La Vie Avec Amusement

土曜日, 9月 30, 2006

高麗安xGreen Box









卡廬士一放工就話晏晝食得好飽,未食得落野住。陪佢出老銅hea左一陣二手CD舖+HMV,再去埋Sogo買左件風褸。等到阿Ellena姐過黎join埋我地去告士打道一間叫高麗安娜既韓國餐廳。因為唔算喺大街,所以人唔算多,坐得比較舒服。Ellena嗌住要減肥所以食好少,係我同卡廬士兩個密密烤,密密食。

試左兩枝韓國酒:天菊同覆盤子酒。前者比較清新,味道帶甜;後者簡直似Robitussin咳水既cherry味。

Ellena上個禮拜返工辛苦得滯,我地飯後捨命陪去銅鑼灣廣場既Green Box唱K發洩。唔好講笑,卡廬士d中文vocab真係分分鐘差過我呢個F2程度。同埋我地終於知道點解呢間野位於老銅,而星期五晚可以唔駛等位......因為d音響同咪實在太差!!回音大到根本無可能合唱任何歌。下次真係要去番Neway。

出到黎都3點,不過long weekend,誰怕誰!!

Load唔到咁多相,自己上msn space睇:http://glorialeong.spaces.live.com/

金曜日, 9月 29, 2006

屈記「豬肉獎」頒獎禮

用7皮野買番黎既Centrum豬肉獎(銀獎)屈記就會「醒」兩個晚宴位比你;加多個位都要收你$1300呀,癡線。

本應往年都係余經理同Michael去,家陣余經理喺東京同老婆風流快活,唯有我同Michael兩個去撐枱腳。

惠氏奶粉嗰邊都有兩條女去。7pm Michael就出動佢既「墨祿色」戰車做柴可夫載我地去君悅。

未入去就坐前,響reception人迫人罰企左大半粒鐘。8:15pm先至聽到開席鈴聲,可以入去就坐。

編左我地同裕利坐。話晒都叫熟人,點都好過成圍枱三九唔識七,悶上加悶。

司儀係黃賢誌同陳霽平。

到場既藝人,主要都係某某產品既代言人:

2036:顧老版,司棋姐,修哥,風之后同佢既「蝦子餅」
雪姬蘭:鯊魚女,鄭家穎,黎姿
蘇中製藥:魏俊傑,藤麗明,汪阿姐
LF:陳妙瑛
龍發製藥:劉丹

唱歌嘉賓係方力申;兩首歌有"ABC君"同"好心好報"(不過有咪咀之嫌)。

仲有一d二三線既,如曹永廉,黃百鳴,陳欣健,白姐姐,同塊面脹到浮屍一樣既宮阿姨。

食既係西餐。其實唯一比我地選擇,係主菜要牛定魚。好似飛機餐既"Beef or Fish?"

隊阿Michael上台代表公司領獎。除左個爛鬼膠獎座之外,仲有一大籃盛滿得獎產品既hamper。

今年好彩比以往流程去得快,無乜囉嗦就係咁頒獎;10:30pm就食埋甜品收檔閃人。個hamper實在太累贅,所以我地車返公司去放低,再坐佢既戰車返家。

可以去msn space睇相:http://glorialeong.spaces.live.com/

追Rain前先醫肚

Connie今日仍然放緊假;適逢佢偶像阿Rain下午響新都城二期商場有DHC function。只係幾個地鐵站既距離,佢唔去哄吓都對自己唔住啦。

追之前先過黎陪我去稻穗亭食個晏先。

聽佢呻藥房裡面既人事複雜,慶幸自己division既同事雖未至於用"一家人"黎形容,但咁多年黎都相處容洽。醫管局無疑係人工高,但出路相對亦比商界狹窄。

當年總藥劑師李柏偉比offer我去做「窗內」,但我選擇寧願做「窗外」。講真我從無後悔過。

一年一度一箱梨

Printer阿Ben每年中秋前都好客氣地抬一箱梨上黎比我地;如是者十多年從無間斷。

以前18人一箱,家陣8個人都係一箱。今年同以往既水晶梨唔同,佢抬左箱比較甜既沙梨比我地。

由我第一日入黎惠氏自己同佢contact,到而家交托比Martha同佢聯絡,我完全hands off,阿Ben都係好客氣好合作。

有陣時一段感情都未必維繫到十幾年啦。我真係幾尊敬呢位事事親力親為既printer架。

木曜日, 9月 28, 2006

"古董" PRADA 裙....



差不多7-8年前既款,不過勝在太plain,所以今時今日都仲著到。

呢件容易走光過上一件,唔想"迫"Michael睇(費事佢覺得女上司性搔擾啦),所以都係要考慮黐膠紙;如果唔係成晚要挺直腰骨坐呀。

同隻蟹搏鬥左半粒鐘
本來今晚9-10pm有個美國host既Webex Telecon,但因為唔係太直接關我事,都係比Annie引誘到寧願出黎食飯,荒廢事業.....哈哈哈哈哈。

阿丁都好神心由天水圍出黎陪我地癲。三條女去駱克道東園,叫套餐又太多,唯有散叫。其實我地整左隻片皮鴨都真係有d變態,淨係幾塊餅皮落肚都飽左半啦。

大閘蟹出爐,Annie呢個"蟹痴"當然唔會放過。$38一隻有4兩多;比起去年既迎囍,東園呢隻d膏算靚d。不過我自問真係唔多鍾意食蟹,因為每次人地食完晒抹手,我都仲同隻蟹搏鬥到難捨難離。食完唔飽,對手都攰啦。

同場加送犯眾憎既大Joe(倪震);撻住對涼鞋,一附麻甩相。

水曜日, 9月 27, 2006

一個字:勇!!

話說今日有封email彈條link黎,見「香港討論區」有人問"痔瘡膏除眼袋"?

http://www9.discuss.com.hk/viewthread.php?tid=2349416

結果Michael二話不說,問我地要左枝「白宮痔瘡膏」(Preparation H Ointment) 黎馬上搽上自己對眼試一試。果然,為左靚,幾奇怪既方法都會有人嘗試。

其實早幾年壹週刊都有報導過,外國真係有人用痔瘡膏黎除眼袋。Prep H有收縮血管成份(因為痔瘡其實係靜脈曲張),所以真係有咁既side indication不足為奇。

即管比幾日時間,觀察吓Michael對眼袋有無改善。得既話,以後可能d朋友問我囉痔瘡膏仲多過囉Centrum.....

火曜日, 9月 26, 2006

扑扑脆

英國中學寄宿年代,影既時候應該係F5-F6。

Outside my boarding house - Fawcett House




捲毛
見人地晒舊相晒得咁開心,我都唔執輸,返公司用scanner掃幾張陳年"肉"照po上黎。

呢張幾時影既連我自己都無印象。

十個朋友,十個都話唔似我。不過當然我無可能唔認得自己啦。除左一附低能相外,最顯眼既就係天然捲既頭髮。大人話天生捲毛既細路大多好硬頸,好難教。以我小學時,無論協恩既老師同埋同學都好熟梁師奶(因為個個禮拜見家長),小五甚至記大過.......可想而知呢個理論真係有d根據。

月曜日, 9月 25, 2006

CENTRUM代言人

真係非呢位仁兄莫屬。

自佢3個月前變做Centrum user之後,無論響舊公司,新公司,隔離team,甚至自己個"薄咯",減肥餐單.....都不忘幫我勁sell Centrum。比起我呢個賣左十幾年Centrum,但自己又懶得食既Commercial Manager,佢仲似打惠氏工。

樽Centrum 500粒裝咁大,記住放喺公司枱頭,咁先夠impactful架嘛!

仲有以後病都唔好出聲,唔可以整衰呢個million dollar global brand呀代言人。

終於等到

雖然Oxford House對出上個月開左Starbucks,但都真係幾遠;有好多時遲左返去都寧願行少兩步飲Pacific Coffee算數。

今朝正正office樓下圍左板.........哇哈哈,無錯,係Starbucks!

Debbie,Michael & YY一返工都打黎問係唔係我開既;簡直好似當我有股份咁。

期待ing........

新口味空運抵港









尋晚同事Johnny同女友剛從東京返黎,空運抵港新出既大盒東京/横浜地區限定「干燒蝦仁」味百力枝,同兩細盒期間限定既蘋果&巨峰提子味 Pocky Decorer

唔知係唔係我成日講自己係超級固力果同Starbucks fans,同事朋友去日本,都不約而同去幫我搵當地既限定版百力枝同tumbler......

除左口立濕外,Johnny仲買左d我聞所未聞,但好多人都話出左勁耐既"氣水餅";即係放落凍水一陣,就會變可樂既Cola Effervescent Tablets。唔係扮細,我細個真係無玩過呢樣野,今日先至親眼見證「一杯可樂的誕生」。

奶奶,生日快樂!!









奶奶正日前夕,Connie剛剛同Jeffrey去完韓國返黎買左個cake比佢。所以大家飯後9點半出黎,去Fashion Island Starbucks聚一聚。

踏入10月,Starbucks勁出南瓜產品。我摒棄平時既Coffee of the Day,黎一杯Pumpkin Spice Latte;不過味道就覺得同聖誕節既Gingerbread Latte無乜分別;都係勁甜。

Connie講述佢地自己去"浪漫滿屋"拍攝景點,言語不通加上要坐船轉巴士,再截順風車呢d外地"電波少年"feel既經歷.......真係服左佢地咁鬼勇。

11pm都要散水啦,聽日大家都要返工。

烏烏撈電視汁












梁師奶為左個皇帝仔買既32吋LCD電視終於都打動到佢喇。

初頭連眼尾都唔望,到家陣晚晚撈住電視汁,攤響張梳化度訓......名附其實既狗版"Couch Potato"!!

加埋新買比佢既綠色電視(fleece)被,簡直人都未必有咁嘆。佢有時自己捲住張被玩到喘氣,低能架!

日曜日, 9月 24, 2006

只想說一聲"謝謝"

Mate, thanx for being there.






比條友話家陣用緊既粉底太乾唔貼面,repeatedly講左幾次後,促使我的起心肝換過隻粉底。










一向用緊呢隻牌子既遮瑕膏,雖然有d貴,但我塊面既嚴重程度,係無左佢出唔到街既地部。之前用Shu Uemura compact foundation,反正今日又要去Sogo入遮瑕膏既貨,順手轉用埋呢隻牌子既2-way cake,睇吓是否真係一分錢,一分貨。

Quick Lunch at 麻布









Charlotte下午要返Grand Hyatt開工,兩條女睇完戲後去左附近麻布茶房來個quick lunch。

好耐都無黎過囉,因為d野越來越一般;所以星期日一點零都唔駛等位。響戲院凍左兩粒鐘後,唔想再食冷麵,叫個份量唔大,但唔會餓親你既"茶房風蟹肉飯定食",15分鐘內將它擺平。

點解咁趕?因為死人屈臣士星期四既「健與美頒獎禮」響君悅餐飯,dress code係"Formal & PURPLE"!大佬,家陣邊個至係客呀,我比左7皮野去幫Centrum分個豬肉獎,仲要去買件十世都唔會著既紫色衫?!

結果去左agnes b又係15分鐘內掃左件紫色短top,黎襯件陳年Prada黑色one piece。算,當搵個藉口為自己個黑漆漆既衣櫃加多隻色。

The Devil Wears PRADA

小說進度好慢,只係睇到一半。約埋Charlotte去UA皇室睇11:20am。

當然因片長關係,有d小說既細節須要刪減。但整體唔會令你覺得一截截,成套戲節奏明快;雖然唔可以好似書中道出呢位魔鬼女總編既派頭有幾變態,但裡面既名牌衫真係目不暇給。梅麗史翠普無令我失望;一向職場上英明神武既佢,面對再次離婚既幾分鐘失落自白,果然薑係老既辣。

最拍爛手掌既係:片頭竟然影到Chapstick Cherry Lipbalm!

Chapstick喺香港2004年已經delete左。真係估唔到美國竟然可以躋身響電影眾名牌化妝品中;勁!

土曜日, 9月 23, 2006

Tina Ko's "Shall we Talk"

借一借Tina網站一個我幾有feel既帖:


















this is a moonlit night
the fountain is silent
water glitters in the moonnight

even if we don't have a common ground
we can still talk all night long...
afterwards, you didn't change your views and neither did I.
but we have known each other better

that's what communication means...

Curry Pot









真係好幾年都無食過印度菜。放工約左卡廬士,本來想去灣仔謝斐道一間叫「相聚一刻」(Bhet Ghat)既印度/尼泊爾菜,結果去到先至發覺轉左做意大利菜。唔服氣再試行過去莊士敦道,搵好鬼耐歷史既JoJo Mess,竟然連佢都執埋!唔通想食餐印度菜都咁一波三折?

正當我地諗住放棄,轉軑食泰國野時,呢間Curry Pot既招牌就映入眼簾。呢間野喺我初返香港時Upjohn年代食過一次,好,就試試佢!

坐出露台,比較cozy少少,而且都開始秋天,唔會太侷囉。

對於印度菜,我唔係expert;由得卡廬士點個夠,我只負責食。青口,紅咖哩羊,芝士菠菜,chicken tikka,naan bread +兩枝紅酒......結果老細12點頂我地唔順,埋完單我地再坐到佢開口話要拉閘放狗為止。呢間始終唔係飲野地方,收得有d早;哥仔下次你做search engine之餘,記住要check埋營業時間啦。

木曜日, 9月 21, 2006

清假壓力

之前惠氏攪既Stress Management Workshop話,放假都係一種壓力,真係唔都你唔信。

趕完一輪budget同marketing plan之後,除左追數,就係望住淨番既近20日annual leave發愁。上年已經帶左5日落黎,一年加埋成30日假點放呀?!

以前會返加拿大時就話放差不多一個月假咁癲,兩次restructure之後,由20人division瘦身到得番8條友,莫講話放一個月啦,兩個禮拜都會好高難度。

好似余經理下星期同老婆去一個禮拜東京,都放唔低帶住部Laptop去酒店check Email。

有同事就唔夠假放,我就有假都無得放。如果有得transfer比同事,呢d順水人情怕乜做呀。

盡力放自己幾日假啦;不過睇怕點都放唔晒又帶唔到咁多落去,要forefeit d架啦。

大食漬

上星期腸胃唔舒服左好幾日既Debbie,今日一好番d就鬆毛鬆翼。

同事們一齊去華蘭花園對出既「函館」拉麵屋食晏。平時一碗麵,以一般女仔既食量,真係會飽到攬住架啦。「非一般」既Debbie,唔知是否要補償返上星期捱既白粥,竟然好理所當然地挑戰加底!!

碗加底一上,簡直驚天地泣鬼神,男仕側目,女仕嘩然!! 起碼大30%啦。Debbie竟然做完呢個「兒童不宜」既動作後,仲要話:其實碗麵都唔係咁大,食普通既size真係未必飽。

我地幾個唔識反應,只可以對住佢流露出驚嘆既眼神.....

水曜日, 9月 20, 2006

花杯

聽Carlos推介呢間野好耐,反正早左一班機返到,兩條友玩即興去食個晏。

地點有d偏僻,響銅鑼灣新寧道民安廣場2樓;所以就算lunch都唔會好多人。叫左lunch menu既雜錦刺身定食,加埋卡盧士話呢度必食既鵝肝配紅木醋壽司。












刺身的確比The SUN新鮮,同埋variety多d,咁當然價錢亦都貴過佢啦。鵝肝配紅木醋壽司的確肥美(雖然對成日話要減肥既我,食得好有罪惡感)但我覺得完全唔需要下面舊壽司飯囉。反正又唔係握埋一齊,而且鵝肝會整到下面既飯好油,齋鵝肝配紅木醋咪仲簡單。

呢度lunch幾ok,不過家陣響太古坊的過黎食餐晏仔,好似有d勞師動眾。同班同事黎就有d高難度,或者weekend可以約朋友黎就真。反正又係我常出沒既老銅。

火曜日, 9月 19, 2006

撐枱腳

開完會後,三舅父阿Keith帶左我去附近一棟叫"Laris"既貴價西餐廳燭光晚餐........成晚既話題係review今日開會既discussion,同香港Caltrate既新print ad creative!好typical阿Keith既作風。

聞說大陸office好多女同事都fancy呢位marketing director...咁咪好多女羨慕我.....哈哈哈哈哈。

Laris響一座翻新左,叫"Three on the Bund"既古老建築6/F。窗口位唔一早訂都咪駛指意有,當然我都無咁好閒情逸致對住三舅父食咁耐;拿拿臨應酬完就閃啦。相信佢都係為左禮貌陪我食。

格局有d似半島頂樓Felix呢類比較hip既餐廳;但價錢就貴過Felix喇。頭盤要RMB150-200,主菜點都近RMB300......為左公司既P&L,當然我地唔會開酒啦。我都"係咁意"叫左個Ceasar Salad with Prawn做頭盤,再加個Sole Fillet主菜,隊多杯啡就算。

味道係好食,環境氣氛都好好添;不過如果唔係同三舅父,而係同條"正草"黎,我一定唔會滾水漉腳咁食完等佢快d埋單。

「他媽的」

本來下午已經有d眼訓加發左陣白日夢,但忽然有人講話不如搵d名人做Centrum代言人。

"例如劉翔拿住樽善存話:我每日都食佢,一定掂啦。"

"但搵佢代言貴喎,不如搵佢阿媽上鏡,話:我個仔日日都食善存架,咪一樣,而且仲平d添。"

"咁呢個咪應該叫做劉翔「他媽的」廣告代言?哈哈。"

真係比佢地攪到笑返醒。

應該搵埋姚明個阿媽,話:我個仔自細都食Caltrate架......

Brainstorming

今次上黎上海既主要目的,就係sit in佢地既2007 Centrum/Caltrate未來3年既strategic brainstorming session。

大陸廣告駛費大,確係唔同D。自己整條marketing team唔好講,creative agency Leo Burnett成條team加埋個CEO,media agency ZenithOptimedia又係成條team連GM,再加埋PR company既GM,共29人。

朝早8:30am到下午6:30pm,3間公司既人比足一整天我地,分兩組Centrum & Caltrate做呢個"腦震盪"group discussion + presentation.....真係比足面。香港serve我地既agencies,莫講話做呢d咁策略性既討論,有時連過黎開會都懶,telecon就算。

其實呢類型既會,可以啟發大家去一齊定未來3年既road map係好架。須知道我地marketeer好多時對得自己個brand太耐,好多野都係一廂情願。個客唔係永遠岩架嘛,多幾個腦比多d唔同意見,出黎既稿先至sell到一般人架。

外灘送小籠包

影完相返轉頭都只不過係9點之嘛,飯店內既中西菜廳都竟然收檔。迫於無奈,去隔離江邊既餐廳醫肚。

一排既木造小屋,外面掛紅燈籠;真係有d土。不過叫做望住外灘送飯。

餐牌連一碗湯麵都無,咁我無理由自己隊到一整碟炒年糕咁變態架。於是把心一橫,叫一籠6隻小籠包+荵油海蜇頭(冷盤)+酒釀丸子+枝細青島。

18元人仔既小籠包真係超迷你,連丁屎肉汁都無;完全係公仔點心feel。反而碗同樣係18元人仔既酒釀丸子用湯碗上!!真係有d嚇親。

好想去永和食粢飯豆漿.....

附近無Starbucks,聽日唔知點過。

月曜日, 9月 18, 2006

海鷗飯店

下午4pm既飛機;到上海過海關時少有既得幾丁友。唔駛15分鐘就出到去。

因為公司幾個司機今晚都唔得閒,所以office幫我call左架7人van接我出黃埔江邊既海鷗飯店。平時雖然住開古井Holiday Inn,但無理由聽日個會響呢度開,自己又咁白痴住第二度架。

呢間飯店真係好鬼舊,座落於江邊俄羅斯領使館隔離。我間房係11樓既外灘景,望出去左邊就係東方明珠塔既浦東,右邊就係舊匯豐銀行,和平飯店既浦西。既然住到咁近外灘,雖然自己都去過好幾次,都無理由唔出去走走,影番幾張相返黎交功課。









外灘永遠都係咁人頭湧湧,因為係上海必到景點。一條女,又唔係有俊男相伴,當然以我極速既步行速度行到中央,兩邊岸影夠就收工啦。