師奶飛我無飯開，但已經飲飽食醉，繼續我既煲「宮」計劃。

終於都知蝕左比邊個

屈記discount壇野仲有下文，之前計過將佢改制而要蝕既錢減到30多萬，但始終可以一個先都唔駛蝕先至係我既使命!!

先後同裕利sales，operation同惠氏自己既finance傾過，下午輪到對方企得最硬既裕利finance。佢地Finance Manager Ada係我隔離鄰社，我住Ｃ座佢住Ｄ。不時返工都會喺地鐵相遇，所以比其他既裕利department heads熟落ｄ。

同余經理坐喺佢地凍到好似雪房既會議室，話題來來回回響free goods, discounts, commercial, bonus, inventory, 數期度打轉......大家都越講越亂。個多小時大戰十數個回合，決定各自返歸再苦練武功；擇日下星期二再比試。

返到過去同余經理再切磋切磋，用一個簡單ｄ既例子計一計，頂！！！原來嗰30幾萬唔係蝕比屈記，而係蝕響裕利既commission度。

有時我會偏向於將堆數字複雜化左，自己confuse自己。反而阿余經理唔識複雜既邏輯，但佢簡單既理論先至點醒左我。

學阿Debbie話齋，我地兩個應該結婚；哇哈哈。

蝴蝶飛了 - 大S
正路我係唔會買大S既書。無錯，呢本書唔係買既，係上個月阿路姐借我，家陣先開黎睇。

與其話係書，應該話係畫冊+詩集就真。

畫係Anna Sui既原創設計師Rachel Williams畫既Penny Dreadful，風格非常gothic(亦都係路姐點解會借比我既原因)；只有黑同紫兩隻色。

詩，當然係呢個大家都唔多like既大S所寫。差，唔講得。但充滿絕望同無奈，好配合ｄ畫既mood。

"有時候快樂是假的
可以用藥物控制
有時候悲傷是假的
可以自導自演這齣戲"

"你是一顆寶石
因為看不見自己的美麗
所以自慚形穢
你是一灘污泥
因為聞不到自己的惡臭
所以自鳴得意"

"心變小了
所有小事情
都變大了"

整體唔算差，但因阿路買既係大陸簡體字版，雖然識睇，但感覺有ｄ怪。

放假唱Noon K

Carol今日生日。

上星期本來告左3日假既我，因為Martha要bed rest所以無得放。佢今個星期返番工，所以乘機放自己一day假，同Carol & 波蘿包去佐敦恆豐隔離Neway唱noon K。

每人個餐連杯drink都係$35，可以唱12pm-2:30pm(其實佢地今日成3pm先熄機)。雖然食物同上次黎差好多(都係lunch，唔通週末同weekday有分別既？)，但咁既價錢，都好難再去挑剔喇。

音響好過上次去既「揸兜紅」好多。

波蘿包近排教女教到把聲勁"策"，所以都係我同Carol包辦晒ｄ歌。新歌真係唔多熟，係時候應該惡補吓。

紅螞蟻

叫梁師奶"食屎"既後遺症，就係我今日要食自己。

本來佢義工度有個婆婆今日做白內瘴手術，唔知要陪人地到幾時，叫我放工去攪掂烏烏既晚餐。下午打電話稱自己安排到時間，叫我唔駛返去。所以都唔知係仲嬲緊，定係真既安排到。唔理啦，你咁大個人；我都唔興問長問短。









結果臨時下午"班馬"叫左幾位廖太陪我食：奶奶，阿丁同阿二。

利舞台對開「紅螞蟻」。

唔知係碟頭細左，定係我地胃口大左，抑或持住自己有9折卡忘形左，都唔少野架：鹹魚雞粒火炆飯，辣味大蝦帶子天使麵，北京烤鴨荵油薄餅，酥炸雞軟骨，涼伴海蜇，朱古力布甸，海藻雪花糕，雪花糕黑糯米.......

終於聽日都可以放番日假，今晚開套「宮」先........

不歡而散

有時真係覺得梁師奶好難頂。

一見到細佬今日著件白恤衫就頗有微言；話無理由咁著去探病。(大佬呀，男仔著白恤衫好平常啫；唔通著到紅噹噹去飲咁咩)

另外佢永遠都唔會簡單回答你既問題：

例一 (6pm正想排隊搭的士之時)
細佬：到底仲要等邊個？
梁師奶：你話香港仲有邊個親戚會去探病呀？
你可以好簡單答話我另一堂妹Grace咪得囉；點解只係有一個名唔答，要將個答案變成反問句？!

例二(病房門外)
細佬：港安到底係政府定私家？
梁師奶：要成$600一晚，每樣野都另計，你話係政府定私家？
又係一條本來可以答"私家"，但又變成一句極唔客氣既反問句。
大佬，一般市民，未必識得晒邊d係政府，邊d係私家醫院。細佬都係多口問句啫，你吓吓一句"Dut"埋黎，邊個仲會同你make conversation？

到行出醫院，我只係閒閒問佢想去邊度食飯？不如去"迎囍"啦。
梁師奶：唔係去食大餐呀？我唔得閒喎。
我(忍住)：咁你想去邊？如果趕時間既話，各自食囉。我返屋企食Starbucks都無所謂。
梁師奶：去"迎囍"食ｄ乜？(你唔係呀，又唔係未去過。中式酒樓唔通食DA牛咩？)
我(再忍住)：你鍾意食乜咪食乜囉。
梁師奶(竟然仲問)：去"迎囍"到底食ｄ乜？
我(真係忍無可忍，但都用一個平靜既語氣答)：食屎啦，好唔好？

當然結果係的士一落返時代廣場就各散東西。最可憐既係梁大少，山長水遠返沙田或要食自己。

我當然係無乜禮貌，但亦都好同情當年我Daddy響加拿大同佢朝夕相對16年。

人地仔女請父母出街食飯，都會開心肯抽時間陪佢地。點解梁師奶永遠都要無論你講乜，佢都話唔好？

探病

放工即閃。6pm出到時代廣場約埋梁師奶同梁大少坐的士上港安探五嬸。

週末home leave之後，今日再入去抽多次肺內積既血水。我就真係自兩年前佢去醫院探我Daddy之後，我都無見過五嬸。一向都唔係肥既佢，更覺瘦弱。因為唔想成日抽水要佢咁辛苦，醫生索性喺個肺度插喉，一有水就會自動抽出黎。見到條拇指咁粗既管仍然有ｄ紅色既水跡，真係有ｄ難過。

一間房三張床，望落去算迫。梁生當年瑪麗私家房(雙人)比較闊落，同埋個view風涼水冷ｄ。不過起碼都每人床尾一部電視仔，有精神睇既話都無咁悶。得一張膠凳，連one-sitter梳化都無；要陪過夜坐足一晚都好有難度。

去到得堂家姐Anna兩夫婦響度。我襯梁師奶入左去慰問五嬸，同Anna講左一陣應否落化療或試ｄ新但aggressive既療法。其實一切都係取決於到底呢個stage (Stage 4)，對現有化療藥反應係點。如果成效不大，而且side effects會影響病人既quality of life，點解仲要響僅餘唔多既日子裡面提早要佢辛苦呢？As仔女既，應該積極去問多兩個腫瘤科醫生既second/third opinions，然後交比病人自己決定落唔落藥。

動唔動刀，落唔落藥呢個難題，我兩年前都遇過。

動刀既話(當年梁生，五嬸呢個case唔適用)，係唯一有希望生存既機會；但老人家十多小時既vital organ大手術，挨唔住既話就即時無架啦。

落藥既話，副作用必然令病人辛苦(因為化療藥其實係毒藥，唔係點殺癌細胞?)，而且提早進進出出醫院。但連藥都唔落，係唔係坐以代斃？

對病人同家屬黎講，係一個好難既決定。

惠氏出菊花茶？












真係怪事年年有，今年特別多。

剛才有個師奶打黎問：惠氏呀，你地係唔係新出左隻「明目杞子菊花茶」呀？

我(一頭霧水中)：我地係惠氏藥廠喎。

客（理直氣壯地）：我知，我剛收到你地既宣傳單張，話你地出左隻「明目杞子菊花茶」呀嘛。

我：但我地賣藥，唔出飲品架喎。

客：我諗我應該打去奶粉部問吓。

見個客講野有紊有路，唔似白撞；一收線就打比YY求證。

原來惠氏奶粉剛改良配方，加左對眼有益既Lutein。Direct mailing就夾左包明目杞子菊花茶落去做贈品；結果個客完全click唔到，以為包gimmick就係新產品！

佢地marketing都算失敗喇，笑得我差ｄ連電話都跌埋！

狂K「深情密碼」

答應左借套碟比廣告公司既Ebby(佢都算係半個仔迷)，襯weekend一口氣煲埋收檔。

大半日黐著張梳化，做名符其實既couch potato。半坐半訓既姿勢，數個鐘頭落黎，真係脊骨都有d痛。好彩5pm book左1 part body massage頂住。

仲有4集，今晚同佢拼了。講真後來有d婆媽，同個故事有d拖。

可以既話，今晚(應該話係聽朝先岩)想開埋套阿丁同Connie都話好睇既韓劇「宮」。

無常

如果只剩下4星期....

生命中所有既野都會突然變得好重要：未完成既事情，未兌現既承諾，一直想去而未去既地方。

以為自己仍然有時間，以為會有好多個“日後”，結果原來剩下既時間咁少，想做既野仲有咁多。

講既唔係仔仔「深情密碼」既情節，而係早兩日剛由溫哥華返黎醫病既五嬸。

末期肺癌。已經連CT Scan都唔須要照，化療亦都唔會做。個肺抽左兩公升血水出黎，比佢返屋企home leave；下星期返黎再要抽多一litre。加拿大既醫生話，大概只有4星期；要好樂觀至會有機會挨到半年。

一個月前，佢仲係一個沒事人一樣，約左梁師奶去「聘珍樓」飲茶......

梁師奶今朝去左港安醫院探五嬸，佢本人只係默默流眼淚，尚算平靜。反而我堂大佬喊到出唔到聲.....其實佢兩年內經歷老婆同自己阿媽相繼患癌，望住親人受苦而自己無論有幾多錢一ｄ都幫唔到，我好明白佢要再次go through呢段艱難日子既感受。

想做既野，真係唔好等。

活在當下，共勉之。

午餐下半場









食咖哩中途阿二約左奶奶又響老銅lunch，正餐食唔落喇，甜品就"誰怕誰"！

同Charlotte轉戰「麻布茶房」。叫客自4月台灣Ice Monster之後都未食過既"芒果鮮奶刨冰"。

食冰係我強項，唔駛5分鐘就可擺平一盤(小朋友唔好亂學，叔叔係有練過架；哇哈哈！)

夏威夷+多倫多手信篇 （感動ing......）

Pineapple giant PRETZ & 16oz (Grande) Hawaii tumbler











Canadian Maple Syrup(楓樹糖漿) PRETZ











Hawaiin Starbucks Debit Card
好似我喺台北買嗰張咁，裡面可儲面值，每次去當地Starbucks買咖啡，都可以扣錢。

Charlotte既朋友做當地既Starbucks，所以幫我拿到無面值既"香艷夏威夷版"同"保守多倫多版"(見上圖左下角就係)。

渴左好耐既「南亞」咖哩

上次同Connie去「南亞」無叫到招牌咖哩，一路都心癢癢想再去食。

Charlotte剛從加拿大度假返黎，做完body massage就坐小巴落禮頓道「南亞」整個咖哩牛腩飯+海南雞飯。 牛腩唔夠諗，都係尋日卡生帶我去側魚涌街市一檔既牛腩正好多。

佢去左兩星期多倫多+夏威夷，唔知係唔係心理作用，好似曬黑左ｄ。












哈哈，除左佢幫我買左Whitestrip同Valerian capsules之外(加拿大真係平好多)，最流口水既，就係我至喜愛既當地限定百力枝同Starbucks tumbler做手信！如果係我blog既忠實讀者，唔難發現，買手信比我其實好簡單：我只係想食齊各地味道既Glico Pocky/Pretz，同買收集印有城市名既Starbucks tumbers。

放棄同大閘蟹搏鬥









阿二聽我形容灣仔三湘大廈間東園，$38大閘蟹達至"漏油"既效果，就約埋Upjohn舊同事出黎試一試。

我今季已經食過兩隻，夠啦。每次都同隻蟹搏鬥大半個鐘，未食得完對手已經拆到攰晒。我寧願望住佢地慢慢品嘗，自問真係無心機加耐性今年再拆蟹。

呢間新既東園真係越做越旺。星期五晚連電睇大堂都"行"幾張枱坐滿客；呢間都唔算就腳既酒樓黎講，真係我黎過幾次都未見過。

得五條女，佢地拆蟹都飽一半啦。所以無叫套餐寧願散叫算：片皮鴨2食+薑荵煲仔桶蠔+魚湯魚滑浸時蔬+手撕雞。唔算好多碟，但隻鴨皮ｄ油都足夠叫我呢個weekend要食清些。

有我同阿二在場既飯局，無論係廖太定係Upjohn舊同事聚會，都一定係笑足大半晚。全晚最好笑係，有個男性朋友今日叫我扮阿媽去做電話查詢，理由竟然係我"扮女人聲"會似ｄ.......我要"扮女人聲"???(睇怕真係時候反醒自己既言談，同比人既形象喇；哈哈哈)

極度期待 - 死亡筆記2 最後的名字

身為死亡筆記既粉絲，電影版希望L可以砌低夜神月；大快人心。(因為漫畫既L中段已經死左)

好掛住"可愛"既流克!!

Adsense死因研究庭

自從尋晚Annie打黎話佢個Adsense Account繼阿卡生之後亦比Google block埋，甚至佢既朋友Julie(唔係through佢個site申請既)，都無點開始正式click，一樣收死亡E貓…….大家既疑惑就係：到底死人Google用乜野criteria黎評定，邊ｄ屬於“瘋狂點擊”？

Lunch前陳生尾隨Debbie入黎，同Daisy, Debbie & Michael展開左呢個維持數分鐘既“Adsense死因研究庭”。

陳生既偉論係：Google應該係check住每個開左既廣告個duration；因為如果真係有心用search bar搵野，無理由每一頁一開就刪。而且正常既search behaviour，無理由日日都有人用你個“西”黎search。

Debbie：平時你講野我都唔係咁信，不過呢次我就support你。

Daisy：不過聽ｄ人講，Google其實都唔係咁老實。分分鐘根本一夠100美金就啄你，錢就唔駛比，但又照收廣告商。

事後電話中既卡生：應該同duration無關，而係一到達100美金，佢地就會check你既clicking pattern；再黎定有無“瘋狂點擊”既嫌疑。

可惜當事人既Annie，係lunch後至上黎hea，參與唔到呢個因佢而起既brainstorming。

真係公事又唔見我地發揮咁既“團隊精神”？！為左呢壇玩意，公司上下，加代理，同前廣告公司都有input…..利害利害。

惠氏版「美女廚房」

Finance/IS/Admin整個department一行十多人剛去左桂林同大陸office開會，兼玩左兩日上山下海既team building......

今日返番工既YY姐，晨早就打電話黎報料到底玩得有幾癲：比80分鐘你，戶外煲雞湯！

材料係原隻連毛連內臟既雞屍，兼要ｄ同事跑上山要過關至有既調味料！哇，大陸ｄ同事就玩得過引，一向缺乏運動既香港人，簡直跑到面都青。

用火機撻石油氣爐，已經唔係我地呢ｄ用開煤氣爐既人容易掌握到。斬雞頭，掹雞毛同清內臟......佢地話如果我在場，一定爭住做！

首日上完山，第二日仲去漓江邊山溪，泵江水上黎打水戰！(江水都好污糟喎)成班同事連內衣都盡濕，阿肥仔哥Eric (finance manager)仲成個人跌埋落水添。

佢地奶粉嗰邊一向都玩得好大。上年仲去澳門，要ｄ同事由14樓游繩落黎(Objective of this game was: overcome your limit)。哇，大佬，做西藥啫，唔係考飛虎隊喎。

遲足兩個月的生日飯

8月生日既我，10月都仲有人同我慶祝生日都算誇張。成日話自己"超busy"既Hudson哥，想同佢正正經經坐埋食餐飯，要提早幾個星期前預約，兼幫佢book埋位先至有飯開(但生日既好似係我!)

一向收工勁遲既陳生，今日都真係夠晒誠意，6:45pm就過黎接我。唔駛我次次等到發火。

上次佢生日去左Grand Hyatt，好坐但唔好食。照Martha建議，今次去Island Shangri-La Cafe Too。食物種類多d，但就唔好坐；d枱放得太密，如果想傾偈既話，呢度唔係一個好選擇。

講真，同陳生出街，佢對女仔好gentleman；呢樣值得一讚。今時今日唔係好多男仔做到。而且同條友食buffet，佢好興帶住你行，然後整到兩碟近乎一模一樣，哈哈！因為大家都知道晒對方ｄ衰野，無須扮上菜/草(quote阿Ellena姐既一句)；佢亦係唯一夠膽兼可以坐喺度教訓我半粒鐘，而我又唔會發火既人。

Mate, thanx for the dinner; and thanx for being there for me.

又一個中獎

尋晚飯局中堂大佬打電話黎，話剛返溫哥華既五嬸(即佢mommy)，照到個肺好花，而且仲有積水，好有可能係肺癌。因為加拿大檢驗同排化療都需時(免費醫療既弊病就係人人真係平等，唔係有錢就可以快d醫)，寧願返黎香港去養和照仲快；隔日就有報告。

五叔同五嬸今晚搭機返香港。我當然都盡人事幫口問吓邊個醫生好啦。

堂大佬都算黑仔，早兩年堂大嫂又係cancer走左，淨番兩個細路。一個男人就算有菲庸要湊住兩件小學生都已經好有難度。剛剛一回氣，輪到自己阿媽......

呢幾年體會到既係：
1. 做人真係幾化
2. 呢個世界，用錢解決得都既問題，都唔會係好大問題；因為實在太多野係有錢都買唔番e.g. 健康

b記餐廳+Afterschool

開左業唔夠一個月既Agnes b 餐廳，因為雜誌煲得犀利加上大家既好奇心，難book程度係需要起碼兩星期前預訂。

約左阿卡生同剛今日Last Day既路姐放工去試一試。

裝修講真一般啦，特色講唔上。雖然只係十數張枱，但係都叫做排得幾密。加上我同路姐聲量都唔細，真係戥坐隔離既人覺得唔好彩；遇著兩個口沒遮攔既癲婆。

冷氣幾大，頭盤叫左個魚湯+田螺；阿卡生已經話唔夠熱。好彩主菜Angus Beef同Baby Mussels有番ｄ水準。

Carlos幫阿路計左個Life Chart，而且佢地兩個都係extremely talkative既人；加上講既話題(wine, 舊廣告之類)我都係門外漢，所以唔需要搭咀，可以sit back & relax，be a listener for a change。

班侍應同個captain超green。尤其是個captain，according to 阿卡生，有ｄMK feel添。佢送上門問我地意見，當然會比阿卡生一野車埋去啦！

飲左枝ROSÉ加枝Red，未夠喉；11pm轉場去After School隊多枝White至收工。After School開得夜ｄ同埋可以食煙，唔駛兩位忍得咁辛苦。聽朝仲要返工，唔好去咁盡，12:30am散啦。阿路姐連放5日假，卡生都返9:30am啦，最可憐既都仲係我，8:30am一條喪屍都要死返去。

Load唔到太多相，自己去space睇啦：http://glorialeong.spaces.live.com/

過黎為左食蕉？












神神化化既Hudson哥，無啦啦死過黎hea左一陣。一見Daisy身後有生果，就老實不客氣當自己屋企一樣，拿起隻蕉就自隊。

清減番些少既佢，一再問Debbie佢地自己有無肥到。大哥，你咁死高，肥得幾磅人地邊度覺呀。唔好自己呃自己，繼續努力減啦(雖然你已經輸左個打賭)。

食完隻蕉，都未知佢過黎想點，就想行返出去!! 唔通真係因為去"揸水"路經，過黎探我地？

到底食蕉前有無洗手架，大哥？

會上引既魚旦粉

Daisy & Debbie兩條女上星期有3日都去海光街尾轉彎條巷仔內，一間叫"成記"食魚蛋粉。佢地講到好似每日都心思思想再去食咁，真係以為老板落左藥會一食上引添。

見講到咁神奇，今日跟埋去見識到底碗野有幾利害。

其實同車仔麵無乜分別，不過係價錢平ｄ同配料選擇多ｄ。Daisy姐碗加左紫菜，整整成碗都比厚厚既紫菜覆蓋，有ｄ恐怖。唔係佢地講得咁大碗啫；下午我同Debbie仲各自要隊多個豬仔包添。

尋晚囉黎衰成4點多至訓，整日屬於半個靈魂出竅狀態。今晚真係要早ｄ訓，因為鏡中既自己，眼肚同對眼一樣大，加埋星期五晚兩包炸魚皮所引發既粒粒，真係可以用「慘不忍睹」黎形容!