Bloody Temptale!!

呢個係乜東東？係一個記錄shipment自出廠到入裕利倉既溫度探測器，到步後就會run d數據出黎睇有無exposed to extreme temp。以前只有要冷藏既貨例如針劑先要落temptale，但而家就連室溫儲存如Centrum既貨櫃都跟埋。

本來多個監管係好事，但衰在就算個櫃搭飛機唔係坐船黎，由落機到排隊入機場倉既短短時間，都好容易過上限40度；哪怕只係幾分鐘，都足以成個shipment hold住，send sample返去做test，等足一個月先有結果。好命既就delay一輪比你放貨，唔好命就.......成批貨write off!!!

上個月Centrum Select經台灣轉一轉機，過左40度兩粒鐘已經攪到頭都大；今日又有Robitussin Cough Drops響赤臘角一落機又過40度!!想死。

睇怕陸續有黎。

唔通惠氏要大力支持綠色和平，抗議點解溫室效應全球暖化會咁嚴重？！

囍宴品。味










約左廖太試新野，Jacky Yu新開，位於銅鑼灣GOD內既「囍宴品。味」。
奶奶臨時被人拉左去台灣，兩位Annie就一個準備出trip，一個追完V後發燒，不過都有7條女到。

裝修同私房菜既「囍宴」一個格，餐牌選擇唔太多，菜式都係東南亞fusion。

話梅花雕雞，秘製凍豆腐，香辣茄子球，香酥梅子排骨，清炒時菜，梅子石榴，大蝦柚子沙律，辣味炒蘿蔔糕，炸醬麵，豬頸肉，泡飯.......
碟頭比預期中大，唯一敗筆係個炒蘿蔔糕，十舊都無就誇ｄ。


甜品先至巨，個雪糕球拳頭咁大，份量十足。我就點左個"蓮香飄飄"，幾特別既蓮子餬。

味道唔錯，份量適中，價錢都係Rice Paper既level，下次tea又多個聚腳點。

仲有櫻花？









唔好以為我仲po緊日本既相，盛放既櫻花竟然響太古城中心!!










因為UNY變身Apita開幕，黎個日本文化展。商場頓時多左個神社，同埋兩旁既櫻樹。

晚飯後約左Connie去Key West飲杯野，點左杯Calpis Sour；大就大杯，但就會越飲越渴。除左發現櫻花外，又發現Key West做到5月底就結業。

我地一杯野就坐到人地打佯先捨得走。

For One More Day

之前讀過呢個作者既Tuesday with Morrie同The Five People You Meet in Heaven，早幾個月見到新作出品，但只得又貴又呀咋既硬皮，忍手到最近見出左paperback先買。

一如其他作品，本書薄，字體大同易睇；但又不乏充滿回憶既感動位。

故事係描述一個自母親死後，人生一直走下坡既中年漢，正打算返老家自殺之際，見到死去多年既母親。就響呢一日同母親"相處"既時間裡，佢回顧自己既人生。發現好多以前遺忘/遺漏，值得珍惜既人與事。

結構有d似Dickens既"A Christmas Carol"。

讀完之後，覺得更應珍貴自己同家人既時間。If I were given one more day to spend with my Dad, I would tell him how much I missed him.

快餐生日飯

細佬今日生日，約左佢一家人食飯慶祝。出街食係必然，因為梁師奶d廚藝同"慶祝"兩字扯唔上邊。

誓估唔到，梁大少竟然會揀樓下商場既"一粥麵"。生日食快餐，雖然味道唔差，亦都唔算坐得迫，但真係有點兒哪個。

烏烏濕身肉照

梁師奶剛幫佢沖完涼涼，你地睇我d毛毛係咪同我家姐一樣咁捲？

Vanness V.Dubb簽唱會

又係apm，3pm。不過我對呢個地點真係毫無抗議，因為交通方便之餘，唔駛日曬雨淋。
家陣排隊已經唔駛咁早，兩點多先施施然去到。同Annie企響記者台後面，雖然都叫對正台，但開頭唱歌玩遊戲時都係望住班記者大哥個pet多。
準3點開始，唱左兩首歌，同fans玩左兩個低能遊戲，再做埋文字同電視台訪問，4點至開始簽名。








唔係想像中咁多人，我地等d記者走晒先上台；費事入鏡啦。半個鐘就已經簽完名握埋手。Annie佢地再落去排過第二round，我就閃啦。

大功告成

玩左兩日，終於都將日本之旅既相，po晒落MSN Space度：

http://glorialeong.spaces.live.com/

或者可由右手邊"My Photo Album"條link登入。

由5月12日至19日，分唔同album。真係令人回味。

梁師奶領堅振
上左大半年募道班，梁師奶今晚終於都領堅振。個彌撒傍晚6點開始，地點當然係佢去開既坑口聖安德肋堂。
你問我想唔想去？個心就梗係唔想啦。但如果呢d重要時刻都唔出現支持吓，梁師奶睇怕都會嬲足我成年！

好彩今次個禮堂夠大，有得坐。就算要元神出竅都唔駛罰企咁辛苦。而且個儀式"只係"個多小時，比上次跑馬地樂活道教堂好好多。
"捱完"成個彌撒，都識做地幫師奶同意大利藉既施神父，同Godmother兼教友Gaile合照。

真係比足面啦。

麗都茶聚

好耐無見林氏姊妹，約左佢地黎個下午茶。估唔到佢地會山長水遠入到去寶琳，結果2:30pm去左新都城2期既「澳門麗都餐廳」食個late lunch。
契女巢樂然當然都係座上客。

地方幾好坐，食物亦都唔貴；但就奉送黑面同無禮貌。未食晏既我，黎個下午茶牛根新竹米粉+涼拌海蜇。

既然黎到樓下，食完後我上去抱阿黃帝烏出黎見吓人。唔鍾意狗狗既巢樂然，都忍唔住手捽左佢幾野。不過好攪唔攪，攪人地個pet pet，當然嚇到彈起啦!!

Parrucchi+Laruce

下午補返尋日半晝假，諗住頂自己個頭唔順死死地氣去Hairdo做負離子；結果end up試左隻新推介既直髮treatment Laruce，70% treatment成份，雖然只last 2-3個月，但就無負離子咁傷。日本已經唔再興做負離子喎。不過呢個treatment都係中途要用熱夾鉗直d頭髮，而且都係兩日唔好洗頭。

再加埋佢地新購置既Parrucchi納米蒸氣機，話係用10萬份一既水份子噴落d頭髮度，可以令到個treatment更見效云云.......總之今個週末Sogo特價，Laruce同Parrucchi都有9折，加埋剪$2000有找，平過我平時做負離子。又試試效果會唔會好d。

之前剪開既Kawashima San返老家自己開檔，今日試左位岩本大輔(Daisuke San)，係一位由札幌剛黎左兩個月既小鬍子。斯文得黎有d怕醜，哈，我忍唔住話比佢聽上星期先去過佢家鄉。

善存背心

同事Johnny非常活躍，毅行者，渣打馬拉松乜都岩。黎緊又同班friend端午節扒龍舟；當然我地唔會放過幫善存賣廣告既機會，sponsor佢班隊友龍舟制服啦。

哈哈，我地叫佢囉唔到獎都要扮落水，務求要被電視台影到個logo為止。