後勁不繼的FLAME

早兩個星期先至讚過個set lunch抵食，但今日下午約左Gigi一家，Connie & Annie再encore FLAME時，價錢貴左不特只，水準仲下降左添。

3 courses meal由$108-$178；我叫左個Greenhouse Tomato in Sesame Sauce, Traditional Lentil Soup, 同Pan-seared French Spring Chicken with Mushroom Jus & Pommes Rissole。味道嘛，只能用好普通黎形容，春雞其實係雞脾兩隻，衰d講句「志佳」整得好食過佢。

Carin同Carton拿住我同Jeffrey部數碼相機喪拍，自得其樂；雖然有d震，但Carin好認真咁拍每一張相，果然有其父必有其女。

多謝晒Gigi & Dave送既Sony Vaio數碼相架，但下次真係唔好送咁貴啦.....

花樣男子Final

期待既電影版，估唔到香港島只有MCL康怡有得上，就知道電影公司對此片票房信心不大。約左Charlotte，佢表妹同auntie一齊入場。

如果睇過日劇版1-2輯，都應該會入場睇埋道明寺同杉菜結婚呢幕吧。Cast唔弱，電影版有藤木直人，同埋"華麗一族"木村老豆北大路欣也。

故事就真係不怎麼樣，係靚境搭救：由拉斯維加斯，到香港，再到南方無人孤島。孤島一段最悶，有d似睇LOST。

學Charlotte話齋，全劇最型仔既唔係F4，反而係配角藤木直人(剛巧，十多年前佢都演過第一代"花澤類")。

最尾響惠比壽Garden既"簡單"婚禮，有d草草收場之感；漫畫都未畫到呢幕，都係留返d想像空間比我地好過。

鐵樹覓新家

新office面積實在太細，點度都容納唔到我種左十多年既鐵樹。

明明有生命兼不時開個花黎充充喜，要扔出後樓梯我點都做唔出，多得家住屯門，有個大大後園既Michael仗義收留佢。

由細細棵座枱，到越來越大要座地，盤都換過兩次，真係綿乾粹濕咁揍大佢，講真點都有點唔捨得。

你去到人地度就乖乖地聽話，年年開花先有人錫架！！

我=善存，善存=我？!

下星期響銅鑼灣京華中心屈臣氏門口攪roadshow，花數千元訂製個巨型Centrum樽，週末企響門口做PR。












製成品送到，第一時間試穿；雖然唔係好重，但只有eye-level開窗，望到前望唔到下面。

行過對面踩入裕利office，響臣哥個位擾攘左一陣，Sinmei就膀住我行過去Lincoln House奶粉既office!! 沿途當然不乏偷笑既OL。

惠氏今日下午攪個"Bring Kids to Workplace"既親子活動，整個sales room坐滿同事既小朋友，既有小丑表演，又即場拉龍鬚糖，同做馬賽克手工班。我既出現，當然唔算礙眼，小朋友只會當係PR之一。

但.....

一入去就慘被拳打腳踢，而行凶者竟然係Michael個仔!!!
(如果真係下個週末扮樽，裕利仝人一定會黎輪流送我一腳!!)

豆腐乾真身

下個月搬去Lincoln 13/F既豆腐乾office，終於都有得睇。

雖然仍有數個鐵櫃未到，但無想像中咁侷促。Partition確實係有點高，而且隻青綠色真係太過sharp。

呢張就係我個靠窗新位；open office之餘連guest chair都無，所以將來有乜confidential野，都咪鬼打比我，要傾野更加大家將就企企吧。

買戲飛送閃卡？

約左奶奶Charlotte星期六下午睇"花樣男子Final"。下午去MCL康怡訂戲飛時，竟然獲贈一套5張日版F4同杉菜閃卡!!














救命。

原來買兩張飛送一套，3張都只係得一套；但又唔係台版F4，無理由要我咁大個人對住ticket office既妹妹仔嘟咀叫佢送多套架。

奶奶鍾意小栗旬，Charlotte鍾意松田翔太；反正其他d都係無乜人哮。

Macarons

尋日帶左盒Shangri-La房內的complimentary macarons返公司孝敬班女，Debbie似乎未聽過呢種傳統法式甜點。

















剛巧今日facebook內見到竹星表妹月頭到西歐旅行，竟有一張滿滿都係七彩macarons，令人垂涎欲滴既相；忍唔住去翻一翻佢既資料：

Macaron(馬卡龍)法文意思是「少女的酥胸」, 這個令人遐想的名字, 它的英文譯名則叫macaroon, 也有人叫它做「小圓餅」。Macaron小巧玲瓏，只禁得起兩指適度凌空輕捏，力道過重會壓碎，過輕則拿不住，讓你品嚐的姿態絕對高尚優雅。頂級的Macaron其酥軟鬆脆的程度要適中，如法國人稱之的「少女的酥胸」。

呢幾年日本同香港都相繼興起食macaron熱；日本連Starbucks都有raspberry macaron賣黎佐咖啡。香港最就手應該係Sogo超市既Antique Patisserie專櫃，$10一個，絕唔便宜。

鍾意佢外皮鬆脆到輕如無物，但中間餡料偏甜；否則真係可以食到唔停得口，繼而破產，哈哈。

"命中注定"出爐了

聽左好耐，呢套近月黎響台灣掀起熱潮既偶像劇，早兩日終於大結局。










當然晚飯後襯「仙樂」仍未關門，成套打包返屋企。

主角真係唔算靚仔靚女，至於點解收視竟然勁過當年"流星花園1"，真係要睇過至知。

希望唔係好似之前既"王子變青蛙"一樣，只係狂sell自己破"流1"紀錄，但turn out出黎睇頭15分鐘都已經慘不忍睹既低能無聊戲碼。

Baan Khanitha

開足一整天會。"有幸"sit in大陸既budget presentation，親眼目睹唔同function heads既老細門舌劍唇槍，每行數字同你慢慢圇，就算齋坐響度聽都覺得好攰。香港只有臨尾一粒鐘go through，不過絕對唔介意，因為時間越多問得越仔細。

休息一個小時，又跟大隊出外搵食。

今晚係一間名位Baan Khanitha & Gallery既泰國料理。裝修蠻有新派泰國特色，每碟味道亦都絕無欺場。

當然，同老細們食飯多多少少都唔能夠盡興，幾好味都希望盡快閃人。