Prevnar Celebration Dinner @ Cafe Deco

萬聖節，樓下西藥部拉大隊上山頂Cafe Deco包下餐廳一邊黎個buffet dinner。呢餐除左多謝惠氏，亦要多謝曾特首；早兩星期既施政報告落實將肺炎鍊球菌納入兒童疫苗名單內，惠氏既Prevnar係此疫苗既獨市.......呢條數當然好襟計啦。

我就係CHC唯一被邀請，有幸上黎"黐餐"。

分兩架大巴由太古坊上黎，先黎個cocktail reception；大家雖然唔係遊客，上到黎都好自然會出露台同個維港夜景黎張高難度合照。

聽勞苦功高既Prevnar team致詞後，8pm多先正式開動。

雖然buffet餐桌唔算好長，但種類同精緻程度毫不遜色。澳洲生蠔唔係太大，但新鮮爽口。甜品既鮮果Pavlova，蛋白非常鬆軟，中層既meringue好脆口。

抽獎環節有10套雙人狄士尼入場券，但因為唔想hea到太夜，所以我同YY及HR既Dorothy先閃人打的回家。

絕無三聚氰氨的A貨蛋

呢排Lunch興往外發展去搵食，今日就豪廿蚊打的往鯉景灣碼頭旁既"蘇豪東"。

好耐無去既中意坊，午市套餐由$50-$70；自選小菜白飯例湯加小碟菜，當然有呢度既特色甜品盤。

老板娘大sell，用新鮮雞所以特別有雞味既"鹽水雞"只係一般，反而個花生豬手炆得好稔好入味。
登登登登，重頭戲甜品時刻到喇。老版娘照例捧住盤堆滿十來款的的式式甜品黎逐一介紹。經我既個人推介，佢地個個都試左頗考功夫既"A貨蛋"：完整蛋殼內，蛋白係椰汁布丁，蛋黃則係芒果慕司。要用手慢慢剝殼，假蛋白既口感幾可亂真。









貪心地多加$10，試埋賣相頗別緻既"柑桔柚子和果子"，微酸柚子果凍內藏一片柑桔，唔會太甜。

Cross Functional飯局

約左班同事去駱克道「友和」食飯。

有別於平時自己部門熟口熟面既同事，今晚飯局集合左：CHC及奶粉Marketing，Finance，Regional大大秘書，資深Receptionist，前惠氏HR同Sales Development Mgr。好似每個部門都有個代表。

YY同Sandy係熟客，當然有江湖地位比間廂房之餘，生果雪糕都會特別優待。

泡菜墨魚，烤雞泡魚干，手包海膽/三文魚子手卷，醋浸生蠔，南瓜蕃薯天婦羅，刺身：三文魚/甜蝦/象拔蚌/劍魚/帶子/赤貝，烤雞軟骨，鹽燒牛舌，牛油果軟殼蟹卷，三文魚頭鍋，鰻魚炒飯。

最impress係送贈既甜品；日版柚子雪糕，酸酸地，清甜無比。

王林記

上次就話飛甩Debbie過去老遠筲萁灣食lunch，今日特地預埋佢同Michael再跟YY踩入去食晏。

地點轉左去安利魚蛋隔離，同樣係以手打魚蛋做賣點既「王林記 」。一踏入店舖，就感受到YY呢個老街坊既人面；唔單止老板娘同佢大打招呼，甚至私人醒碟炸魚皮比我地。

Debbie碗香荵魚蛋湯河，真係好荵！豬手則骨肉分離，非常稔。我點既"炸蛋"撈粗，雖然望落個麵都應該好夠味，但奈何鹼水味加埋豉油，變得有點苦。

梁師奶的新玩具














公司部N73終於都夠期write off，今次大家無分grading一視同仁換新機，兩款model供選擇：Nokia 6600 slide，同埋N6210 netvigator。新既公司手機指引比以往慷慨，連本來無電話既Debbie同Kerry都有公司機同call plan。兩部都係3百萬丈數相機，售價$2988。

雖然前者比較新同slim，但個key pad實在太細好難按，我都係揀左後者既磚紅色。

當然唔會咁快換掉我部日系Sharp摺機，呢部新玩具，就供獻比梁師奶吧；反正越來越活躍既佢，開始覺得需要一部有相機同alarm既電話。

尋晚於公司通頂叉滿電，今晚邊摸索邊教佢用。雖然最後梁師奶都只係會打出打入，偶爾影相同聽收音機，但難得佢覺得部野user friendly，希望遲d會習慣出街要開機啦。

慶生Dessrt

泰簡單既甜品實在太唔吸引，所以轉場到附近「發記甜品」。

等左5鐘位就有得入座。3對2：食榴槤既Marinda，Mion同Suki vs 唔食既我同阿二。

當然，坐咁近，唔食榴槤都會一身騷。

見到對面三位小姐一放個榴槤糯米卷入口既滿足樣，都應該知有d水準。

我就"簡單d"，點左"黑珍珠意大利涼粉條"；涼粉變成條粗身spaghetti，滑得黎好難叉入口。

反而阿二既"焗朱古力香蕉米紙卷"，一端上黎香氣四溢；淨係聞都知好味。