La Vie Avec Amusement: 06/01/2007

了解

以前成日為芝麻綠豆小事同佢吵，為公為私；而家已經去到唔會吵架既地步。

以前成日以為係佢依賴我，家陣好多時都係我依賴佢。

以前不時都敦起長輩款教訓佢，而家佢不時以平輩身份同我討論做人處事。

以前相差好遠，呢兩年佢發力越追越近。

比心機，你好快會超越我。

奮鬥中

尋日余經理同Michael閉門練"玉女心經"(砌條數比我)，成3點多先出關；比原定死線遲左大半日。

結果害我今朝假期都要7點多返工。

不過今日返總好過聽日返，七一遊行，盞塞車塞人。

難為呢排日日收凌晨，今個長週末返足兩日工既臣哥。大廠GSK7月全線過檔裕利，全球頭3大藥廠都比佢做代理，日日開會如打仗，除左偶然走廊撞到外，都好耐無見我呢個老友。

又係一星期內Encore

今次係「謙記」，雖然係吉祥閣新店。

對住d數好悶，ad hoc約卡生晚飯；結果又係repeat打邊爐，鍋底仲係幾日前既翻版：麻辣拼冬瓜海鮮。食物亦係8成encore星期六晚既選擇：手切肥牛，羊肉，黑椒牛筋丸，手打蝦丸，黑柏葉，琵琶蝦福袋，秀珍菇同菜心苗。

我鍾意呢度d野夠新鮮同選擇多，不過對食開濃味既卡生，就會嫌唔夠味。佢既麻辣心水始終都係「小肥羊」。

剛轉team做Luxury男裝錶廣告既卡生，平日收工唔定時好難約食飯；不過新環境，新同事，新衝擊，工作滿足感比食飯重要。

真係有咁筍？

同事Michael所到之處，不時有"狂風浪蝶"撲埋去，我都時有所聞。上次東莞開年會，快餐店內大陸妹埋身兜搭，結果要Daisy扮佢老婆解圍場面我走寶睇唔到，今日終於都有幸見識。

食晏落樓下一橫行內小館，年青女侍應一見到Michael已經特別多野問佢。本來都唔太著跡，最頂引係食飽出門口時滂沱大雨，余經理隨口問人地借遮，結果條女囉住把遮唔係比余經理，而係直撲Michael處：你拿去用啦，下次落黎食飯先比番我囉(雙眼閃耀住烏烏望媽媽式既傾慕眼神)

Debbie忍不住問我：條女係咪對Michael起痰？
我：唔駛審啦。

下午既屈臣氏Summer Gala"比面派對"，有最特出衣著選舉；結果因為投票既多數係女士，余經理打電話返黎話Michael以大熱姿態當選亞軍，獲雙人韓國旅遊；我地簡直有d目定口呆.......真係有咁"筍"？

共事5年，日對夜對，佢喺我眼中就只係額頭鑿住"forecast"呢個字，皆因佢係負責做每月sales forecast既人。真係有眼不識泰山，哈哈。

Mega M&M

朝早睇逢星期五既news clipping時見到萬寧入左呢款巨大包M&M。下午對住d數字頗沮喪時，死落去買包上黎看門口。

$28.9，你見我放響隔離既潤唇膏比例，就知佢有幾大包。每粒比原來既大兩倍左右，再大d好易啃死。

用佢黎做sugar boost，總好過用肥死人不償命既MARS Bar。

壞榜樣

差不多又係每年我漫長既"姨媽到"月份：budget time。

呢兩年都係活響追數壓力下，呢d時候就更加要做清楚2007BE(即要上報到底今年到唔到數，唔夠又有乜辦法追)既難題。

余經理同Michael腦震盪左兩日，而我就默默砌個presentation比下星期駕到既三舅父。

下午做到好悶，落去買兩罐「喜力」上黎，隊罐比同樣對住盤數一頭煙既Michael：飲勝，唔該砌條靚ｄ既數。

Office hour帶頭飲啤酒，我都算樹立壞榜樣。

希望Michael唔會暈跎跎錯手打多個零........

為狗死，為狗亡

決定了，梁師奶返多倫多呢3個禮拜期間，每日告半晝假陪個皇帝仔。

唔捨得放佢去狗酒店，如果返足工，每日趕頭趕命lunch撲返去餵佢午間粒粒再返工，時間更唔見洗。雖然9月中應該未交budget，但我寧願下午work from home喇。反正年假多到告極都唔完，差不多要豪比公司咁滯。

衰仔包，要個commercial manager告咁多日假黎陪你，以我時薪計算，你都算矜貴啦。

「木糠」失敗之作

飯後同YY & Ophelia行過去食甜品。無錯，又係呢間「木糠甜品屋」；睇怕好快會食厭。

Ophelia既菠蘿涼粉冰個配搭味道好怪，而且冰都唔係刨冰，叫人點咬？

YY既芒果大菜糕比較硬，後來既薑汁木糠布丁亦都係太硬，唔夠creamy。

至於我既雜果西米露就真係非常「行貨」，生果唔算多，同早兩日同Ellena黎見隔離叫既賣相差左一大截；唔通真係：隔離飯香？！

Lanna

之前只係lunch黎過。襯今晚梁師奶又飛我既日子，約埋YY，Ophelia，同永遠都姍姍來遲既Bernice食晚飯。

Fushion泰國菜，碟頭唔算細，味道quite OK喎；當然價錢亦唔能夠用平黎形容。(相比起lunch set $70-80真係幾抵食架)唯獨服務生態度未算慇勤。

4條女既食量：大蝦柚子沙律，清邁燒乳豬1/4隻，冬蔭公，沙嗲，雜菌炒椰菜苗，黃咖哩蝦，清邁燒餅，蒜蓉包。

Bernice係晚市既稀客；其實平時佢都會被各方同事糾纏住，近呢一年就算連lunch都好少見。自從Ophelia轉左工後，Bernice都近乎處於HR one man band既狀態。我個division 8丁友都做到踢晒腳，佢既忙亂程度可想而知。

避世3星期

梁師奶book左機票9月14號返多倫多3個星期(都岩既，外公都80多歲，最近又腳腫)，即係話我將會遷入將軍澳過3個星期隱居既生活!!!

早兩年佢跟舅父佢地去大陸旅行一星期，我已經日日放下午去陪皇帝烏，照顧佢一日三餐大小二便，外加下午出外吹風，之後黎小半個蘋果，夜晚陪睇電視陪訓覺.......baby sitter都無咁服侍週到。

呢鑊x3，諗起都頭痕。你地到時多d入黎將軍澳"探監"啦。

相濡以沫

無意中睇左一陣無線做既回歸特輯"拾年"，講述創辦樹仁大學既86歲女校長鍾期榮，同陪伴左佢大半世，結婚62年既校監兼丈夫胡鴻烈，點樣為左一個辦學既理想，奮鬥數十年，終於2006年樹仁由學院被升格至大學既故事。

奮鬥固然值得敬佩，更令人感動既係校監丈夫點樣無微不至地照顧2001年中風，不良於行既校長。見到佢為愛妻訪問途中抹滴在心口既口水，真係一個好男人既典範。

最應景係片尾播既"陪著妳走"，我諗整個節目，樹仁係一個舞台，呢兩位"執子之手，與子偕老"既老人先係主角。

買返黎供奉

大鑊，正急切需要減肥既我，響梁師奶樓下既「廣良興」發現呢３款，新出地區拉麵口味既"童星點心闊麵"。

極大既誘惑。

札幌麵豉，東京醬油，同博多豬骨湯味.........唔得啦，寧願先買返去"供奉"一排，都唔可以錯過；皆因此店不時引入日本當地新口味零食，限量供應，第二ｄ地方真係無架。

P.S.話就咁話，心知呢３包野多數今個星期內被我擺平。

廣告效應 
原來呢個blog都有d廣告effect。話說Ellena早前見我同廖太們黎過食木糠布丁，就算打完邊爐大家都攬住個肚，謙記送埋甜品既情況下，都拉大隊過黎食。

除左上次試過既咖啡同藍莓木糠布丁外，我地仲試左綠茶紅豆布丁；後者唔夠苦，一試完味濃既木糠布丁就更加顯得淡口。

如果呢個blog再多d讀者，或者我變成另一個"阿蘇"都唔定，哇哈哈。

8個女人的食量 

約左Ellena同佢班朋友出銅鑼灣「謙記」打邊爐。呢度既"混醬"tray比起上次深水埗「耀東」pro好多。

成枱有一半係去年BBQ見過。其中一人喪點既情況下，又係滿枱食物，非常壯觀。更可怕既係，我地竟然清得晒!!麻辣拼冬瓜海鮮鍋，當中蝦丸勁多蝦同彈牙，黑柏葉爽口，琵琶蝦福袋同水晶叉燒包都好美味。

席間大談推脂，點樣用手將上圍push up......聲浪之大，相信半間舖都被迫做聽眾。

培園
山頂廣場只此一家，別無分店。

早兩年梁師奶上黎買過杏仁餅，就讚不絕口。皆因新鮮現做，個盒摸上手仲暖既。

$20一盒12個，當然一場黎到要做孝順女啦。

另有雞仔餅都好似賣相幾得，雖從未食過，但無人陪我食，內有豬油，一個人食就真係太那個吧。

內有惡犬
途中經過一豪宅大門，見有隻大黑狗呆坐門內，我嘗試用對烏烏講野既語氣撩佢，換黎既係一陣陣既狂吠!!

哼!!狗眼看人低。

死野，你有種就出黎同我隻揪，小弟都係屬狗。

林蔭大道

上到黎無理由唔繞山行一周。

比起香港公園，山頂差不多整條道都有樹蔭，而且有微風；唔焗之餘簡直可以用"爽"黎形容。

遊人比想像中少好多，可能d一家大細太熱迫晒去沙灘之故。

路旁山邊新建黑色圍欄，安全d之餘，設計都幾classic，值得一讚。

山頂餐廳

相比起華麗既Cafe Deco，比較喜歡山頂餐廳cozy既感覺。

其中亦都因為呢度有小時候梁生大霧迷濛中，帶我上黎食朱古力雪糕既回憶。

最攪笑係正當我舉機等班自由行過馬路，唔好阻住我個景之際，聽到個導遊大大聲話：對面呢間餐廳，機場都有一間架......(正當我諗邊間咁巴閉既時候).....Burger King!!
頂，差d噴飯，快餐都當名店介紹？

不過我地去到日本見到MOS burger既態度都可能比人見笑。