La Vie Avec Amusement

月曜日, 4月 30, 2007

明明

對我地黎講,賣點係吳彥祖或楊祐寧難得連幾年無入場睇戲既阿丁都有興趣出黎睇。

三條女,7:30pm,UA Times Square。

套片唔夠兩個鐘唔算好長,但我都已經忍得好辛苦;唔係忍小便,而係忍住唔爆粗!

我相信"明明"唔係refer to周迅其中一個角色既名,而且大家都會墮進"明與唔明之間"

時裝武俠片,仲要用王家偉手法拍攝。當中武功揉合我國小李飛刀,段氏一陽指,同藩邦既Matrix特異功能。

故事似有還無,周迅楊祐寧張信哲一眾國語人,硬要大講半鹹淡廣東話,十足表哥拼北姑。

散場出黎每人領會既故事都有所不同,睇怕呢部電影境界太高深,睇唔睇得明就睇閣下造化,善哉善哉。

平靚正既飯堂









約左阿丁同Charlotte睇戲,通常都會去附近既「紅螞蟻」醫肚;貪佢唔駛訂位,d野唔貴,選擇多同埋算幾好食添。

牛油薯蓉焗田螺
腰果茸沙嗲金菇牛肉焗飯
香檳芥末烤羊排天使麵
金華火腿娃娃菜

再黎一大杯蜂蜜薏米水,都唔駛$70一個人;銅鑼灣區都算係咁啦。









剛由台灣追完Vanness返黎既Annie,唔食飯都特地過黎送貨(我托佢買既新一季日劇);真係麻煩晒。

La Tour Eiffel à Times Square












放工經過時代廣場,發現多左個5米高既巴黎鐵塔縮水版。講真,做得都幾細緻架。望來望去都唔知佢棟響度有乜名堂,唯一聯想到可能係黎緊既"Le French May"既promo之一。

如果同真身一樣,舖滿細小白燈泡,每小時狂閃5分鐘,就知"火樹銀花"為何物。

日曜日, 4月 29, 2007

新b記餐廳









早一個月前訂枱為臣哥慶生,踏入3字頭,同佢代溝又少左d,哈哈。

新店舊店都係同一日同一時間既booking,Marinda老公剛巧係今日正日牛一,我就順手將舊店既booking比佢。

7:30pm,table for 2。

新b記雖然叫做面積比舊店大,但就覺得無舊店裝修得咁有特色。Fine dining area一列絲絨梳化,昏暗燈光,位同位之間著實太近,無乜privacy。

部長暫時由舊店掉過黎,佢都認得我過黎寒暄幾句。









Duck Breast Carpaccio
Crab Meat Salad
Grilled Spring Chicken
Veal Blanquette Stew (牛仔肉)

臣哥唔好飲酒,我唯有叫左一carafe Chardonnay自隊。









甜品佢都係睇住我食Orange & Lemon Zest Creme Brulee(弊!我仲大食過佢添)。

食物選擇同舊店完全唔同,質數都係用不過不失黎形容;唔會太差,亦都無乜驚喜。

飯後陪佢行左一陣就打道回府,我仲要煲埋「華麗一族」既大結局。

Happy Bday mate。大個仔,大家都係3字頭咁高咁大,我唔會再讓你架啦。

事發現場

回程小巴途中,都有段小插曲。

話說燈位前見到有數輛警車,放眼一望:

哇哇哇,成架單層新巴剷埋去人地豪宅大門口。大宅門外石屎成忽倒下,巴士車頭左邊角簡直頓成廢鐵........

清楚震撼過新聞片。

土曜日, 4月 28, 2007

正灘

第一次游水既地方。




初初返香港時,曾經癲喪到同Dave兩條友3號風球夜晚黎燒野食。可憐租燈比我地既阿伯,吹到頭都甩黎等我地燒完。

成十年無黎,個灘感覺窄左好多

沿燒烤區行過去,同阿丁出去巨石邊幫佢執機時,更慘被浪花濺濕添(甚有Tempo廣告feel)!

墳場中的新娘
沿馬路行10分鐘,到達軍人墳場

赫然發現竟然有對新人響度影婚紗相!真係另類。個新娘仲響唔同地方取景,就算我咁百無禁忌都無諗過呢招,利害利害。

余經理故居

記得以前余經理係赤柱居民;聽講係住喺一排舊屋當中

穿過赤柱大街見到呢排"古董",馬上打比佢引證。果然無估錯,左邊第一間就係佢故居。哇,唔怪得知當年佢老婆一個人留響屋企會有d驚啦。

特色餐廳
美利樓對出海旁,一列酒吧餐廳都各有特色

轉角更有間開業只有兩個月,叫「書齋」食廣東點心既。古式古香,完全採用公雞碗,入夜後坐出面真係風涼水冷架。


個人比較鍾意Pickled Pelican既style,黑襯金非常classic。決定左喇,生日一定要黎赤柱食飯。哈哈哈。

千年古井

黎過赤柱咁多次,都唔知呢度原來除左美利樓旁既天后廟,沿住側面石梯拾級而落,另外仲有石崖上細細既北帝廟同千年古井。

不過古井望落去似街邊坑渠多d,一池黑黑既死水浮住幾塊樹葉。

美利樓

40M綠van經香港仔隧道入赤柱,都只係半粒鐘。

對上一次係同肥婆auditor黎一日遊,只係半年前;所有新鮮感欠奉。不過對好耐無黎過既阿丁,海景,木天花,古式吊燈....都令佢註足影左唔少相。

對我黎講此行目的,亦都係短期內熟習操作部新玩具。

咖哩雞@「糖人街」

呢排阿丁興起周圍去發掘d影相景點。下午出發去赤柱之前,先去登龍街裡既「糖人街」醫肚。









平時多數係飯後黎食甜品,正餐就真係未試過。

點左個薯仔咖哩雞飯,配椰汁西米糕同紅豆冰$32套餐

雞炸得香脆,仲好juicy,又唔差喎。不過杯紅豆冰太淡,而且少紅豆;同上星期馬華既無得比。

金曜日, 4月 27, 2007

真係估佢唔到!

今日下午阿John收到個巴西惠氏President彈過黎既貓,去廣告公司開會當場show比我地睇。

真係睇到目定口呆!!

如果係我地submit呢類storyboard去美國,真係幾難預佢會approve;唔炳已經偷笑。

木曜日, 4月 26, 2007

善事都有盡頭時?
助學左幾年,今晚郵箱竟然收到封「重返校園計劃」既信;正當我以為又係叫我捐錢既direct mailing時,竟然意外地:

中國落實九年義務教育
《重返校園計劃》完成歷史使命

中國政府在全國人大會議上,宣布徹底落實九年義務教育,免除農村學生的學費及雜費。溫家寶總理承諾,“要讓每一個農村的孩子上得起學。”昔日《重返校園計劃》一直堅持的夢想,如今業已成真,我們在此也欣然宣布,2007年6月底,即完成2006/2007學年後,《重返校園計劃》功成身退。

《重返校園計劃》於1994年起肩負扶貧使命,致力為中國貧困山區的失學兒童提供上學讀書的機會。13 年間,承蒙逾 28,000 資助者參與善舉,共籌得資助款港幣 1.26 億元。共計幫助超過 10 萬名貧困孩子完成小學教育,資助地區遍佈全國 13 省 93 個貧窮縣。我們衷心感激每位曾經參與此項計劃的資助者,全憑你們對貧窮學子的關懷和慷慨扶持,才能圓了這麼多孩子讀書的夢想。

今後,我們的資助重點將會投放在高中生、大學生和生活困難的孤兒上,也將繼續重建危校,為中國的教育事業出一分力。我們相信,教育,改變孩子的命運,也在改變國家的命運,深願中國一天比一天富強,繁榮和幸福!

衷心感謝每位支持重返校園計劃的朋友!
查詢熱線:2136-3131

8位助開既小學生有阿公認頭,當然係好事。不過真係無諗過,做善事都會有計劃終止既一日。

下一個收益單位會係邊個?

雖然臣哥唔贊成,但我想捐「愛護動物協會」(SAA)。臭烏係我細細佬,佢既同類即我既同類;做善事唔應該有"種族歧視"。

孖寶駕到

今日除左國寶606同610到港外,同期到港既仲有三舅父同老細阿John。

三舅父as usual一見面到走一刻都未停過講公事;對著食飯真係會消化不良架。

阿John下午由機場趕到,凳都未坐暖,午餐都未有時間食就開波連見兩間廣告公司;見佢一臉倦容真係覺得做GM都唔係咁風光,體力同精神少d都頂唔住。

一口氣見完Bates同Maxus,余經理接棒帶佢地出去market visit;我就開夜趕工改三舅父臨時吩咐既powerpoint。

累。

聽朝早d返去執埋佢,一個人留得太夜會好沮喪。

盛八

日本同台灣都試過「牛角」燒肉,香港呢排好似興起日本化既韓式燒烤;上星期余經理試過「和幸」話唔抵食,今日放工後同卡生去另一間「盛八」試一試。









位於銅鑼灣Sogo對面,One2Free隔離上樓舖。

晚市分兩輪,我地係第二輪8:30pm

地方唔算闊落,而且兩個人都係坐長bench用木屏風擋一擋;甚有新宿既寸金尺土feel。食物$50-$70,算細碟;不過味道唔錯特上一口牛舌,鹽燒牛裡肌,汁燒牛肋骨,辣味雞柳,辣味豬肋骨,香草羊排,白菜泡菜.......最後黎個和牛炒飯。









開左枝大清酒,名稱叫"李白"日本人真係攪鬼,用一個中國古代alcohol addict黎做品牌。

Farewell發哥

發哥真係叫做睇住我入惠氏。佢係負責行trade(即藥房)既;大大話話都相識左11年。3年前restructure,轉過裕利trade team,一樣係serve惠氏;雖然叫做換左公司,但都係indirectly report比我地。

做到月底就另謀高就既佢,今日去「鴻星」同佢farewell。

余經理同佢更是"相識於微時"(即大家都年少氣盛既時候),淨係跟唔同行家同佢farewell,都食足4-5餐。轉工啫,又唔係移民,同行要約出去雀局真係毫無難度啦,駛唔駛咁誇呀?

我對發哥印象最深係8年前公司incentive trip去拉斯維加斯,得我同發哥唔去大峽谷,佢跟住我行之餘,惰後兩個街口;無耐更頂唔順返房。當晚同房同事返到去,見到一入門口血跡以為發生血案..........原來係發哥跟唔到我急速既步伐,攪到痔瘡爆(哈哈,好彩發哥唔睇呢個blog)

火曜日, 4月 24, 2007

華麗一族








日本剛播完,無線收費台就接住,真係追得貼。

我呢d日劇擁躉,點會放過呢套TBS電台55週年大作呀。除左木村呢個主打外,其他既配角好多都係一線明星。場景真係名附其實既"華麗",尤其是大家族住個豪宅。

改編自「白色巨塔」作家山崎豐子顛峰代表作,赤裸描寫金融風暴年代,政經界與財團間的種種陰謀、權力、策略、野心與背叛。對於60年代既背景,我本來興趣唔大,但睇得出落足本去拍,製作一絲不苟。

多得奶奶相借,仍然努力中。

月曜日, 4月 23, 2007

唔係肯比錢就得?

今日同Ivan開會開足一day。生意唔好,自然多野傾。

上星期同余經理諗明年對策時,提議可否明年響屈記萬記比錢加facing,或長租一整個架位放Centrum/Caltrate,余經理答覆好攪野:

"阿大小姐,唔係你肯比錢就乜都得。就算有位,都唔可能長租比你,佢地有咁多品牌;你估嗰度係你屋企咩?唔通我比錢你,話長掛條底褲響你屋企一年,你就一定肯架啦?!"

哈哈哈哈哈。

余經理,睇幾多錢啦。如果你比一百萬我,我話知你掛到我屋企萬國旗一樣,我無任歡迎呀。

日曜日, 4月 22, 2007

梁師奶的Impulse Purchase

大除夕晚既impulse purchase:沙田偉華中心17樓,400幾呎單位;三月初交吉,細佬同女友都入左伙成個月,我今晚先至第一次見到

同上次買新都城唔同,今次由見地產經紀,簽約,搵律師,申請水電差餉,至驗樓交吉都係阿師奶一手包辦;我全程都無參與過。

新城市廣場上蓋,地點算好方便。單位雖然面積唔大,但間格實用;而且上手d入牆櫃唔老套

望出去見到山景,起碼都唔係對晒樓。

不過以梁師奶"百彈齋主"既本色,一入屋就不停咁complain:浴缸頭髮唔清理,仲未買床架,d雜物仲未執晒,唔開大隻窗扯風.......開個電視比佢叫佢坐低先,一句車埋黎"我唔係特地過黎睇電視架!!"就繼續鬧........

可憐一旁,尋日食錯壽司出現"噴射式嘔吐"(都唔知是否中洛沃克病毒)既Sharon,面青唇白都要聽梁師奶發癲。

不幸中之大幸係,全個過程只係10數分鐘,佢就比我地的落樓下食飯喇。