太古坊舞獅賀歲

一年一度，太古坊都會安排舞獅；lunch time先在樓下大鑼大鼓表演了20分鐘。下午舞獅隊伍會入每間office旺一旺個場，派利是的重任交比余經理，我掛住做攝記。

太古坊Simply Life

公司對面的Pacific Coffee搬走後，開了Simply Life；不過只售咖啡包點，沒有飯或pasta set。

賣相不錯而且價錢合理，似乎同星巴克有得爭了。下午茶：Strawberry Danish $15

俗氣充天

時代廣場的賀年Deco充滿"銅臭"，很俗氣!!

呢幾年的聖誕同新年deco都好唔掂，衰過好多屋苑商場；話晒都叫旅遊區，比點heart嘛。

人日飯局

3月底將結業既SUN，提早履行VIP卡全單半價的優惠，約埋Connie，沙律同回港過年既Annie晚飯。

三種巨峰提子飲料(溝白酒，燒酌，乳酸)；拉麵沙律，枝豆，海老天卷/加洲卷。

刺身5點，雜錦天婦羅。

松葉蟹釜飯，鹽燒廣島蠔，鍋燒烏冬，串燒7點。

牛肉Shabu Shabu。

港狗鬥蝗蟲

近日越鬧越烈的香港人內地人罵戰，由網上進化為行動，又話呼籲內地人齊齊在東鐵月台開餐，又到廣東道名店區大唱蝗蟲歌。

的確部份內地遊客很不衛生，亦不懂排隊，令很多香港人睇唔過眼；雙非衝急症室生仔亦都很擾民；不過要唱蝗蟲歌也應該去急症室唱，對住遊客唱似乎也於理不合吧。

孔腦殘教授的港狗論的確狗話連篇，但一個傻嘅謬論引起仇視內地人也不恰當吧。

如果話我哋開始用內地詞彙如"打造"及"素質"有問題，難道"屈機"和"升哩"才是有文化？

內地人的確有部份行為令人側目，但其實我們那些毒男/公主病的80/90後就無問題？

開工大吉!!

尋日係P記給員工的假期，今日先係龍年首個工作天。

一朝早將舊的HP laptop給電腦部的part time抄data，所以好"悠閒"地hea了一個早上；終於都換了部新的Lenovo。

開工日的第一餐，囍宴XO醬炒蘿蔔糕($56)。一點辣味都無，你話比我聽係頭抽炒的我都信!!不過今年食蘿蔔糕唔多，所以點黎當午餐應一應節。

新城市的花與蝶

永遠人頭湧湧的沙田新城市廣場，不得不讚聖誕和新年佈置很有點水準。農曆年的主題係花與蝴蝶，一樣沒有金龍在揖讓，但很清雅！

赤口盤菜

赤口日得6度入大埔荔枝山露姐家中食盤菜，第一次見4個月大的樊圈圈，又係嗲精一名。佢老豆樊mac mac則一見到我條褲就猛un(應該係太濃烈狗味)，衰好色比人收監。

8人份的盤菜，唔駛半個鐘就清晒，的確人多好食作。後加金菇芽菜生菜烏冬同自家製雲吞，當然夠晒飽。不得不提露姐的自浸梅酒，好味！

新都城利是封

康澤的管理處寫明看更清潔工都不得收利是，所以呢兩日還蠻"正常"的。反觀新都城就明顯地比平日加強了保安，平時一個看更守電梯及出入口大堂，呢兩日差不多生熟面口的看更都傾巢而出，為的當然是討利是！

講開利是，不得不讚新都城商場的利是封，設計很傳統，但特出的是物料，因為是絹面，很貴氣！

凌晨年宵

每年一度的慣例：陪Annie行凌晨維園年宵!

3am在樓下老麥等，行去天后入口都係15分鐘。入夜後得9度，我穿了兩件羽絨Heatech樽領，Heatech襪加頸圈手套，似去哈爾濱多過銅鑼灣！

今年大家都捨得消費，桃花差不多賣到水尾。Annie拿拿臨先買了棵細的，全程捧著行乾貨。

我對乾貨一向都係齋睇唔買，大多買來無用；反而Annie買到兩個暖手枕。 

早餐又係慣例澳門茶餐廳，同一款宵夜/早餐($39)；不過變相加了很多價，唔包餐飲兼收加一，出年都係幫襯Starucks/24hrs Burger King算了。

團年盤菜

大除夕到樂富食盤菜，人多特別好氣氛。林Auntie自己加了料，所以那盤菜係非一般既滿，差不多一開火就好容易滾瀉。

食完早點返黎眠一眠，凌晨再同Annie出動到維園；入夜後外面越來越凍，凍唔緊要，千祈唔好落雨。

喜氣洋洋在老銅

早上的銅鑼灣，尚未人山人海，比較可以影到一點賀年Deco；一過中午，就要馬上撤離！

十三么曲奇

見到雜誌有這款限量美心xGOD的麻雀曲奇，很特別；索價$168當然比一般既貴，但造型概念搭夠，拿去拜年本應不錯。

但......

他媽的玩限量，來個全線美心都斷貨；打去GOD問返貨時間，答案係好悔氣既"3月啦"!!

妖，三月拿去清明拜山咩？點解有個好點子，但製作那麼失預算呢？

老板的團年lunch

也是西餐，又是repeat上個星期的News Room；因為臨過年中菜到場都爆滿。不過由佢大秘書度得知，原來佢係唔喜歡西餐既。

Cream of Cauliflower, Pan Seared Halibut, Warm Banana Cake ($165)；份量比昨日Grappas大，較飽肚。但都係那句，唔抵食。

賀年E-Card

內地的management team昨日send了E-card比客戶，雖然我唔係China Team，因為佢地連香港的vendor都會send，所以早前submit了張passport photo比佢include了落去其中一個bubble。

唔靚，但要整咁多樣落去都好難做得清雅。

1:1 Lunch

和老板在公司樓下Grappas來個一對一午餐；不過無論一對幾佢都係100%時間講公事。

Set Lunch：Grilled Sea Bass+南瓜湯+espresso($175)。魚既肉質好滑，但就偏鹹。

聯邦團年飯

尋晚提早和林家做節，地點都係老地方：油麻地聯邦!!我和Rebecca各"支持"了童軍獎券，做了"善長人翁"。

團年菜，一貫"抵食夾大件"；最頂癮係一整盤的雞翼，雖然熱氣但很香口。

甜品：特製的芋頭蓮蓉西米焗布丁，桂花糕，笑口棗。

新都城的新年Deco

主題是轉運桃花風車，周圍有唔同theme既booth，如姻緣連理椅，金元寶袋，開運求籤機，潮寫揮春檔。

但好像沒有龍蹤呢？

浴室天花漏水

梁師奶屋企的浴室天花滴水，而且管理員揭開假天花，甚至有石屎剝落！

好彩樓上是裝修單位，馬上關了水掣，但要聯絡業主搞都要時間，呢幾日佢沖涼都要落會所了；年初一至三會所也關門，希望到時攪得掂吧。

型x娘

周董下午為電影宣傳踩入新都城。滿臉鬍子但配桃紅色外套，是型還是娘？

NewsRoom

財爺南下視察民情，開了一朝會到樓下Newsroom吃個Western Lunch。

NewsRoom 3-Course Set Meal ($168):

Minestrone Soup or Classic Chicken Caessar Salad

Slow Roasted Leg of Lamb or Devilled Mackerel

Chocolate Brownie

味道其實OK，只是份量太少。Sinmei玩特別，唔要set lunch來個burger($98)，她的那個才是最飽肚的!!

不送禮，自用!!

見到地鐵那美心的賀年餅乾廣告，288層杏仁酥來個打橫大晒酥皮，加埋那個蝴蝶酥曲奇禮盒都很吸引。

 

 其實買散裝的無鐵盒既環保也化算，唔去拜年都可以買來自用；那杏仁條實在鬆化，$16/6條裝，買3包有8折。真係唔係呢個廣告平時都留意唔到呢個好野。

80後的集體回憶：鐵娘子

都係講名女人政客，梅麗史翠普的"鐵娘子"比楊紫瓊演的昂山素姬，對香港來講應該更有親切感。那些年效應，廿年前差不多個個禮拜都會響新聞出現既figure，在樓梯"那一仆"成為上世紀的經典。

香港要等到3月8號婦女節先上畫，唔知是否擇呢日貪佢夠應景。令人期待Meryl Streep點樣演譯呢個集體回憶。

酒店飯局員工價

第一次廖太生日飯用沙律的員工優惠；Excelsior二樓的怡東軒，好像新裝修過，地方算闊落，當然我地亦都要將聲量收細點。

生日正日出來和我們食飯的阿丁，真的很賞面。

頭盤：芥末雲耳($48)，麻香萵筍絲($48)，和味醬蹄($128)，話梅涼瓜片($48)，招牌燒腩仔($128)；餐牌假當然偏貴，不過有員工折扣，所以很"抵食"。

法國紅酒栗子炆雞($198)，芋頭海鮮炒鮮奶($148)，頭抽炒雜菌($138)，濃湯雜菜浸鮮腐竹($128)

用荷葉包著，很香很嫩的"飄香銀杏鹽焗雞"($168)

喪點了3碟飯，小菜份量精緻，無飯落肚點會飽？臘味鮑魚菜粒炒飯($178)，薑米蝦醬牛崧炒飯($158)，鮮蝦鮑汁荷葉飯($198)；廚師精選甜品($120/6款)

善存利是封

設計很"大路"，或者可以說是平平無奇吧；唯一可取的是暗紅不是鮮紅色，無咁娘。做了大批工展會派，結果promotor好忍手地派得好少。

幸好沒有年份，明年可以再用。

龍年利是封

星巴克買新年coupon，送一疊5張的龍年利是封。

其實年年封面個設計都一樣，但個封底卻印上了年份，所以今年用唔晒要等12年呢。

沙田梅林

明天就返加拿大的Shirley，襯週日下午有空約佢出去新城市食晏。

新城市廣場雖然食市多，但週日揾食甚艱難。雖然聽過呢間分店口碑麻麻，孤且試試吧。

吉列豬柳定食($143)，吉列海鮮定食($158)；算不過不失，不過午市無Lunch Menu是有點那個，而且味道確實K11店較讚。

香港話劇團音樂劇
"奇幻聖誕夜"

Christmas Carol係我很喜歡的故事，每年近聖誕都想重溫，真係百看不厭。

尋日到大會堂劇院睇的下午場，場景服裝很有水準，英文歌也很不錯(只是有少少香港口音吧)；用廣東話演譯狄更斯的名著，很有新鮮感。

2009年初演時有英文版的，應該更傳神。

Petite mais bon!

名模Amanda在ifc開的甜品counter Petite Amanda，飯後經過好奇心驅使下試試味道。

Charlotte aux Poires($40) 很香的梨味，雖然的式了點，價錢亦不便宜，但質數不錯。

安利vs.沾仔記

早餐午飯走訪了跨區吃了兩間有質數的麵館：筲箕灣東大街安利，和中環威靈頓街沾仔。

前者聞名切腩魚蛋，後者出名巨型雲吞鯪魚滑。

切腩魚片撈粗($34)，招牌三寶麵($28)；個人較欣賞後者，雲吞比其他舖大兩倍，鯪魚滑如拳頭般大，既有陳皮香又彈牙，湯頭也很甜；不過那牛肉太"梳打fu"了，下次雙拼就好。