La Vie Avec Amusement: 06/01/2008

另類導賞團

臨放工無聊翻U-Magazine，見到專題報導跑馬地數個唔同宗教墓園，細數各個名人如何東，林黛等墓地。尤其是天主教既墓碑，斷柱同天使雕刻都各有含意；繞有趣味。

當中更介紹7月12號星期六上午，一個名為：“墓園遊蹤 - 跑馬地”既另類導賞團。

今次我們將從歷史，社會，文化角度出發，走訪跑馬地多個墳場，透過導賞解說，釋出石頭背後的故事，與您走過時光隧道，回顧香港開埠百多年來的歷史。

您可有興趣與我們一起，透過細說東西方對生死的不同看法，各墳場的源起，所安葬的已故名人軼事，不同宗教的墳場建築特色，墓碑的設計，了解香江歷史，社會及文化發展的點點滴滴呢？

Weblink: http://www.hklb.hk/tour.asp?id=466

名額唔多，只得廿位；可能怕人太多會噪吵打擾先人安寧。雖然$120兩個多小時有點貴，不過因為係"小班教學"，成本相對較高。

有無人有興趣一齊報名？咪當行山做運動囉。

初嘗狗狗樂

下午Carol同巢大小姐過黎寶琳「香辣屋」食晏；既然揀得呢度，當然係推埋皇帝烏落黎陪座啦。

12:30pm入座，唔係太多人。我就一樣全程抱住佢食飯，因為咁樣比諸事八掛既佢望我地食乜，佢就會全程安安靜靜等我地。

巢大小姐又要怕，又想抱烏烏。初頭縮縮吓唔多敢掂，克服後就手不離狗。我地飯後行商場期間，佢簡直係"霸住"烏烏架車黎推；甚至後來陪我去公園放狗，都要爭執繩，我就變阿四推車跟尾。

小心呀，玩狗會上引架；哈哈。

13+13善待自己講座：愛惜家庭篇

花錢比人攪既health talk，果然係有睇頭d!!

用左廿多萬，聘請"Take Me Home生活區報"攪3場名為"13+13善待自己講座系列"(因為Centrum有26種維他命/礦物質)講座。

繼之前既兩場灣仔及沙田區，今日下午係最後一場尖沙咀，主題"愛惜家庭篇"; 地點係金巴利道既君怡酒店。

其實個場係將兩個function rooms打通，加埋設合講座主題既佈景板及可著燈既人型紙板，比平時自己攪既講座感覺Pro好多。

去幫手既我同Sinmei，都變得行行企企，遊手好閒；因為佢地出左大大話話10多個工作人員擔任司儀，攝影，入場登記，帶位等等......真係有錢駛得鬼推磨。

個營養師David都算講得生動，連我今年聽過N次類似既內容，都被佢帶動現場氣氛變得留心聽書。記住，紅甜椒係最有營養瘦身食物；維他命C比奇異果更高，哈哈。就連一般health talk甚少既遊戲環節，全場200多人大都有舉旗仔搶答，利害。

退步中的「新羅寶」+「囍宴」

襯奶奶同Connie各自去完日本同北歐返黎，人少少六條女都出黎飯局聚一聚。

哇哈哈，奶奶送我既夏天"期間限定"燒餅，個煙火鐵罐同我今日件Tee襯到絕!!

因為Connie手上有張$100 coupon月底expire，所以去利舞台「新羅寶」食韓國菜。

6個人只係比六碟小食實在有d縮皮；味道唔算差，但有比較既情況下，真係比金百利既「金羅寶」或謝斐道既「莊園」遜色。

芥末汁涼拌海蜇，韓式炒粉絲，蕎麥荵煎餅，麵豉海鮮鍋，炆牛肋骨，石頭飯。

對唔食得辣既Annie同Charlotte而言，佢地應該唔會太飽。

食大左個胃既阿二，一如以往嚷住要去續灘食甜品。結果就過對面GOD內既「囍宴‧品味」，黎個"東瀛咖啡啫喱配牛奶雪糕"；$42。價錢唔算平，份量雖然唔係細，但大家一致覺得極甜。阿二，銅鑼灣無乜邊間甜品係掂既，下次都係忍忍口當減肥啦。

義子

第二年響愛護動物協會助養被遺棄小狗。

剛收到既"義子"大頭照，雖然笑容燦爛，但真係好鬼醜樣!!

其實就算比張相我地當謝禮，助養既捐款未必一定係呢隻狗收惠；只係幫助供養一眾待人領養既狗狗，希望佢地快d遇到一主好人家，可以好似烏烏咁享受家庭溫暖。

等到我退休之年，唔駛再做空中飛人，一定身體力行做個真正既"養母"。

只差三刻鐘

唉，雖然最終按照預期咁賺左半day，但只差45分鐘.......如果個老土天文台遲過12點落8號波既話，就可以大安指意繼續做couch potato煲劇喇。

一整個早上，明知佢隨時變3號要彈起身梳洗返工，攪到每隔15分鐘轉過台去無線確認個颱風signal。全港打工仔都受天文台支配。

死人天文台，夠薑個風球last過10:30am，等d學生放full day，家長唔駛冒住風雨帶班細路返學；但就唔夠薑拖過12pm，免得下午無得開市，兼夾惹得班顧主抱怨。

結果午後3號咪一樣掛足大半日，個timing擺明係玩野啦。

行咁快替死咩？

自從"風神"既路徑越來越近香港，我地都不其然密切留意天文台網站有乜新消息。放工前仲大安指意叫Debbie將聽日告左既年假改後日，費事撞打風豪比公司咁戇居啦。

本來聽朝先登陸，諗住無一日都應該有半日"so"啦，點知個死人風越行越快，11點唔夠就掛8號喇；計落條數，就算香港頭頂略過，都會凌晨登陸。

咁聽朝一個唔該落鬼埋個風球，就真係....klwaptjkr;kltn;jktr h4jh4jklgnkl;df jaor

舊瓶新酒

下午HR請左外頭一間顧問公司Deloitte Touche Tohmatsu，為所有Asso. Manager以上既同事介紹數年前推行過，但結果攪到一鑊粥既"Rental Reimbursement Program"。

其實一句講晒，就係如果你有租樓既話，交齊相關文件如租約及每月租單比HR，公司就會用你部份人工當company paid housing出比你；呢部份係"免稅"既(只需要交餘下應課稅總額既10%，通常都有賺)。

如果有租樓又參加呢項計劃既話，年中大大話話都可慳到超過一半稅。

幾年前推行時，HR因為無check清楚要注意條款，結果數年後好多惠氏經理都被稅局追討過去6年租金稅額；隨時大拿拿一筆過交10多萬稅，真係雞毛鴨血。

今次HR精左，搵街外人幫拖，希望唔會再整多鑊金既啦。(雖然我10年前榮升業主，呢個計畫再與我無關)

吉日

決定左9月中搬office；百無禁忌既我，但求9月20號梁師奶出發去耶路撒冷之前攪掂即可。不過點都要照顧埋比較迷信既余經理同Michael，撞日不如擇日，做sales"老黎"係最緊要。

YY個家姐略懂睇通勝，話9月16號中秋節假期後首日宜搬，17號亦係超好日可以切燒豬"入伙"。但呢日就沖生肖熟牛同虎，(Michael問呢兩個生肖者駛唔駛擰轉頭迴避......啋，出殯咩!!)，據我所知office內無人屬呢兩款，除出唔肯透露年齡懶神秘既余經理.....不過佢咁大個人，叫得我地搬都應該沖唔到佢掛。

數年前搬過黎時寫左篇"告別林肯"既post，9月就會有篇"回歸林肯"；所以學伍晃榮話齋：波係圓既。

Long Time No See

差不多大半年無見Gigi同"聰哥"Cedric，約左陳林兩家又到「紫星軒」飲下午茶。

Carin同Carton明顯地曬黑左，比起聰哥慧妹兩公婆既Alistair斯文白白淨look成強烈對比。不過細路warm up左後，就玩埋一堆你追我逐，真係睇少眼都唔得。

聰哥因為膽固醇輕微超標，比慧妹再三督促住禁食煎炸野；哈，同我一樣，既然缺乏運動，唯有"盡人事"忍一忍口啦。

唔夠四點，班侍應又將個場變身做婚宴禮堂。既然今年都未入過去Gigi度BBQ，一於訂下7月19日之約，大隊殺入大埔去。班小朋友見到千秋滑梯彈床，一定興奮過我見到個燒烤爐！

With a Little Faith

剛響Annie個blog度見到呢隻兩腳行路的Labrador犬"Faith"。

http://vanannie.blogspot.com/2008/06/faith.html

先天缺憾失去雙前腿，但遇上好心人逃過被人道既命運，憑主人既耐心及小狗既意志，結果變成走路"婀娜多姿"既明星狗。

真係世上無難事。

墨酥條

Charlotte帶黎既台灣手信：維格烘焙新出品既"黑炭鳳梨酥"。

(我d同事忍唔住話：乜你呢排食咁多炭？)

一盒六大條，非常矜貴。維格既鳳梨酥聞名已久，但因為唔近市區，所以去過台灣咁多次都無買過。竹炭本身無味，但維格口感確實夠鬆軟；隻色更加令傳統甜點加添型格。

維格網業推介此新產品：http://www.taiwan-vigor.com.tw/front/bin/ptdetail.phtml?Part=10009

粉紅台版Sharp T92

剛由台灣返黎既Charlotte，今日day off過黎搵我lunch；帶左佢行過去「囍點」同埋班同事一齊食，因為人多好食作，可以試多幾味：雞粒荷葉飯，蠔仔肉碎燴飯，XO醬鮮魷炆鴛鴦米，瓦砵南瓜蓉焗烏龍麵，薑荵魚雲煲，梅菜雞粒豆腐煲，黑醋炸魚塊，麵豉醬白菜仔，野菌魚湯油麥菜，同一煲老火五果煲魚例湯。