松島名物：蠔

可能好多人都聽過松島蠔，既然黎到，一放低行李，就立刻出發去附近溫泉街搵食。

經旅遊指南介紹，摸到去溫泉街觀光船碼頭對面既「南部屋」品嚐松島蠔。









雖然生食都好吸引，但連殼燒應該更有日本風味，所以就散點左客(750yen/3pcs)。上菜時，真係比手掌咁大既蠔嚇親。新鮮當然無容致疑，唔駛其他調味料，只係加少少檸檬汁就鮮味無比。
另外海鮮丼(1900 yen)，及我所點既政宗定食〔刺身＋炸蠔〕(2200 yen)都令各位團友默默無言，掛住埋頭苦食。

溫泉旅館之一：松島大觀莊

離開仙台，坐火車出發都此行溫泉紀行第一站，日本三景之一的松島。

睇個車站就知有幾鄉下。

連警局都古樸過人。

入住既係72年皇太子同太子妃(即當今既日皇)曾入住既松島大觀莊。哇哇哇，地方大而光猛，同之前既仙台Sunroute感覺成強烈對比。

室內雖然有洋式床，但櫃內有和式被舖，喜歡聞住榻榻米香味睡既，可適隨尊便。

宵夜：坐‧和民

其實係取其日文鞋音"Za和民"(即The和民)既意思，同普通和民有乜分別就唔知，但裝修確實比較潮，一入門口，就有整排個人木locker，比你自己放鞋之用。

居酒屋都係志在試多幾味，所以人多好食作，六個團友可以點菜點得暢快：

先黎個Kiwi Calpis Sour(523 yen)

石燒沖繩苦瓜(523 yen)，蓮藕脆Chips (313 yen)，白飯魚刺身(418 yen)

有機大根及水菜的柚子梅沙律(418 yen)，外脆內軟既炸豬扒沙律(628 yen)

帆立貝牛油燒(418 yen)，辣味炸魷魚條(418 yen)

牛油薯仔年糕(418 yen)，北海道燒花魚(628 yen)

脆口鯛魚燒

行街經過，遠遠都聞到香味，再見到門口條人龍，非試不可！

其實鯛魚燒只不過係內有紅豆或custard餡既夾餅，但可以話係日本既傳統小食之一(120 yen)。新鮮出爐當然又熱又脆口，因為鯛魚身既面積較大，所以內裡既北海道紅豆餡唔係太甜。

仙台名物：牛舌

黎到仙台，點可以唔食出名既燒牛舌？
行番去車站樓上既"牛舌街"，其中一間長龍牛舌連鎖店「利久」，黎個"極上牛舌定食"(1995 yen)。厚切既牛舌，非常有咬口，而且多汁；果然同香港茶餐廳既牛脷不能相題並論。









牛舌餐必配既長芋蓉，滑滑孱孱的，有點似鼻涕；之前試過一次非常抗拒，但今次加點豉油一齊撈落麥飯度，易入口好多。

食罷當然不忘埋番幾包即食牛舌返去做手信啦。

牛蒡米漢堡

雖然香港都有MOS Burger，但味道同日本差得遠。所以到步後既第一餐，係衝入去整個米漢堡。

其他人都叫大路既海鮮Rice Burger，但比我發現新出既牛篣絲口味，當然試新野啦；好香既醬油味，雖然係Vegetarian Rice Burger，但口感一ｄ都唔齋。