La Vie Avec Amusement: 09/01/2008

勇闖"禁地"

呢個多星期，朝朝晨早dog walk後，就推住架車同烏烏落樓。

除左水靜河飛既Pacific Coffee外(梳化上既烏烏，不時吸引晨運阿婆同小學生同佢打招呼，今朝甚至有位兄台一見到佢，立刻返上樓抱兩隻BB狗落黎hea....)，平時狗狗止步既百佳，惠康，Circle K，同Panash麵包店都照入可也；無他，只要時間尚早，人流唔多，再加上我入去前將車罩拉上拉鍊，個皇帝仔又唔會出聲，店員都會當作時運高睇佢唔到。

烏烏可能係新都城屋苑內，知名度最高，兼橫行無阻既狗。

越玩越大鑊

由"三鹿"奶粉引發既三聚氰胺毒奶事件，影響擴散得越來越廣；由奶類大品牌如蒙牛，伊利，雀巢，到日本丸大急凍點心，家傳戶曉既大白兔糖.....家陣漫延到朱古力M&M, Snickers, Oreo, Cadbury同我至愛既樂天熊仔餅都有!!

都唔明：到底問題奶農有幾多間，點解牽連咁廣？

唔該，千祈唔好連日本固力果都有事呀；否則我都要去醫院同d細路迫驗腎了。

PS，家陣我依然一日兩餐牛奶公司高鈣奶溝cereal代餐，實在唔驚得咁多。

探監第二浪

繼尋日林氏一家，今日論到Connie & Jeffrey入黎寶琳探我監(其實係Connie想見烏烏至真)。

既然要帶阿烏參與，無選擇下都要去樓下商場有露天座位既"香辣屋"。下午茶時段湯粉或撈檬加杯飲品都係$28，小食$16，無加一，算幾抵。

Jeffrey係第一次見呢個皇帝仔，都話佢真狗比上鏡靚仔。不過比起波士同阿Moon既活躍，烏烏明顯地係位文靜書生；不時笪到實一實，成團綿花咁。

既然一場黎到，點會唔比佢地嘗試"放狗樂"呀(其實係我懶，想搵人幫我推住阿烏架私家車就真)；等Connie見識佢點樣一泡尿分幾次屙，周圍霸地盤。

林家探監

做左一個星期將軍澳師奶，林氏姊妹拖晒班細路黎探我監。

人多最方便就係去林家大佬工作既東港城「金滬庭」，因為實有位之餘，林大少一定會極"照顧"我地.....無計，唯有飛甩烏烏，無謂帶入去又要冒被趕出黎既危險；雖然班細路個個想睇烏烏...

3大3小食到飽飽又食又拎，呢餐"下午Tea一Tea"，都係$140有找，邊度搵？

1 Hour Break

家陣舒舒服服響炮台山屋企上網，雖然只有一小時break，但都"好期待"梁師奶早日返黎，等我可以脫離全職狗褓母生涯。

襯要出黎做facial，當然要返屋企收收信，兼望望早排打風有無漏水。

唔知點解，將軍澳是否濕過港島區咁多，皮膚特別容易黐立立，平時只可以頻頻洗面以求保持清爽，就連基本皮膚護理都懶得做；等一陣Erika幫我做facial時，又要聽佢訓話了。

另一極度唔慣既，就係廚房不時出現曱甴仔；對於自己屋企一向只有厚厚灰塵，而無任何小生物(可能有都早已餓死)，要再度同來來曱甴屋聯手對抗外敵，真係好厭悶。就連今朝烏烏兜水水都發現條曱甴浮屍，佢仲要係剛飲左一半添，該死!!

20世紀少年

追左整套浦澤直樹原著漫畫既我，咁多大星主演既電影版係必看。

故事背景橫跨1960年至2010年，圍繞主角健次及一班同學，在童年時幻想與邪惡組織對抗，並寫下預言書拯救地球；三十年後，一名自稱為「朋友」的神秘人組織友民黨，並如預言書所言去拯救地球，若有人背叛「朋友」則被判為「絕交」，即時被殺害，而「朋友」所採用的符號，正是健次及他的朋友所用的一樣；究竟「朋友」的真正身份是甚麼？「朋友」所擁有的一本預言書會否跟健次的一本一模一樣呢 ?

上影第一日，晨早第一場11:30am，新開既MCL德福；估唔到閒日working hours都有半院滿。

電影照足漫畫，分3部曲；呢套首部曲都兩個半小時，可想而知導演無乜點刪減，可喜可賀。

果然無失望。

漫畫橫跨60年代同未來2010年，時空交錯得好緊要；電影版拍出黎倒唔難follow，當然讀過漫畫既會好似我咁更投入，同驚嘆選角既相似度。

如果能夠將作者另一套我最喜愛既經典"Monster"開拍電影版就好了；不過呢套書整個背景都係德國同捷克，而且9成係鬼佬，開拍真人版真係好有難度，唔同要d鬼佬個個講日文咁不倫不類咩!!

東亞擠提

"東亞唔掂"既傳言下午鬧得沸沸騰騰，一個下午各方友好十數個電話向我呢個東亞擁躉叮囑問候，我亦變身東亞代言人，講解網上對東亞財政既澄清。

細佬都膽心地打來問：咁點呀，我地有乜可以做？

我只係乾笑幾聲：有乜好做？大部份定期未夠期，就算你而家落去同d阿婆阿公迫，都只會落得無線晚間新聞黃金air-time上鏡，落去影張相上blog就真，哇哈哈。

烏烏 @ Pacific Coffee

新都城商場內有一露天Pacific Coffee，呢兩朝都推架車同我地梁家少主落去一齊嘆杯晨早咖啡。

閒日8點，當然水靜河飛；烏烏就可以公然攤響梳化為所欲為。

做狗若佢，真係夫復何求？

風雨不改

真係邪，上個月Connie訂左枱，約埋同事試上環一間叫"公館"既上海私房菜，點知遇著9號風球；改期後既今晚，又再遇8號風球.....本疊埋心水諗住今晚都要挨cereal餐之際，Connie打黎一句"風雨不改"....好！誰怕誰！！

風大雨大下，好彩公館離上環地鐵出口只係幾個舖位之隔。

門口好有滬式大宅門feel，裡面亦頗花心思裝得古式古香；唯獨是天花盞紫色羽毛吊燈好姣。

因為住得偏遠既其中兩人縮沙，結果原定要8人既menu，就由我地無懼風雨既6人享用：

芥醬青瓜，香妃牛扇(即汁煮牛舌)，肉崧燒茄子，涼拌窩筍，金針雲菇(即金針, 雲耳及鮑魚菇)，湯:雪花白玉仙(雪, 是指雪菜; 白玉, 即豆腐; 仙, 乃魚鮮)，甜心浸鮮(鮑鮮鮑濃, 佐以清新的羅白)，蜜融於火肪，炸桂花魚(配以香口脆蒜粒，同絞白：上海夏天時的筍類)，鳳凰也呷醋(鎮江香醋浸雞)，蓮池素燴(清蔬)，公館炒粉皮。