La Vie Avec Amusement: 01/01/2009

奇幻逆緣

呢部係今個春節假期唯一想入場睇既戲。

之前聽過巢大小姐嫌悶，不過Carol就話故事唔錯，所以都係買飛年初三去UA時代廣場睇10:45am。

睇Brad Pitt同Cate Blanchatt呢個配搭，就令人諗起之前合作既電影"巴別塔"。

電影講述的是一個奇人的故事：由出生罹患衰老症，身體退化猶如行將入木既老伯；點知年紀越大，越活越年輕。

電影長達2hr40mins，有一半時間係男主角的日記回憶獨白(所以小朋友會嫌悶，無Twilight節奏去得咁快)，包括他走過的路和認識的人，沿途發現生命的喜悅和死亡的悲哀，與及一些超越時間限制的東西。

論演技，男女主角都係好戲之人，由後生演到老(或Brad Pitt由老演到後生)，表情變化同心路歷程都表現得細膩。故事要比少許耐性去醞釀，但故事結構同當中人與人既相識相交，都令臨尾既結局變得感人。

初一走兩場

訓得唔夠4小時，就要起床梳洗出時代廣場「鴻星」約左五叔一家飲茶團拜。住進灣仔私家老人院既五叔精神唔錯，但仍然唔多歡容。

難得新正頭酒樓飲茶照平時收費，無所謂"加二"既情況。

好彩中間有個小break可以返去補補眠，叉叉電。

晚上再到樂富林家跑第二轉。佢地屋企親友眾多，所以長期人聲鼎沸，拜年人潮絡繹不絕。林二少阿細充當大廚，一個人整出滿桌年菜；再一次印證，男士既廚藝比女士好。食飯既人太多，所以"後生"一輩既都要企響度食；自認後生既我，當然唔敢坐啦，哈哈。

又話市道差？

由屯門出返銅鑼灣，無巴士又等唔到小巴，唯有打的去西鐵站，西鐵轉地鐵....出到去都2:30am，真係難為剛由巴黎出trip返港既Annie Chan同Charlotte兩個喪等我地。

人人都話經濟唔好市道差，但凌晨既維園花市比往年更水洩不通。乾貨攤位基本上都係中間比人推住行，我地幾個要互相拉住先唔會走散；根本甚難逼埋去睇。一條aisle都行左45分鐘，所以無心機再去被逼，改去旁邊花檔陪佢地買年花。

年花雖然比去年貴(好似細盤蘭花去年$100/5棵，今年$100/2棵)，但仍然好多花舖已經被掃清收左檔。每年例牌要買棵桃花返去既Annie Lam，得返3幾間桃花檔仍開，甚少選擇既情況下，都要將貨就價。大家收獲唔多，因為其他花都係一副殘花敗柳相。

仍然係老習慣，大伙兒到澳門茶餐廳食埋個早餐先打道回府；踏入家門都5:40am.....

言生，Long Time No See.....

哇，真係有好幾年無見過佢真身；如果唔係年三十晚佢過黎香港同我地倒數，都未必會咁神心同Annie及Moly飛巴士入屯門市廣場去追(話時話，呢個商場認真"不怎麼樣"，都唔明點解佢老遠飛過黎會揀d咁普通既地方攪既function)

10點前到達，同Moly霸住左邊欄杆位；Annie有相舖"萬人迷"既老細射住，可以扮記者潛入前排超等區。

初頭都係一眾名不經傳既local歌星(Mister，葉宇澄Eugene等)輪流唱歌玩遊戲，悶爆。幾層樓既人大都係為左睇言生而黎，大家都無乜反應。

壓軸主角終於出場，白西裝(好彩唔係白鞋)；帶左條家陣頗興既Oregon Scientific負離子健康頸鍊(Connie，同你條同款喎)。

面部飽滿左同精神左，狀態回勇；帥帥帥!!!!!

咪咀唱左兩首舊歌，玩左兩個無聊遊戲，倒數完下台兩次大派利事.....咁就散喇。之後更跟埋Annie佢地落停車場出口等左一陣，企圖響佢架車經過時"送佢一程"；雖然都係摸黃，但好耐無做呢d追星舉動，覺得頗懷念。

海嘯下的縮水賀年Deco

經濟唔好，連商場既賀年deco都比往年失色：

又一城

時代廣場

海港城

新城市廣場

都岩既，就算再grand，家陣d人都未必有心情欣賞。

如果可以取消埋個人覺得最浪費既煙花匯演，唔好將d銀紙燒左佢，要黎做善事(因為經濟差，連food bank都少左人捐獻)，就更有意義。

多得Facebook的聚舊

自從join左facebook之後，除左post既相多左班讀者之外，最有用莫過於搵返好多久未聯絡既舊相識。

UT Pharmacy既舊同學Amy Co都係因為咁而聯絡上；襯佢聖誕假期帶買初生B女同老公返香港醒親，連同Gigi & Karmen年三十黎個藥劑舊生團年。