周總保重

同余經理特地飛去上海join埋班大陸同事farewell阿John；因為佢真係一個既勤力，又事事以員工為先既好老細。

今日係佢既last day，所以佢既開場白就係：過了今天，再不要叫我老板，大家都是朋友!!

大家都盛讚John係一個無架子，親和力十足既老板：

重慶"以往只有年會先有機會見到總經理，真係無諗過阿John會黎我地office!!"

湖北"我地都係第一次有總經理跟我地出去巡視業務"

Farewell晚宴地點係市中心，襄陽北路既「圓苑」飯店；典型高檔上海菜。

開頭先黎幾碟滬式冷盤，初頭余經理仲怕食唔飽要返去宵夜，點知好野陸續有來：招牌菜外婆紅燒肉，糯米釀紅棗既心太軟，考刀功切得極幼既雞火乾絲，花功夫既八寶鴨，生拆蟹粉，清蒸時魚，水蟹湯，雲腿津白，菜蟹泡飯，生煎包.....唔飽？講笑咩！

呢d場合，都預左會隊酒。但個性靦腆，而又無甚酒量既周總，盛情難卻下一杯接一杯。結果最後係腳步浮浮兼當住我地面前喪嘔！最後大家對佢既印象，竟然係咁狼狽既畫面，真係唔好意思。

懶得就懶

聽日飛去上海只係為左食餐晚飯：歡送老細John。

既然去上海只係一晚咁大把，都係帶黑莓上去算啦；無謂帶部腦咁重。

難得輕便出門(真係帶條under去換就夠，反正可以裸睡，連night shirt都慳番，哈哈)，星期六返黎先補相。

擺明黎Hea
未到農曆七月，office就鬼聲鬼氣。

繼Regional Marketing Director Martin，Regional Regulatory Director Glenn早幾個星期上黎office同我地做review後，今次論到Regional Demand Director Peter殺到。不過佢就講到明係一個月橫掃數個國家既business trips當中空檔，過黎香港幾日涉時間。所以無叫我地準備agenda或presentation；相對上"識做"d。

同前兩隻鬼一樣，都係相識左超過10年，一年總會響外地開會見幾次既"老友"。









朝早佢自己關埋房門telecon，下午只係落去Grappas陪佢食餐晏仔(上菜到埋單都不合理地慢，個Risotto又唔多掂)，飯後做個樣叫做go through左d outstanding projects status就一腳西佢返酒店。

反正遲d budget meeting都會見，無乜特別野要傾就唔好阻住晒!

久違既「迎囍」 $1388套餐

真係好耐廖太聚會無咁齊人，湊得埋12位，當然要重臨「迎囍」 食呢個抵食$1388全包套餐。

呢個月既兩位壽星女：小麥同Virginia，加埋好難就到佢地放假時間既Popo & Jacqueline.....真係難得既熱鬧。

本來以為家陣物價飛漲，就算維持到$1388呢個價都會縮水；點知碟碟份量夠之餘，水準依舊。尤其是條蒸東星，真係黎幫襯咁多次都無失望過；脆皮雞同鴨掌都好掂。

不過更抵食，都係偶一為之好喇；食得多又會開始厭。

善存"湯水篇"

哈哈，又係賣花讚花香既廣告時間。

上次玩買善存送體檢並未達到預期效果，今次轉一轉個theme，黎個"中西合璧保你健康"既platform，同「鴻福堂」黎個cross-over合作：

"買善存送你「鴻福堂」自家湯一碗，價值$38-40"


Debbie同Martha早已係「鴻福堂」湯券既擁躉，聽到我地送"自家湯"都不知幾興奮。點解？因為對方點都會醒ｄcoupons我地試，今日下午茶既免費龜苓糕就係多謝對方慷慨相贈啦。

預告：遲d買善存會送食左靚靚既燕窩，敬請密切留意。

海關賊贓嫁禍

咁都得？？？

剛睇新聞，日本海關在訓練緝毒犬時，將一包毒品藏在一名國泰東京航班港人行李中。緝毒犬搜唔到，個海關又忘記收回，結果毒品後來被港客帶走，日本海關一天後才尋回。

大佬，如果包毒品唔係響日本尋回，個港客之後去d會死刑既新加坡或泰國等地，真係多得班架佬唔少。

香港訓練緝毒犬時，都會用道具行李啦；點會用真正旅客黎較飛架？

奶奶，你出入東京真係要小心檢查寄倉行李啦。

無手尾的代價

就係差d豪埋捐款退稅比政府!!

仲有幾日就報稅deadline，的起心肝填份神憎鬼厭既綠色表格先發覺，自己唔知丟左去年捐助"愛護動物協會"，同"苗圃行動"既退稅收據響邊!!

前者打過去都仲可以搵到我記錄，但後者就只搵到我贊助Johnny步行既$200咁大把。

無理由，無理由；明明人狗都有受惠，我段唔會厚此薄彼。

條氣唔順公司惱找完，返屋企再找。Cheque book record同戶口過數紀錄都找遍.....結果係老好東亞白金卡客戶服務生幫我翻查到去年9月見到條數。

呢個故事既啟發係：做問回報(退稅)既善事，一定唔可以咁無手尾。

令人動容的遺言

剛讀雜誌，被深深感動既災場故事：

搶救人員發現她的時候，她已經死了，是被垮塌下來的房子壓死的。

透過那一堆廢墟的間隙，可以看到她死亡的姿勢：雙膝跪著，整個上身向前匍匐著，雙手扶著地支撐著身體，有些像古人行跪拜禮，只是身體被壓得變形了。

救援人員從廢墟的空隙伸手進去，確認她已經死亡，又衝著廢墟喊了幾聲，用撬棍在磚頭上敲了幾下，裏面沒有任何回應。當人群走到下一個建築物的時候，救援隊長忽然往回跑，邊跑邊喊“快過來”。他又來到她的屍體前，費力地把手伸進女人的身子底下摸索，摸了幾下，他高聲喊“有人，有個孩子，還活著”。

經過一番努力，人們小心地把擋著她的廢墟清理開，在她的身體下面躺著她的孩子，包在一個紅色帶黃花的小被子裏，大概有3-4個月大，因為母親身體的庇護，他毫發未傷，抱出來的時候，他還安靜地睡著，他熟睡的臉讓所有在場的人感到很溫暖。

隨行的醫生過來，解開被子準備做些檢查，卻發現有一部手機塞在被子裏。醫生看了下手機螢幕，發現螢幕上是一條已經寫好的短信“親愛的寶貝，如果你能活著，一定要記住我愛你”。看慣了生離死別的醫生，卻在這一刻落淚了。手機傳遞著，每個看到短信的人都落淚了。

梁大少韓式慶生

下星期二生日既Martin，我唔提梁師奶夠膽死真係無件事：

尋晚既對話

"你個仔下星期生日你諗住點？"

"我邊個仔？"

(汗.....唔通係阿烏咩？!)

結果揀左梁師奶曾同班教友黎過既「莊園」，以為都應該可以彈少d，點知一樣嫌我地訂得太早，廚房班友之前勁煲煙所以有煙味云云.......煩到想死。對住唔係嫌未熟就嫌太燶既呢位"百彈齋主"，燒烤只會越攪越僵，所以都係叫最穩陣既：炆牛肋骨煲，石頭飯，蛋包魚，韓式年糕(不過佢地嫌太辣)；最掂既反而係款式多多既配菜。

準壽星同女友響貝澳露營中特地出黎食餐飯，又趕船返入去與星星及牛屎為伴；都好既，總好過整個週末訓晒佢咁唔健康。

提早餞別

與阿John同日last day既Martha，因為下星期我同余經理要飛去上海farewell老細，所以提早今日請晒我地食飯，六月頭我地先正式farewell佢。

襯人齊，先送出大家夾份，由我選購既Lancel黑色皮銀包。呢份禮物，係大家都花左d時間討論所得出黎既結論；所以比以往送比阿Paul/Keith/John佢地既Burberry cashmere頸巾，雖然價值差不多，但誠意加倍。

之不過午飯地點Cafe Einstein就真係好唔掂，無論食物同服務都係。舖面侍應生唔夠上菜勁慢都算，但態度差先係最趕客。頭盤既銀魚薯仔烚蛋沙律都勉勉強強，主菜既烤豬柳就韌如柴皮，同Piann度既黑豚真係差天共地。呢間餐廳，真係可以順便farewell埋佢添呀。