連我都無

今個月響萬寧買善存送全盒。CD咁大size，雙層。難得連我自己都覺得幾靚，諗住囉返個比梁師奶，點知…..2500個一下子比萬寧掃晒!! 就算賣唔晒回貨都係新年後。

頂，個個唯有對住公司碩果僅存既辦望梅止渴。

所以各位對呢個gimmick有興趣既blog reader，問我都無用，因為連我自己都無。由即日起至2月22號，去各萬寧買善存滿$100，就可以獲贈呢個全盒(哈，廣告時間)。

我同Daisy講，下次訂野唔好落個數咁齊整；例如order 2508個(我地公司8個人)，一定有尾數箱剩!!

Omurice



Michael升職，點都走唔甩被屈請食飯既命運。我地都已經手下留情，揀左太古城既Key West Café食晏。

呢間野d西餐一向都麻麻地。誤打誤撞響a la carte menu度叫左個蛋包飯，估唔到有驚喜!!

香港真係未食過似樣既Omurice；而且似乎間間都只係識落茄汁。學到個外表，而做唔出其神粹。攪到我上次去新宿Lumine既omurice專門店，好似餓狼咁食到照鏡!

Key West既蛋包飯，面層既蛋仍然有d半生熟，唔會太乾。最掂係附上既啡色醬汁，一聞之下，佢地竟然識用正宗既Hayashi Sauce!!

呢味蛋包飯，足以為平平無奇既Key West加分。

酸既朱古力

一向好怕太甜既朱古力，對白朱古力更是敬而遠之。近排食得dark chocolate太多，有d悶；好彩比我發現呢款新出既明治士多啤梨朱古力。

內含70%果肉，入口唔覺甜，只覺酸；非常正!!買完一踏出門口，就忍唔住拆開黎試；一食就係6粒添!!

我份人比較鍾意"呷醋"，食薯片至愛Salt & Vinegar，食麵必勁落醋......都未寫完呢個po，又再開雪櫃食多粒....哈哈哈，推介!!

唯一唔正常既係HDL

今日收到lab report，as usual，所有野都正常；唯一out of range既係高密度膽固醇(HDL)。

Cholesterol (T) 總膽固醇 5.7mmol/l (正常 0.0-5.2)
HDL - cholesterol 高密度膽固醇　1.7mmol/l (正常 0.9-1.4)
Triglyceride三酸甘油脂 0.8mmol/l (正常 0.3-2.0)
LDL-cholesterol低密度膽固醇 3.6mmol/l (正常 0.0-4.1)
VLDL超低密度膽固醇 0.4mmol/l (正常 0.2-1.1)

一般人都只係睇總膽固醇T，但其實唔可以忽略既係呢隻好既HDL；因為心血管疾病既指標係T/HDL ratio。而T只不過係HDL+LDL+VLDL既總和；如果只係睇T，會有誤導成份。

簡單易明既講解：
http://www.exrx.net/Testing/LDL&HDL.html

我個case，總膽固醇高完全係因為HDL高，所以連醫生都叫我唔駛返去覆診。余經理仲話，估唔到我個人唔只外面怪，連裡面都怪！

既然膽固醇同腎功能都正常，咁點解會血壓高？

唯有mon多一段時間再算。

Rice Paper

又係被梁師奶拋棄既星期一。









約左卡生同佢老友Amy去世貿中心Rice Paper。呢間野我之前只係黎食過下午茶，覺得環境同食物都幾OK。難得有一間我推介既餐廳，而成晚卡生係一句都無彈過既。

初初book左埋邊4人桌，後來可以比我地移到海景既窗口位，個night view殺晒啦。

食物抵食過Lanna，係越南fusion菜。我地叫左：燴牛褪，鳳梨燒鴨沙律，野菇翡翠苗，蜜汁烤雞配米紙卷，牛七味(牛丸，牛餅，牛肉卷，蝦片牛鬆，蒜片牛柳粒，牛肉粥，牛火鍋)。係食個rice paper時有d手忙腳亂，因為塊米紙遇醋變得太軟，好易爛。

再開多左一枝紅一枝白，唔經唔覺又11pm；聽日仲要返工，唔敢hea咁夜。

真係化

阿丁剛call我，話我知許瑋倫剛剛死左。

我第一個反應"唔係掛？"隨即諗到：元暢咪好傷心？佢地兩個咁老死。

許瑋倫19:37宣告不治

前天深夜發生嚴重車禍的藝人許瑋倫，在今天傍晚17:09心跳停止，醫生緊急急救無效，於19:37宣告不治。

警方說，許瑋倫（27歲）前晚11時15分搭乘助理林怡妏（25歲）所駕駛的MINI Cooper自小轎車，行經中山高速公路南下三義下坡路段155.6公里處時，撞到內車道護欄後，「彈」到外車道與路肩間，遭後面大貨車高速追撞，轎車嚴重扭曲變形，幾成一堆廢鐵，許、林兩人由三義消防分隊與三義民間救難隊的救護車載往台中市澄清醫院急救。

醫院於晚間8點半召開記者會，醫師表示，由於腦部水腫以及血中氧氣下降，造成許瑋倫心跳停止。醫師經過兩個多小時的搶救後，仍然無法挽回許瑋倫的生命。

雖然唔係特別喜歡佢，但都覺得佢係一個幾靚同爽朗既女仔。而且又同仔仔傳過緋聞，加上有係元暢同小美既老死，點都印象深刻d。

真係化，27歲剛大學畢業，家境富裕又當紅，趕往出外景途中就返唔到屋企.......

Borderline High

自從兩年前發現有間歇性血壓高之後，每隔幾日都會幫自己量吓血壓。

近呢個星期夜晚既血壓都係140+/90+，雖然朝早同下午會低番ｄ(125+/80+)，但因嫲嫲、大伯、二伯都係心臟病死，自己點都要小心ｄ，今朝襯得閒去睇醫生。

飲完杯咖啡，9:30am就步入城市花園商場既陳家馴醫務所。平時少病痛既我，都好幾年無去睇佢。話就話我之前食過兩個星期血壓藥atenolol 50mg，其實自己都識去藥房配，但唔想因為識少少就自己斷症，self medicate.....好容易mask左嚴重疾病既symptoms，都係聽醫生建議，聽朝空肚去驗埋血脂同腎功能。

因為係borderline high，所以暫時唔駛食藥；不過要注意下壓。

真係要收斂吓自己"煤氣爐"一樣既性格，哈哈。

無厘頭既Line Extension

通常一ｄ知名品牌，都會擴大自己既product portfolio而出唔同既line extension。

自從我比人話得多唔出街之後，家陣經過都會間唔中巡吓舖。今日比我響樓下萬寧見到呢款"雲南白葯牙膏"！

銀色磨沙包裝，雖然係國產貨，都高貴過貨架上既其他牌子。佢價錢都勁貴，減價都成$36；仲貴過我托人響英國買枝Mentadent。

睇佢個盒，只係普通牙膏一枝：採用現代高科技開發，以國際先進護齦固齒配方研究而成，用後口氣清新，保持牙齒牙齦健康。真係諗唔到同出名止血掂既雲南白葯有乜關係。

應該加多個selling point係專對抗易出血牙肉呀嘛，哈哈哈。

Blood Diamond

卡生既"業界"今晚10pm響UA太古城攪左個免費show睇Blood Diamond。

雖然唔駛錢，地點亦就近廣告公司臨立既太古坊，但全場都只係得一半滿。裡面全部都係agency既人，我呢個"client"頓變成攀車邊；哈哈。








套戲頗長，足足2.5hrs；不過故事幾好，亦無乜冷場。最頂唔順有一半時間係槍林彈雨同血腥中，而發左福既DiCaprio簡直比007更利害，有打不死既特異功能(定係學漫畫中有結界保護？)，直至最後10分鐘至中槍。不過佢同黑人之間既友情，黑人既父子情都係主導套戲後半既精粹。

非洲人是否因為呢ｄ碳既結晶體而互相殘殺，就真係不得而知。去過南非既鑽石廠一次，得知原來ｄ鼻屎咁細既鑽石皮(即MaBelle, My Jewellery好常用既1-2分大細)只係值HK$5粒！講到尾，鑽石都只不過係閃令令既碳。

哈魯邦









卡生呢兩日勁忙，唔會好似平時咁早收。

等到佢8:40pm忙完都唔可能走得遠去搵食(因為要趕10pm睇戲)，所以去太古城既「哈魯邦」食韓國菜。

閒日晚市有ｄ二人套餐都唔係貴；$260 Set有石頭飯，辣海鮮豆腐鍋同鐵板烤肉。再叫左枝好重人參味既韓國酒"百歲酒"，算易入口，我以為自己飲緊凍參茶。

呢度夜晚比食晏時份多韓國人幫襯，食物水準都唔會輸洩比老銅既韓國菜。不過我地趕時間，所以有d狼吞虎嚥feel，哈哈。

揍仔









可能前世欠左佢既。

Hudson哥夜晚要做佢MBA Marketing Management既group work；早幾日已經開始同佢度個discussion。今次係講airlines，連卡生都有簡接幫左佢一把，解釋番budget airlines既細節。

條友唔殺到埋身都唔做，結果下午閃過黎我地conference room先至開始落筆打!!

我除左盡地主之誼，斟茶遞水幫佢叫外賣，仲不時充當免費顧問。

放工後更忍唔住頸坐喺旁邊篤促，迫佢專心d老作。我簡直覺得自己似個阿媽篤住個小學生做功課；我諗Daisy響出面聽到我"教仔"既語氣一定覺得似曾相識。

哥仔，呢鑊とん吉既炸豬排你抵請啦。

打機送飯



YY新買左部Nintendo Wii，今日特地帶返黎lunch時比Debbie & Daisy兩個體驗吓。

於是幾條女就叫外賣返黎匆匆扒完開場。









佢地手握remote，對住個電視打boxing，保齡同網球，打得手舞足蹈，興高彩烈。我只碌左一球lane，哈，估唔到我打假波比真波出色。

一個鐘頭落黎，Daisy已經心思思想買喇；真係名符其實既trial purchase。

鄉下祖屋



之前成日聽d堂兄弟發牙痕話要返鄉下尋根，我一直都無理佢地。

今朝收到溫哥華做建築師既堂大佬Albert既email，原來早前佢個project contractor帶同妻小返鄉下時，順道去我地祖屋影相。

呢間野叫“挺秀樓”，位於開平的赤坎鎮，沙溪附近。整棟建築都係梁氏所起。聞說當年曾祖母試過背後揹住個嬰兒，響４樓陽台開槍抗土匪！（堅呀，果然係我太嫲）

呢棟樓家陣已經受政府保護；好似有人嘗試向UN伸請列入World Heritage Site…..

我睇到張相既第一個反應係：點解咁似羅密歐與茱麗葉既陽台？!

都係Martha夠"飛屎"

Hudson哥升左職成3個月，都無請過我食飯。反而早前Martha響走廊撞到佢，死仔就二話不說，自動獻身請晒我地成個division食晏。我點都老屈佢請埋YY。



一行8人去王家沙。

哥仔你既然咁有誠意，我地一定全員到齊兼唔會同你客氣。最衰呢個火瞳翅要預定，否則……..哈哈哈哈哈!!!!!

(Michael放心，自己人我地會錫住你荷包既)

2007灣仔節

下午放假，阿丁契哥臨時醒左兩張今晚大會堂「2007灣仔節文藝綜合大匯演」既飛。雖然大家都唔係太知係ｄ乜，約埋去睇睇無妨。

響大會堂樓下美心快餐隨便醫肚，7:15pm就去演奏廳入座。

基本上係灣仔區文娛康樂體育會主辦既，放眼望去，大部份捧場既都係上左年紀既"街坊"......

司議係張國強同祝文君。頭半個鐘都係ｄ好悶場既致詞及扮紀念品；我唯一認得既係范除麗泰同黃英琦。

比較特別既係請到大陸既方錦龍，連同佢既女子樂坊表演中樂；當中既「十面埋伏」又真係幾精彩既。

除此之外，都有ｄ地區團體舞蹈表演，合唱團等。亦都有請ｄ二、三線星仔如王俊棠，寶佩如，袁潔兒等唱歌。王俊棠著到成個ＭＫ大佬咁，黑色釘珠片西裝，左耳勁閃耳環，再加個局部金毛.....娘爆。我真係忍唔住笑出聲！！張國強就一邊控球一邊唱「愛拼才會贏」。

成個program好長，睇左兩個半鐘都係去到2/3。我同阿丁等唔到謝雪心唱粵曲就閃。

呢類現場表演，我都係第一次見識；對我黎講有ｄ另類，不過有趣。

Cool Slideshows

泰昌沙翁+Paris Cafe

一場黎到中上環，Annie再帶我地經過埋有名既「泰昌餅家」。我地無買鎮店既蛋撻，反而買左家陣新式餅店好少見既糖沙翁。第一時間就響門口將佢"就地處決"！雖然唔熱，但都幾香蛋味。

未食飯都飽左一半。

行去文咸東街既Paris Cafe黎個平價晚餐。









呢間連鎖店我都係第一次幫襯。叫左個司華力腸拼炸蝦意粉，味道普通啦。我叫佢地ｄ意粉唔駛咁熟時，班女個個愕然；最怕ｄ港式意粉煮得太諗，發到成條烏東咁粗，一ｄ咬口都無。

食物係其次，呢間Paris Cafe係地舖而又無乜人，所以算幾好坐。過黎吹吹水都係一個唔錯既選擇。

玉葉甜品

又係被梁師奶拋棄既星期一。









約左兩位Annie同Moly食飯。

今晚唔係hea開既老銅，而係殺入中上環，全因為要帶我黎呢間位於中環伊利近街既「玉葉甜品」。 呢度係名符其實既路邊攤，而且係斜坡！ 好在我地坐響比較平既一張枱，否則真係要紮起個馬黎食糖水。









Annie極力推薦凍海帶綠豆沙；差不多半碗都係極大塊既厚海帶，好彩一ｄ都唔覺腥。雖然係中環，因為街邊檔既關係，一碗甜品都係$7.5咁大把。我地再share多客好耐都無食既糖不甩，已經唔再理之後有無胃口食飯喇。

[MV] 專屬天使 - Tank

今朝等"花樣少年少女"第10集既BT出，load得黎再睇埋都成5點。太眼訓既情況下，都係告半日假。

呢首係片尾曲，MV有好tomboy既Ella同Charlotte既新歡吳尊。

Charlotte，不如你睇吓2月2-5號飛輪海有無公開活動，幫你囉個簽名啦(順便幫你去握埋手添，哈哈)

MBTI Test Result

由Damon哥個xanga度click黎玩。

以下係我既result；我係ISTJ人：

http://kllc5.xddddd.com/mbti/result.php?token=367dc0d6a84141f7a8c2078fa0e32380

美善同道

既然一場去到，無理由咁近都唔順便行返舊居望一望。

我由出世到88年移民前都係住響呢度：美善同道25號三樓。

千多呎既政府樓，一梯一伙；4房另有工人房同工人廁所。個客廳大到可以比我同細佬小時候踏單車。

以前我都有問點解老豆唔揀九龍塘公爵街既Quarter要揀土瓜灣，原來當年揀樓既時候佢人響英國深造，結果交托比個朋友揀。無所謂啦，住慣左樓下好多巴士超方便；係入夜後就靜ｄ。

唔係住得咁近我都唔會讀協恩。

Cool Slideshows

舊面孔









臨走時仲捉住當年既中學校長Mimi Lai，同魔鬼體育老師Miss Ip影相。

Miss Ip點樣魔鬼法？

當時好多女用period做藉口黎唔上游泳堂，呢個變態肥婆就的晒ｄ女入更衣室逐個要"除褲"驗！哈哈，我有一次原本都想偷懶溫書，結果收到風立刻問師姐借泳衣跳落水.......

協恩當年好著重運動會既成績，不時跑山，放學要練3hrs水係閒事。比賽成績唔夠KGV/Island School呢d英童學校，但DGS係我地既死敵。如果你發覺d協恩妹個個粗粗魯魯，全拜呢個肥婆所賜!!

泳池

我就係響呢個25m既泳池度學識游水架；而家睇番就當然覺得殘舊啦。

女廁

20年不變，非常懷舊。

簡直好似Harry Potter Chamber of Secrets電影裡面，moarning Myrtle藏身既女廁一樣!!

如果入夜後，相信唔駛加效果，都可以拍鬼片。

校舍

小學就真係每星期見一次家長(所以梁師奶當年知名度好夠架)。上堂食糖小息時被罰企一星期，至出貓(係我識而出比人)唔識死仲對住先生嘻皮笑臉，結果記大過.......壞學生既典範。如果而家仲有老師記得我，一定唔係好野！

中學印象只有2年，但當時我乜鬼都有玩：籃球，排球，劍擊，游水，Choir........當然成績中上(兩年都係成績最好既A班)，但操行麻麻啦。

幼稚園，小學同中學既Gym都係新校舍；其他既中學課室，實驗室，禮堂，甚至女廁都係20年不變。

我地閃左上去周圍影相，過足懷舊癮。

Cool Slideshows

闊別20年-協恩









如果唔係Ellena提議一齊返協恩Fun Fair睇吓，相信我都無咁神心重回無返成20年既母校。









Fun Fair原本係為左興建泳池而籌款，我F.1時係第一屆。當年我呢個活躍份子當然係攪手之一，攤位亦係小弟既idea："1A拉麵".....哇哈哈！！

我由幼稚園低班，小學，讀到F.2先至去英國。聞說當年細個考幼稚園時，十問九唔應，可能個老師會以為我係智障既添。如果唔係當時我大伯響中學教Bio，睇怕我都入唔到學。

努力為「白塔」埋尾

多得Charlotte借我台版「白色巨塔」既DVD，等我的起心肝今日努力煲埋後面十幾集。可以舒舒服服窩響梳化度，唔駛辛苦地痞響電腦前睇視頻，都係驅使我唔想比呢套戲爛尾既原動力。











費翔真係好難頂！

無疑佢雖然年紀唔細，輪廓的而且確仲係幾型。但最難頂既係，佢太賣弄"我仲係好鬼型"既神態........任何人如果太自覺地做出黎既行為，就會比人唔自然既感覺。









都係覺得全劇最正係戴立忍；做戲唔過火之餘，真係幾型架。唔怪得知言生早年成日話想同佢對戲，可以從中偷師啦(不過我睇言生響呢套戲既表現，似乎佢既悟性唔高；捉到鹿都唔識脫角)。

漫漫長夜，有枝Shiraz相伴，繼續努力中；希望速戰速決，等我快快開過套新日劇。