巧遇元暢！！

哇哈哈! 真係無諗過會在香港機場見到元暢！

Lunch後正準備出發去機場之際，Annie call黎話元暢今日剛巧由台灣經香港轉機返杭州拍戲。但我班機比他早一個鐘depart，本來都以為希望渺茫。因為他大可以在business lounge度磨到上機至去閘口。

即管碰吓運氣不停在D舖頭度逛，搏會來一個「偶遇」。仲要一路行到最督督杭州班機既68號閘口，真係下午食左セ都消化哂啦！

Jacqueline都在lounge門ロ附近hea左好耐都唔見。

正當我打算放棄返去登機之際.......登登登登！！一件6呎4，頭帶冷帽既物體在我面前行過!!應該真係無聊得滯出黎行街!

機不可失，馬上撲上前: 元暢,可否幫我簽個名？！

雖然有少少顎然，但都好nice地在我的Moleskine dairy度簽下“鄭元暢060228”。見他今日無剃鬚又無上粉遮面上的痘痘，明知他唔會想拍照，都無謂多此一問啦。一句:謝謝，加油！便去排隊，通知埋Jacqueline便登機了。

Lucky！！！

斷背山

阿丁大大話話都講左3個幾禮拜，我都唔多介紹呢套戲。

細佬借左隻勁清老翻比我。尋晚邊同朋友MSN chat，一邊"捱"晒成套戲。

唔係太明兩個男人荒山野嶺相識幾日，因為情慾而撻著，有乜野原因會"愛"得咁癡纏？!我睇到最後其中一人去世後，另一人對住件故衣思故人時，真係感覺唔到本來期待中既盪氣徊長。

反而，以前既"麥迪遜之橋"，阿活叔同阿梅姨喺橋上分道揚鑣那一幕，梅姨無勇氣為相識４日既情夫活叔拋棄自己家庭，知道今生只可以互相思念既無奈......到而家都好印象深刻。

斷背山唔算差，但節奏太慢，同期待中有ｄ距離。

The Jacket

上年同Connie去台灣時呢套戲上畫。被類似電影【蝴蝶效應】(Butterfly Effect)既橋段所吸引。

香港差不多遲成大半年至上畫，最近至出ＶＣＤ。

男主角係鋼琴戰曲既Adrien Brody。

波灣戰爭英雄Jack Starks於服役期間頭部中槍，幾乎致命。傷勢復原後他返回故鄉佛蒙特州，卻飽受失憶症之苦。在從一次突發性的昏眩中清醒後，他發現自己竟被控謀殺刑警的重罪，並被強制送到精神醫學中心接受Dr. Becker的治療；療程備受爭議，尚在實驗階段：首先，他把用於治療精神病患的緊身夾克綁縛在Jack身上，接著注射風險極高的實驗性藥物，最後再把他禁閉於醫院地下室的冷凍停屍格中。在藥物的影響下，Jack進入混沌失神的迷離狀態，甚至出竅到未來，邂逅了名為Jackie，境遇堪憐的女子。在那個時空中，他驚訝的發現自己將註定在四天後死亡，而他必須在僅有的時間內與Jackie攜手扭轉命運，拯救未來！

和【蝴蝶效應】一樣，The Jacket讓電影主角陷入無法以常理解釋的超自然奇遇，使他被迫在不同的時空裡遊走、穿梭、徘徊，並捲入自己如宿命般的悲劇性未來。

生活中往往一個不自覺既小抉擇，都會為我地帶黎一個截然不同既人生。

不過就故事黎講，都係Butterfly Effect精彩好多。

新玩具：iPod Nano 1G

用左一年多少少既iPod Mini舊電已經差死左；打電話去Apple問過，換舊鋰電$600+人工$280，大佬，不如我加多$200換過部新機啦。


雖然明知iPod既電唔襟，但真係比佢外型吸引。而且新出左細用量既Nano 1G，都係$1150。好，我比多次機會你。反正都預左舊電last一年貨仔，平平地1G算啦，唔駛投資咁大。

打去Apple直接用信用卡訂，雖然唔會有折，但可以幫你免費刻字落部機度personalize左佢，而且包埋courier服務。只係等3-5工作天。

希望新玩具下星期可以趕得設去上海前收到啦。

Upjohn舊同事@五陵會

Carmen姐生日，除左廖太要同佢慶祝外，Upjohn既舊同事都會再食一次。 Carmen又有帶埋佢隻佬Tony一齊黎。

好耐都無去中環五陵會。以前黎食晚飯都得一兩枱，今日唔知乜野日子，竟然坐滿。

每次黎都唔放過既生汁蝦球同生磨蛋白杏仁茶係必叫架喇。不過今次我至愛既伴碟雀巢，唔夠脆，真係有ｄ失水準。












其他只可以用不過不失黎形容。ｄ老伙計既態度，學阿劉華話齋，今時今日咁既服務態度，係唔夠架。

睇怕又有一排唔會再黎。

唔通又繼續迎囍？！

Shall We Talk

尋日剛買左Eason新出既精選碟"我的最好時代"。好大原因係為左呢首，除葡萄成熟時以外，我最鍾意佢既歌。

林夕既詞簡直係成首歌己靈魂：

明月光　為何又照地堂
寧願在公園躲藏　不想喝湯
任由目光　留在漫畫一角
為何望母親一眼就如罰留堂
孩童只盼望歡樂　大人只知道期望
為何都不大懂得努力體恤對方

螢幕發光　無論什麼都看
情人在分手邊緣只敢喝湯
若沉默似金　還談什麼戀愛
寧願在發聲機器面前笑著忙
成人只寄望收穫　情人只聽見承諾
為何都不大懂得努力珍惜對方

陪我講　陪我講出我們最後何以生疏　
誰怕講　誰會可悲得過孤獨探戈　
鈴聲　可以寧靜　難過　卻避不過
如果沉默太沉重　別要輕輕帶過

人與人之間既溝通，要做到坦承，談何容易。無論對家人，對愛侶，有好多野會寧願收埋喺心；而誤解，疏離亦隨之而生。

有時要將心裡面既說話講出黎係需要好大勇氣，但起碼如果一方肯踏出第一步，對方無論點回應，都自問盡左力，唔會留有遺憾。

上星期concert聽到佢唱呢首歌，真係好懷念。

與Whitestrips結伴7日

一年一度，唔係香港小姐，而係我用Crest Whitestrips早晚漂牙。

無法啦，小女子同咖啡結下今生不解緣；日子有功，一定會有coffee stain，無謂浪費左當年咁辛苦矯型得番黎既perfect bite!!!

自從數年前，Crest都未喺香港market Whitestrips既時候，好友Gigi由加拿大帶左第一盒比我做手信。而家香港都有得買，又唔係貴咁多，方便在唔駛成日搭人帶。

用後好白就唔係，但我ｄ牙夠齊，效果ｏｋ喎。

呢隻野，簡直係咖啡道友同煙民既恩物。

梁師奶至愛：小南國

細佬（唔係烏烏）下午上我屋企幫我裝Nortan 2005。梁師奶就提議不如出小南國食。佢實在太欣賞嗰度既椒鹽小黃魚喇。

未試過Times Square新店，裝修比Sogo隔壁間靚好多；而且無咁逼。









細佬quit左Sony份工之後，搵到馬會做store supervisor。但４月先上工而exact date仲未confirm，佢都係keep住見一見其他公司。今日Samsung，聽日Smartone......其實我喺惠氏做左10年既人，對佢地呢ｄ每兩年轉一次工，真係唔係太明。

太古城新Food Court

平時食晏好少去food court，因為人多好難搵到大枱。

最近新裝修，ｄ舖高檔晒，所以亦都相對上易搵位。

Debbie佢地唔想行咁遠，我單拖同YY, HR Bernice & Ophelia去試。

台式擔仔麵好大碗，可能驚地道既size香港人會唔飽。但ｄ肉燥就拍馬都比唔上度小月咁夠味。

不過上海豫園排到開晒項既南翔小籠飽都有counter。講真，雖然無台北鼎太豐咁正，但點都好食過翡翠。

太古坊真係比以前CC Wu多野食，而且飯腳都多ｄ啦。

又一Cross-Over旅行

勁勁勁!!!

4月底既台北之旅起初只得我同Connie，尋晚奶奶又係出左免費mileage ticket六月前要用，所以決定join埋我地。

於是我同奶奶兩個魔鬼，再做定d功課(check機票& package價錢)今日引誘阿丁........哈!佢真係落搭!!!!!對阿丁個仔黎講，佢阿媽都唔知街外識埋d乜野friend，由一個從來唔去旅行既人，3年內跟我地去3次台灣，2次東京!!!!

人多食野開心d，因為可以試多d野。唔駛好似我同Connie上年咁眼闊肚窄；樣樣都想食，但又無能為力。

仲有未confirm既Charlotte & Annie，如果佢地都成行，又係另一次東京團既陣容。

Carmen生日＠金粵朝代

呢間係Carmen姐提議既新嚐試；為於銅鑼灣總統對面，燕萍隔壁。係一間西餐廳feel，但食中菜既餐廳仔。 食物有ｄ似紅螞蟻，細細碟，都既得意。




Carmen帶埋隻佬Tony黎，我地有ｄ之前都見過架啦，不過今晚成棚女，又唔多同佢講國語，希望佢唔悶啦。












間餐廳真係好細，我地11人都差不多霸左人地一半。真係難為其他散枱既顧客要忍受我地既噪音。Charlotte難得放假，佢先後喺日本識左奶奶&阿丁，再上星期六apm識埋Annie, Moly & Jacqueline，呢個cross-over都唔算好牽強。 廖太聚會可能越來越多新血。

勁旺場

阿Charles帶埋新請返黎，代替佢個位既Ivan Lo落黎香港介紹我地識。都唔知係咁岩定夾埋，連阿Paul都落埋黎。好耐都無試過咁多visitors喇。

Ivan睇落都尚算隨和；不過真係要合作過至知。典型會計佬，預左佢會問好多問題。

為左介紹埋比惠氏finance, HR & IT同事識Ivan，我地lunch又去惠氏飯堂西苑食！真係好嫌，唔好講笑！！

野蠻秘笈

之前聽Damon話佢個net fd覺得呢套野好無聊但好好笑。今日同梁師奶去Palace apm睇左，但可惜只覺前者，後者一d都感受唔到。

王晶d戲，真係當香港d觀眾白痴。最抵死係裡面有一粒乜鬼忘情金丹，頂，一睇就知係麥提沙啦。套戲除左幾個主要演員外，其他個個都係大陸人，配音又唔夾口形。

如果香港d電影咁多爛片，真係好難怪人地要買老翻；應該咁話，買老翻睇都嫌徙錢徙自己時間!!!!

F4 Forever 4 Concert記招@ apm

無諗過concert記招會喺apm呢ｄ咁open既地方攪。2:30pm去到會合Annie & Moly佢地，死霸住Food Court對面欄杆位。









好彩apm要閃開買水飲同去廁所都好方便。唔駛日曬雨淋。

呆等左５粒鐘，真係好耐都無試過為左見言生企咁耐。到7:30pm四子上台時，我身後已經有３叢人啦。









Annie混左入去扮文字記者，所以可以近距離撈到佢地４個。Charlotte 7pm收工由君悅飛的士過黎，剛剛趕得切。我地幾個由第３層望落去， 睇到但唔會太清楚。好彩有個大電視，可以見到佢地ｄ表情。









個記招只係半小時。之後無耐再出返黎，做左15分鐘媒體訪問至收檔。 我地仲衝埋落去吉之島下面睇住佢地上車，阿V拉開左簾同我地揮手添。

又攰又餓，去返平安夜食過既Teppan醫肚。食完見個台仲未收，柴哇哇地成班去影張合照。

真係好耐無追星啦。

Body Check

晨早出中環泛海大廈約左做一年一度的manulife body check。

個醫生遲幾個字返；我就利用呢幾個字時間閃去Annie推介既樂香園茶餐廳(蛇竇)食一份勁juicy雞蛋治，再過隔離黃枝記隊多碗竹昇雲吞麵，然後又再過隔離Starbucks買多杯中咖啡至上去。

平時唔食早餐既我，今朝好似一次過食左個lunch咁。

不過要有足夠體力，今晚追星去。

Annie絕黑版

雖然我本來注定同佢concert分開坐，但無諗過結果佢連場都無入。

放工先仆返去同梁師奶&烏烏食個飯，再左98D由寶琳出尖咀。臨落車前Annie打比我話唔見左個電話!!!一落車衝去紅磡火車站搵佢。好衰唔衰聽日言生黎香港，佢想唔立刻出返張sim card同部機都唔得(唔係點收風)。

結果由尖沙咀搵到旺角至買到部機。 當其時都10：30pm，無為再趕返紅館啦。

好多年前我都試過唔見手機，仲要係公司機。結果要買返一模一樣既電話比番公司。出入真係要小心d。

EASON Get a Life Concert









好期待既一個演唱會，因為佢唱live太正啦。

雖然$100山頂位，但只係為左聽歌，睇唔睇得清佢個貓樣都無所謂。

個舞台設計稱不上華麗，好cyber就真；有d似幾個紙包蛋糕堆埋一齊。你無可能握到手。而且台上好容易差錯腳。

有好多首歌都係弦樂伴奏，好似請左隊德國樂團。Dancers服飾有d西方詭異feel，令我諗起威尼斯d面譜小丑。

全場無嘉賓，佢咁多歌，都唔駛啦。 條友一直唱足2hrs至開口講第一句說話。不過好surprise無唱阿牛!! 好彩佢有唱葡萄成熟時，唔係一定咀咒佢!!!

~~~~誰都心酸過，那個沒有~~~~~~

Dry to Wet Pantry: 尾部曲 - Sink盤+水機

今日師傅黎整左大半日，終於都裝好個sink盤同水機。以後淋花洗杯都唔駛行去廁所咁遠。

不過水機用新filter；雖然Debbie & Daisy放左一陣水，但都無人夠膽飲"頭淡水"。

等星期一d老細們黎等佢地飲先。哇哈哈!!

Caramel Chocolate Brownie

回家前想食甜品，好似聽到魔笛聲咁身不由己行去Starbucks。

因為有一shot expresso淋落去，所以咖啡既苦味中和左焦糖同朱古力既甜味。

加上brownie上面既caramel glazed walnuts，呢種甜同苦既cross-over，可以比諭愛情或人生。

替一日畫上完美既句號。

一期一會

「一期一會」的緣由來自於日本。「一期」，表示人的一生；
「一會」，則意味僅有一次的相會。　

既然是人生中僅有一次的相會，我們就必需付出全部的心力，來應對眼前這個會面。

一期一會，可不可以重來，會不會再會，誰也不會知道。

所以知道，如果人生中，遇到了什麼困惑不能決擇的時候，我會停下來，好好思考，不錯失這次相會的意義，唯一一次可以決定的機會。

新Passport到手

放一個下午去Exchange Square One pick up Canandian passport。好彩pick up快好多，唔駛半粒鐘就攪掂。聽日仲要拿拿臨拎返公司做china visa，唔係點見阿三舅父!! (China/HK個marketing director Keith係暑期工Damon個三舅父。尋晚先講笑咁同Damon話：以後唔只每月一次大姨媽，仲有每月一次三舅父添呀!!)

行左IFC一陣，不過日本返黎行街意欲唔大。都係返屋企睇埋惡作劇之吻大結局好過。

Zegna Z

食飯前經過，比新出既Zegna Z簡潔外形吸引。結果買左Eau de Toilette Spray 50ml返去。

一向比較鍾意用男裝香水。除了包裝一般比較簡約之外，大部份都比女裝清新。（Polo最早期既綠色樽，係少數經典具備殺蟲劑氣息既例外！）

相信黎緊呢個多月，我都會散發注Zegna Z。

巨型卡樂Ｂ蝦條

真係好巨型。係平時既十倍咁大！！

而且唔單止包裝大，連裡面既蝦條本身都大幾倍（有成隻中指咁長架）。




Sogo都係賣$25.5，咁趣既野，無理由唔試試佢！

Cross-Over @ 謙記

另一廖太ｘ藥劑聚會。

地點係謙記，因為Connie聽我講過咁多次，都好有興趣試一試佢。基本上Annie之前日本之旅已經識左奶奶同阿丁；所以都唔算太唔啦更。

打邊爐都係要都多ｄ人食至可以試多ｄ野。唔經唔覺，由7:30pm傾到10:30pm！

Category Review

早上跟Kenny & Michael落樓下5樓萬寧office做cough & cold既category sales review。

本來marketing唔一定跟埋去，因為有時ｄbuyers想搾多ｄ野，如果我唔在場，余經理可以賴marketing睇得ｄ錢好緊，唔係佢地唔想fight多ｄsupport。

不過我有時都應該跟多ｄ出去，識吓4大天皇（屈臣，萬寧，百佳，惠康）既buyers。我地有成半生意由chain store度黎，唔好話套料，但有時自己主動ｄ，攪多ｄ花款，至可以有synergy*，而達到win-win situation。

*唔熟呢個term既人，synergy即1+1>2

又係上海

新passport都未囉，已經訂下月底28號上海之旅。最主要都係同阿三舅父Keith update香港今年既media & promotion plan。同順便睇吓大陸有乜野program我地可以偷師。話晒大陸既生意係香港既十倍有多，分工又細。唔似香港得７丁友做幾千萬生意咁一腳踢；做野仲係好流水作業。

因為追星後遺症而流利左好多既國語，真係大派用場。

上海可能係繼曼谷＆新加坡之外，最厭既城市。

二月份生日宴

今個月主角係以前頭靚阿階同YY。

地點又係好無新意既銅鑼灣迎囍。 YY好比面地放大假都出黎食。






攪手Martha今日sick leave，不過多左前merchandising supervisor Eva姐撐場，唔會冷得去邊。









前大秘書Pandora轉左行做Manulife保險3年；但大頭蝦性格不改。明明之後約左個客，成個銀包漏左喺公司都夠膽死；仲要我問佢囉卡片至發現。好彩迎囍行返利園都好近，唔係實遲大到。









因為得7丁友，寧願散叫。食左咁多次都仲係覺得銅鑼灣個廚幾掂。2月15號又會有番$1380套餐；哈，睇怕唔同既飯局仲有排去。