Starbucks聖誕紅杯












每年聖誕星巴克都會出隻聖誕紅杯mousse pudding。

買左3年，每年既款式都略有不同。印象中以前既朱古力布甸好鬼甜，今年雖然隻杯改變唔大，但裡面變左係紅茶慕司，香氣十足但甜度減半；有進步。

索價$43有點貴，隻杯size只夠裝espresso，無甚實際用途，但一年一次的水魚，買開有種心癮會collect，豪比佢吧。

聽說












印象中從沒買票入場睇台灣電影("海角7號都係網上收看")，會入場睇"聽說"，都係因為個trailer比人感覺好清新。

好像只有台灣人，才拍得出的純樸感覺；香港的所謂青春片往往流於太堆砌造作。

三位主閣彭于晏，陳意涵，陳妍希都恰如其分，演得出色自然。彭于晏繼續係"我在墾丁天氣晴"的戇直陽光男，陳意涵("痞子英雄"內的黑幫千金)今次做處處為成就聽障家姐陳妍希夢想，而犧牲自己既妹妹。

至於第二女主角陳妍希，一向都覺得佢頗可愛討好(唔係Suki式的港女扮可愛)；比手語都能夠令觀眾感動，談何容易。

全片有一半都係靜默中進行(比手語對白)，但睇得讓人好舒服。另外演萬年"阿母"的林美秀(也是"命中註定"/"敗犬"的台語肥阿媽)，係片中既笑位。

海龍皇宮聖誕

新都城商場今年既聖誕裝飾無往年咁大型，可能金融海嘯縮減開資；但有別之前既迷幻馬戲班，今年既主題係海底聖誕。

當中有個水母缸，吸引唔少小朋友。

班蘭葉蛋糕

聞說新加坡名物除左林志源之外，就係呢款班蘭葉蛋糕。

其實班蘭葉本身唔係太濃味，好似只係得隻綠色。

見雜誌話美心西餅出左呢款蛋糕，$88一個，$12一件，貪新鮮既我，尋晚放工買左一件黎試食。聞落幾香，食就同普通紙包蛋糕無甚分別，略甜。









今朝竟然報紙有coupon，哈，早買蝕左添；唔通要再買黎溝淡？

IMAX 3D聖誕頌








雖然個人唔鍾意Jim Carrey，但狄更斯的Christmas Carol既係F.1 Eng Lit的課本，亦係我最喜愛既讀物之一，點都要豪些少，花$95去Megabox BEA IMAX睇個特級3D版。










電影本身好短，只得1.5hrs，有點似故事大剛，唔夠時間develop內餡。但特技真係無得頂，落雪既場景立體到令你有如置身雪地中，而且隻手真係好似伸出螢幕外面。











最衰無預到由德福落Megabox既shuttle要等咁耐，上去11/F戲院既電梯又大排長龍，結果入場已經miss左開頭數分鐘。

唔知IMAX 3D版同其他戲院既數碼3D版有乜分別呢？(大家都要帶立體眼鏡)

Around the World Teddy

星期日落Megabox睇戲經過德福廣場，見到今年聖誕裝飾既主題係：貴族熊。
有Telford Station火車站既熊站長









長廊上有穿上世界各地民族服裝既貴族熊系列












廣場中心位置更有兩層樓高既螺旋樓梯，有跳舞熊

暖出水泡

早幾晚仍然勁凍，拿哈爾濱剩下的暖包黎用一用。

結果前日下午忽然背脊起左個好大既水泡兼弄穿埋，唯一既解釋應該係之前一晚壓住暖手包入睡，結果灼傷左。









水泡範圍足足腳趾公咁大，最好有膠布保護以免受細菌感染。竟然比我搵到有萬寧牌出既“水泡膠布”；索價唔平，3塊大5塊細減價都要$25。

貼左兩日，但奇就奇在貼後數小時，水泡位置就會呈白色gel狀拱起；據舖內藥劑師講，係膠布吸收傷口的水所至，但….乜水泡穿後，會有水滲足兩日的嗎？

呢個事件教訓小朋友，正如暖手包既警告字句所寫：切勿貼著入睡，容易灼傷。

Encore英記

上次黎時Angela & Daphne缺席，口碑不俗，所以詢眾要求encore再打邊爐。

一枱9男女，開足兩個爐先夠：清湯崩沙腩及蘋果海底椰湯底，清清地。
聖子皇真係好賣，YY打電話黎話留起都賣晒。但都唔阻礙我地喪點喪食既情緒：小食辣酒田螺，皮蛋酸薑及炸魚皮；雪花牛肩頸肉，鱔片，冰豆腐，炸枝竹/腐皮，四寶丸，美國桶蠔，貴花蚌，大蜆，鵝腸/粉腸，粟米，黑柏葉，韮菜餃拼水餃，芝士腸拼餐肉，皇帝菜，西洋菜等。

料新鮮，有得混醬得黎又比謙記平，只係要響上環地鐵站行15分鐘有點隔洩吧。