La Vie Avec Amusement

木曜日, 11月 30, 2006

ICHIRO

剛煲完「宮」,終於都回歸日劇開左套問奶奶借既「古畑任三郎 - 2006新春特別版」。呢套係日本長壽既偵探劇,每個單元殺人事件,都會最終由一位"懶有型"既伯父偵破。

今次第二個單元竟然扮演凶手既係知名棒球員Ichiro!!

好少見真正運動員會客串電視劇,香港既方力申就同人地既知名度差好多皮啦。Ichiro同中田英壽一樣,都係海外知名度極高既日本運動員。而且另一個共通點:就係我覺得佢地兩個都好鬼型仔!!

中田家陣去意大利踢波,而Ichiro就響西雅圖為日本爭光。唔知幾時論到Nakata溝少陣女,返老家客串套日劇呢?

要轉電梯交水費

德宏6樓裝修真係裝極都唔完。今朝收到太古management打電話黎話我地呢層12月中開始要翻新過男女廁!仲要整成兩個禮拜添。

成層得番Executive Toilet同殘廁兩格,真係爭崩頭咩!

佢地仲懶好心咁offer我地可以共用16/F既廁所,真係咪玩啦,我地呢度電梯只係去到15/F,即係話要去「揸水」時,要先落樓下過隔離轉電梯!煩唔煩d呀

而且according to阿謝居士講過,公司附近成日裝修都係會影響我地生意。雖然小弟唔係太信邪,但余經理勁信呀嘛。

今年已經左右隔壁幾個單位先後遷入裝修左幾次,估唔到年底最後既兩星期都會動土,真係唔到你唔認黑。

水曜日, 11月 29, 2006

穿間條tee的烏烏









唔係"穿prada的惡魔",但我都係呢個"穿間條tee的烏烏"既奴隸。

呢兩日轉涼,梁師奶怕佢夜晚會踢被,將佢套入件tee裡面等佢唔會凍親。加上佢今日比師奶自己修剪過黎,d毛一岩一忽,望落成個伯父咁。 當堂老左幾年。

所以髮型唔只影響人既儀容,對狗都一樣。

離晒罩

通常呢個term係用嚟形容d女,明明32A又不自量力帶個36D既"薄咯",就會出現呢個效果。估唔到,呢個term今日都可以用響我枝「樂必治檸蜜味喉糖」身上!!


新到既shipment,formulation雖然有d唔同,但美國廠方從未提過話連size都短左。今日一拍埋,"仆街"兩字真係衝口而出!!直頭好似比人偷食左一粒咁呀。個包裝紙好似d糖著左件唔岩身既衫咁。勁肉酸。

通常呢d情況,屈臣萬寧班"冚家ling"(學余經理口吻,小弟無咁粗俗)一定會迫我地換晒舖面d貨。就算落足咀頭講得掂唔駛換,比佢屈幾皮野admin fee都睇怕走唔甩。

真係流年不利,Centrum/Centrum Select都轉過兩次裝,唔係退貨就比錢。睇黎唔只我今年犯太歲,公司都一樣犯太歲......

火曜日, 11月 28, 2006

通緝薑餅人

聖誕飲品Gingerbread Latte, Toffee Nut Latte & Peppermint Mocha都已經推出咗成2個多禮拜,我每年期待嘅薑餅人就遲遲未見蹤影。香港Starbucks website內有呢個item,但其他應節食品如Mixed Fruit Nut Cake, Espresso Eggnog Cake & Toffee Nut Muffin都上晒架啦,唔通真係搵薑餅人做壓軸咩?

http://www.coffeeconcepts.com.hk/xmas06/cn/xmas.asp

平時唔係太好gingerbread cookies嘅我,唔知點解對薑餅人情有獨鍾。尤其是香港Starbucks出品,通常都會係我12月份day day用黎送咖啡嘅早餐。肚上隻隻黐嘅聰明豆都唔同顏色,所以每朝食落肚既薑餅人都變得無咁generic。

以下對白,熟於PG家長指引,哇哈哈:

我會先從個大頭度狠狠地咬斷佢(同擋雞一樣,等佢早d斷氣)再食埋對沾滿糖粉既腳,然後對手(有d似滿青十大酷刑嘅"五馬分屍")最後就係個身........

唔通我真係要聽日打電話去Starbucks寫字樓詢問佢到底幾時先捨得出薑餅人?

月曜日, 11月 27, 2006

金山樓

佐敦係細Dee行嘅區,佢帶路去吳松街一間夜晚通常排晒隊既「金山樓」食小菜









我地被安排上到閣樓坐。隔局似d打冷地方,但見外面海鮮幾多;細Dee提議既"砵酒焗生蠔",都真係算幾得。而老版推薦既"雲英雞"(佢話係未"開心"過既雞喎,哈哈),亦都夠"嫩口"喎。









不過其他d就無乜驚喜喇:焗魚腸,辣酒煮花螺,蝦醬啫啫生菜(呢味最離譜,個鍋係凍嘅),金銀蛋豆苗,中式牛柳,蒜蓉粉絲蒸鮮魷,XO蘭度田雞帶子。

隊左6枝大喜力,埋單都要$900+,比想像中貴。

好彩早收工早開飯,食飽飽收檔都係8pm;初初仲以為會變宵夜添。

攪笑錄音

因為年尾表演雪姑要用國語對白,無乜可能要班同事玩Live,所以book咗6pm Studio事先錄好d對白,加埋音響效果,到時咪咀算數。

間Studio叫Music Corner,位於佐敦地鐵出口附近。面積比想像中細好多

房門有雙重隔音,裡面其實只容納到一個咪,幾張凳同一個大鼓。









我地5個小矮人先入去錄左一段開場,之後輪到扮公主既Michael同巫婆Johnny嘩佢兩條友錄出黎既效果,簡直似泰國人妖版雪姑!我地喺出面聽都笑到彎晒腰,到時阿Paul三舅父佢地實比我地d半鹹淡國語嚇到噴酒都似。

因為唔需要個個字都讀到字正腔圓,少少歪先至更爆笑(好似喬寶寶講廣東話咁),所以唔駛好多take就可以收貨。

初初以為會攪好耐,等我地仲喺office隊咗兩串魚蛋+豬仔包至出門;點知唔夠一粒鐘就攪掂。

過幾日仲要黎多次聽mixing。

日曜日, 11月 26, 2006

去「鴻星」探病

之前梁師奶都有閒日去跑馬地五嬸嘅住處探望過佢幾次。我就自上次醫院見過五嬸後,連五叔自溫哥華返埋黎都一直無再見過。

襯剛北上去上海轉工嘅堂妹,週末返落黎約咗佢地兩老,加埋堂大佬一家去時代廣場「鴻星」飲茶,我就出席當去探病。

做完body massage沖埋涼,頭都未吹就飛的趕去;總無理由要長輩等。

開始化療嘅五嬸,面色比初回港時灰暗咗d;講說話亦都慢咗。每星期都要返醫院抽肺嘅積水,仍然不時咳嗽。家陣訓覺已經差咗,但襯仲食得走得(雖然動作慢d),都應該出院享受吓天倫樂。似乎每個癌症末期病人都會經歷呢個過程,遲d要長住醫院嘅時候,想再出去感受吓陽光都無可能。

希望五嬸可以盡量享受剩餘嘅日子;香港仔女同對孫都喺身邊,點都好過呆喺4pm就天黑嘅溫哥華。

薑汁按肚?

今朝body massage唔係去慣常嘅合和做,因為間嘢喺城市花園商場開咗間新分店,無理由咁近唔試試佢。

新開張嘅關係,除咗平時90mins嘅兩part body massage之外,仲送多15mins薑汁按肚。以前試過熱既薑包,最多都係有薑汁啫,今次有埋生薑蓉,仲古怪!

平時按摩落油就話等個美容師易推d,但落薑就唔知係乜嘢理論。

我訓響床上被佢用薑蓉塗抹嘅時候,簡直似d被醃入味,就黎送入焗爐(Sauna)嘅燒雞!

土曜日, 11月 25, 2006

Made in UK既Mentadent

剛由London出trip返黎既Annie,竟然喺Boots幫我搵到用開既Mentadent P牙膏!而且仲要係自細見慣既packing,同阿余經理早前由芝加哥帶返黎既美國pump款,親切好多。唔係誇張,簡直好似故友重逢一樣。


早兩年有人猛幫我喺英國Boots搵咗好耐都無功而回;如果呢隻嘢家陣relist返,以後就唔駛咁惆悵,可以託人幫我入貨。

Rice Paper









出去Sogo逛左一陣,4:30pm約左奶奶,Connie & Annie去世貿中心4/F Rice Paper









呢間越南菜館裝修得幾有特色。我地4條女安排坐響對海半圓形梳化位,黃昏時甚至可以睇到尖東亮聖誕燈添。
有一度菜真係要用手將d餡料包入rice paper內,但因我地只係下午茶,所以只叫左3樣小食:燴牛腿,雞肉沙嗲,烤揶絲柚子沙律。

當然我同奶奶都會黎番杯滴漏既越南咖啡啦。加入煉奶既越式咖啡,對於我呢個平時隊啡唔落糖既人黎講,確實係甜左d。

臨走時因為入黑,點上蠟燭,幾好feel架。

應該搵日黎食夜晚。

松記甜品

卡生帶我行左一個圈佢屋企樓下,果然係有成三數間7仔&Circle K喺附近,駛唔駛多成咁呀?

去咗間出名既「松記」食甜品。聽講呢間舖一到夜晚就大排長龍,見下午人流唔多我地先至入去。

我叫左碗"雲石豆腐花",其實即係黑芝麻豆腐花。淡淡既黑芝麻味,不過勁滑。

唔受得牛奶既卡生,竟然挑戰自我極限地叫咗碗"芝麻薑汁撞奶";賣相其實唔差,不過佢嫌太無口感。我覺得其實係佢第一次食薑汁撞奶,唔知個texture係咁啫。

Le Petit









一向比區外人既印象都係黃金商場同鴨寮街既深水埗,估唔到轉兩個彎既內街保安道,都會有一間細細既法國餐廳Le Petit。如果唔係有卡生呢個老街坊帶路,我自己一定唔識摸到黎。

舖面唔算大,只可容納十來張細枱。但環境乾淨,亦都有注意到餐具既details。午餐menu唔貴,由$38-$68都有。












我地坐近窗邊,各叫咗個$68Lunch Set;我既選擇:Paté+Green Salad, 蝸牛,香橙燴鴨胸,熱咖啡。

份量唔算大,味道中規中舉。咁既價錢,算得上value for money。

呢度同出面外街充滿男人既茶餐廳成強烈對比。

金曜日, 11月 24, 2006

話梅粉
飯店門口放咗10數枝包得懶靚,實物成枝茶餐廳胡椒粉咁,賣$68樽。我見到隔離display「女兒紅」,以為只係用黎灑落花雕、加飯呢一類紹興酒內。當上飯後西瓜時,先至知同時可以灑落西瓜上,有如灑鹽一樣,用黎釣出西瓜既甜味。

多唔多話梅味?要灑到好多先至覺囉,咁就$68就真係有點兒那個。最貴既銅鑼灣「么鳳」$50一兩話梅皇,都有6-7粒;計落都未必有呢樽粉咁貴。

香港老飯店









月頭生日既Mion姐,一路都夾唔到佢個期,今晚先至約到出黎食飯。

阿二老細醒咗$300「香港老飯店」coupon比佢,我地就叫大圍過黎屋企對面,電器道麗東酒店地庫呢間歷史悠久既上海菜館。

餐牌一d都唔算平,最離譜係"蠔油西生菜"都收$80!雖然都叫做酒店啫,咪當自己真係「夏宮」咁既級數先得架。地道上海人既阿二發板:醬爆雞丁,百葉紅燒肉,茄汁蝦仁鍋巴,沙鍋豆腐。









中環做大秘書既Marinda,為咗等個hotel confirmation,成9點先至飛的士趕到黎。我地再追加咗津白肉絲炒年糕同菜肉雲吞

唔係話唔好食,但呢個價錢,無coupon就會覺得唔值囉。唯一嘅好處就係超近我屋企。

「來記」叻沙
估唔到車仔麵都有叻沙叫!!

食晏時卡生帶路去水族館商場旁邊一間叫「來記」嘅車仔麵舖,見佢一揭餐牌,我就知點解帶我黎喇:竟然有叻沙米既套餐叫。

香味OK,但我覺得唔夠辣。都係搵日過佐敦再試一試比較吓。

近排食多咗馬來嘢,都仲未去返「馬華」試;呢間細個成日幫襯既老店,唔知仲有無當年水準呢?

新天星碼頭









既然去到海運,與其行九曲十三彎既隧道去地鐵站,我選擇左吹一吹海風,坐天星小輪過中環探一探個新碼頭。

細個成日同老豆坐,每次都係上層既船頭。有一次Daddy剛買左個single scoop雪糕比我上船食,點知我都未行到去坐定,個雪糕球就跌左落地上!手上得番個cone既我,仲要勞煩老頭子安慰一番。

自己一個坐船既十分鐘內,特別掛住佢。

新碼頭位於IFC對出。少左一份親切感,而且都行成10分鐘先至落到地鐵。如果係遊客既話,出左閘對住個冷清清既巴士站,都幾無引架。

海運大廈燈飾









路過隔離海運大廈,被佢既聖誕燈飾吸引。華麗得黎唔覺俗。

好多年無黎呢度睇聖誕燈啦,對上一次係N年前同前男友任先生12月23日迫迫吓拍住拖黎;咸豐年代既事。

到處開始上聖誕裝飾,不過點都唔夠東京既燈咁有心思;尤其是六本木山既藍白細燈泡掛滿一街既樹,係我既至愛。

http://www.roppongihills.com/jp/events/christmas2006.html

搵到條好佬既話,真係要聖誕的佢陪我去東京一趟。

木曜日, 11月 23, 2006

堂家姐Elsie









準時放工即閃,因為約左親戚喺星光行北京樓6:30pm食飯。

住喺加州San Diego既堂家姐Elsie,襯美國Thanksgiving假期,帶同兩個女Emily & Stacy返黎申請身份證。同行既仲有佢阿媽,即我二伯娘(正室)。佢地只係匆匆返黎一個星期,要授權我下個月去幫佢地囉身份證。

Elsie年紀比我大一截,喺AT&T叫做幾高層,成日要週圍飛。姪女們Emily & Stacy好typical竹昇;Stacy智力好似有d問題,雖然成年,但身型神態一如小學生。

北京樓味道叫做OK,但價錢唔平,碟碟都閒閒地$180。我地叫左:宮爆明蝦,戈壁風沙雞(半隻),松鼠黃魚,麻婆豆腐,雲腿津白,同酸辣湯。咁大樓面,weekday都滿座,果然恆指19000+係促進消費。

窗外對住海景,我地睇埋8pm既「幻彩詠香江」先至埋單。

Diva Red

一落樓下就見到間叫Diva Red,幾人頭湧湧既pub;門口既然有張枱,就試一試佢。裡面剛好有人生日,加上幾枱都係識得既,超熱鬧。仲好啦,我地大聲d講野都唔怕嚇親人。壽星女仲請我地飲左杯香檳添。


唔覺唔覺,出黎都1:15am。我就一向係夜鬼無有怕,但卡生連續幾日夜浦就會病,上個禮拜剛病完岩岩先好番,如果再病我都過意唔去。 保重保重!!

Entrecôte












自從Entrecôte由食通天搬左去後街之後,聽阿Y講有d幾抵食既set,於是今晚約左卡生去踩場。

地方闊落左,燈光亦都無咁昏暗,但就無左以前法國味道咁重。有兩款套餐,我地各自叫左唔同既黎試。

http://www.wsentrecote.com/menu.htm












我既頭盤Seafood Platter有4隻蠔同3隻大螺鹹鹹既海水味,幾新鮮主菜既牛扒就一貫既水準,但d伴碟既薯條就無以前咁香喇。卡生為左就枝白酒,寧願叫炭燒三文魚。甜品就一般,但$300有找既餐,都算值回票價啦

本想叫多枝酒,但佢地收10:30pm。只好轉地方再續灘。

水曜日, 11月 22, 2006

Centrum/Caltrate索女Talent Close Up